Sèrten Témwen ka sèrvi tèknoloji nou gen jòdla pou palé ké yé fanmi ouben ròt Témwen. Ké tout so bon sans, roun krétyen ki ka byen réfléchi ké sonjé sa konsèy-a : « Moun-an ki ka fè atansyon ka wè danjé-a é i ka séré so kò, mé moun-an ki ka krè tout bagaj ka kontinyé vansé é i ka soufri akoz di sa » (Prov. 27:12).

Nou savé ki Jéova lé protéjé nou. A pou sa nou pa ka maché ké sa-ya ki lé séparé nou, sa ki èskominyé, ni sa-ya ki ka ansényé bagaj ki pa vré (Rom. 16:17 ; 1 Cor. 5:11 ; 2 Jean 10, 11). Menm annan asanblé-a, a pa tout moun ki gen roun bon kondwit (2 Tim. 2:20, 21). A pou sa nou divèt byen chwazi nou zanmi. Mé a pa roun bagaj ki fasil pou fè asou roun aplikasyon pou voyé ké rousouvwè mésaj.

Nou divèt vréman fè atansyon lò yé ka fè roun gran group pou palé asou aplikasyon-an. I gen roun ran ki mété yé kò annan sa kalité gran group-ya, yé chaché panyen, panyen kouvri yé. Kouman nou pouvé rivé fè atansyon si nou annan roun group koté i gen pasé san ouben pasé mil moun ? Ès nou pouvé konnèt chak moun é savé si yé lafwa fò ? Psaume 26:4 ka di : « Mo pa ka maché ké moun ki ka bloublou moun, é mo pa ka menm bòrdé moun-yan ki ka séré ki kalité moun yé fika. » Donk, miyò nou mété nou kò annan group pou palé, sèlman ké moun nou byen konnèt.

Menm si group-a piti, nou divèt fè atansyon pou nou pa pasé tròp tan ka voyé ké rousouvwè mésaj é nou divèt véyé osi ki kalité kozé moun-yan gen. A pa tout mésaj nou blijé réponn san gadé konmyen tan sa ka pran ni ki kalité kozé yé ka pran. Pòl avèrti Timoté ki roun ran moun té ké « mélé yé kò annan zafè moun ». (1 Tim. 5:13) Jòdla, sèrten krétyen ka fè sa asou aplikasyon élèktronik-ya.

Pyès Témwen ki ka byen réfléchi pa ké ni kritiké ni di bagaj i pa divèt di asou frè ké sò-ya, ni menm chaché konnèt sa bagaj-ya (Psaume 15:3 ; Prov. 20:19). I pa ké ni kouté ni répété pyès bagaj èkzajéré moun ka voyé ouben bagaj pyès moun pa savé si a vré (Éph. 4:25). Nou gen asé enfòrmasyon ki ka vini di Labib-a ké istwè nou pouvé krè asou nou sit jw.org ouben annan émisyon ka soti chak mwa asou Télé JW pou nou rété trankil.

Sèrten Témwen ka sèrvi aplikasyon pou voyé ké rousouvwè mésaj pou vandé, achté ké fè piblisité pou sèrten prodwi ouben pou propozé moun roun travay. Mé sa bagaj-ya a pou fè komèrs, yé pa gen anyen ka wè ké ladorasyon pou Jéova. Krétyen-yan ki pa lé « lésé zafè kontan soumaké » gidé yé, ka réfizé tonbé annan zafè sèrvi nou frè ké sò-ya pou fè soumaké (Héb 13:5).

Ès nou divèt sèrvi aplikasyon pou voyé ké rousouvwè mésaj pou doumandé soumaké pou frè ki bézwen ouben pou trapé soumaké pou roun opérasyon pou poté sékour ? Nou kontan montré nou lanmou pou nou konpanyen é nou kontan idé yé (Jac 2:15, 16). Mé si nou ka éséyé fè sa ké roun gran group asou roun aplikasyon, sa pouvé jennen bagaj filyal-a ouben asanblé-a déja ranjé (1 Tim. 5:3, 4, 9, 10, 16). Nou pyès pa lé fè moun krè ki a nou yé chwazi èspésyalman pou pran swen di nou frè ké sò-ya.

Nou lé bay Bondjé lagwlar annan tousa nou ka fè (1 Cor. 10:31). Alòr, lò nou ka réfléchi pou savé si nou ké sèrvi roun aplikasyon pou voyé ké rousouvwè mésaj ouben rounòt bagaj konsa, a pou nou sonjé danjé i pouvé gen épi panga.