Thoddim Sakxim aplea famili ani her bhav-bhoinnam lagim ulounk electronic sadhonancho vapor kortat. Punn tannim ho sol’lo ugddas dovrunk zai: ‘Xittuk munxak sonkoxtt dison ieta ani to lipta, piso munis fuddem veta ani trasant poddtta.’—Mho. 27:12.

Jehova amkam vaitt probhava thaun rakhonk modot korta mhunn ami zannant. Taka lagon, sobhent futt ghaltat toslea, sobhe thaun bhair kaddlolea vo chukichi xikounn ditoleam sangata ami sombond dovrinant. (Rom. 16:17; 1 Kor. 5:11; 2 Juanv 10, 11) Ani sobhentlea thoddeanchi vagnnunk Kristanvank sobhta tosli ghoddie asona. (2 Tim. 2:20, 21) Tor ixttam vinchun kaddttana ami hem ugddas dovortat. Punn message-i udexim ami uloitat tednam, borim ixttam sodhun kaddunk amkam kotthin zaunk puro.

Khas korun, message dhaddchea grupant zaitim zann astat tednam ami chotrai dovrunk zai. Karonn hea vixim chotrai dovrunk na tea thoddeank, vaitt porinnamacho fuddo korcho poddla. Oslea grupant xemboramnim vo hozaramnim bhav-bhoinnam asat zalear, tim soglim konn ani tancho bhavarth kitlo ghott asa tem amkam khobor aschem na. Tor ami Stotr 26:4-ant sanglolo sol’lo ugddas dovrunk zai. Thoim mhunntta: “Fottkiream modem hanv bosona ani dhongiam borabor hanv bhonvona.” Tor hea versa pormonnem, zankam ami vollkhotat tankanch message korop xanneponnachem zatolem!

Message korcho grup lhan aslear pasun ami tantunt kitlo vell sartat ani ami koslea vixoi-acher uloitat, tachi pasun ami chotrai dovrunk zai. Tor tantunt ietat tea dor eka message-icho ami zobab diunkuch zai oxem na. ‘Chaddio sangtat ani dusreanchea jivitant ghustat,’ oslea lokam vixim Paulun Timotak xittkail’lem. (1 Tim. 5:13) Tor ami chotrai dovrinant zalear electronic sadhonam uzar korun ami oslim vaitt munxam zaunk xoktat.

Message-i udexim Kristanv dusreachea vixim vaitt ulounchim nant vo aplea bhav-bhoinnam vixim dusreank sangonk nozo ti mahiti sangchim nant. (St. 15:3; Mho. 20:19) Tea bhair, dusreank ojap kortat tosli, punn khori nasloli mahiti tim dhaddchim nant. (Ef. 4:25) Karonn jw.org website-i udexim ani JW Broadcasting^® hea kariavolli udexim amkam patieupa sarki goroz ti sogli mahiti melltta.

Thoddim Sakxim oslea message-i udexim veapar kortat vo aplea veapara vixim dusreank sangtat vo dusreank sirvis ditat. Hem soglem veapara sombondit asa ani Jehovachea bhoktek sombondit na dekhun hem uzar korun amchea bhav-bhoinnam koddlean poixe zoddunk ami uzar korchinant. Karonn Kristanvamnim ‘girestkaiechi axa dhorum nozo’ mhunn sanglam.—Heb. 13:5.

Gorjek ani odruxttank sampoddlolea bhav-bhoinnam pasot poixe ektthaim korunk ami electronic grup message-o uzar korunk xoktat kai? Ami amchea bhav-bhoinnancho mog kortat ani tankam modot ani urba diunk sodhtat tem khorem. (Jak. 2:15, 16) Punn zaite lok aslolea grupamnim ami osleo message-i dhaddun modot korunk sodhtat zalear, osleank modot korunk xakha ofisak ani sobhek manddavoll korunk kotthin zaunk xokta. (1 Tim. 5:3, 4, 9, 10, 16) Tea bhair, amchea bhav-bhoinnank eka khas toren modot korunk Jehovan amkam vinchun kaddleant mhunn dusreamnim chintlolem amkam naka.

Ami kortat tea soglea kamam udexim ami Devak mhoima diunk sodhtat. (1 Kor. 10:31) Tor osleo message-o vo her electronic vostu uzar kortana tantunt aslole dhoke ugddas dovrun ami chotur ravum-ia.