Eso na lotu vaKarisito era dau vakayagataka na iyaya vakalivaliva mera veivosaki kina kei ira na lewe ni nodra vuvale, vaka kina o ira na mataveitacini. Ia na lotu vaKarisito matua, ena nanuma vinaka na ivakasala qo: “Na tamata yalomatua e raica na ca qai vunitaki koya, ia na yalowai e lako tu ga yani qai leqa kina.”—Vkai. 27:12.

Eda kila ni via taqomaki keda o Jiova. Eda na sega gona ni veimaliwai kei ira na dau vakavuveisei, ira na vakasivoi, se o ira e duatani na nodra ivakavuvuli. (Roma 16:17; 1 Kor. 5:11; 2 Joni 10, 11) Eso ena ivavakoso era rairai sega ni dau muria na ivakavuvuli vakaivolatabu. (2 Tim. 2:20, 21) Eda na vakasamataka tiko vakabibi qori nida qara eso na noda itokani. Ia ena sega toka ni rawarawa nida vakayagataka na iyaya vakalivaliva meda digia kina na itokani vinaka.

E bibi nida digia vinaka noda ilala ke da dau vakau itukutuku vei ira e levu. Era tini leqa eso na lotu vaKarisito era lewe tu ni ilala levu. Era na qaqarauni vakacava na mataveitacini ke ra lewe ni ilala qori e vica vata na drau se udolu? Ena dredre toka mera kilai vinaka na lewena se na kedra ituvaki kece vakayalo. E kaya na Same 26:4: “Au sega ni vakailala kei ira na dau veidabui, au yawaki ira tale ga na vunitaka na kedra roka dina.” E ka vakayalomatua gona meda vakau itukutuku ga vei ira eda kila vinaka.

Kevaka mada ga era le lailai na ilala qori, e bibi tiko ga me vakasamataka na lotu vaKarisito na gauna e vakayagataka kina kei na ka e veitalanoataki. Meda kua ni nanuma ni dodonu meda vakaitavi ena veitalanoa kece, se mani cava ga e veitalanoataki se kena balavu. E vakasalataki Timoci o Paula me qarauni ira na “dau kakase” era “siova na ka e sega ni nodra.” (1 Tim. 5:13) E rawa tale ga ni caka qori nikua ena iyaya vakalivaliva.

E sega ni dua na lotu vaKarisito matua e via vakaitavi se rogoca ni vakalewai e dua na tacina vakayalo se vakacilai na kena itukutuku vuni. (Same 15:3; Vkai. 20:19) Ena sega tale ga ni via rogoca se vakadewa na itukutuku rogo ca, se sega ni vakadeitaki. (Efeso 4:25) E vakarautaki ena noda website na jw.org kei na porokaramu na JW Broadcasting^® e veivula e levu na kakana vakayalo qai nuitaki.

Eso na iVakadinadina i Jiova era vakayagataka na iyaya vakalivaliva mera volivolitaki, volivoli, kacivaka nodra ivoli, se vaqara cakacaka. Qori na sasaga vakabisinisi, e sega ni vauci kina na ka vakayalo. Era na qarauna gona na lotu vaKarisito era sega ni “lomana na ilavo” mera kua ni vakayagataki ira na tacidra mera rawailavo kina.—Iper. 13:5.

Vakacava ke da vakau itukutuku meda kere ilavo me baleti ira na tacida era leqa tu, se ra sotava na leqa tubukoso? E macala ga nida lomani ira na tacida, eda kauaitaki ira tale ga da qai vakaraitaka qori nida vukei ira. (Jeme. 2:15, 16) Ia nida saga meda vukei ira nida vakau itukutuku vei ira e levu tale, ena rawa ni vakadredretaka na veivuke mai na valenivolavola ni tabana se na ivavakoso. (1 Tim. 5:3, 4, 9, 10, 16) Eda sega tale ga ni vinakata me nanumi ni qo e vaka tiko na itavi dokai eda vakacolati kina ena nodra qaravi na qelenisipi ni Kalou.

Eda vinakata ga meda cakava na ka ena vakalagilagi kina na Kalou. (1 Kor. 10:31) Ni se bera gona nida vakatulewataka meda vakayagataka na iyaya vakalivaliva se so tale na kena sa tu nikua, meda vakasamataka na leqa e rawa ni basika da qai qaqarauni.