Klistiani delẹ nọ yí nuhe nuyọnẹn wintinwintin detọ́n lẹ zan nado dọhodopọ hẹ hagbẹ whẹndo tọn po Kunnudetọ hatọ lẹ po. Na nugbo tọn, Klistiani he whèwhín de na hẹn ayinamẹ ehe do ayiha mẹ: “Zinzintọ nọ mọ oylan hlan bo nọ whlá ede, ṣigba, wunvinọ nọ dlí biọ e mẹ bo nọ jiya kọdetọn etọn lẹ tọn.”—Howh. 27:12.

Mí mọnukunnujẹemẹ dọ ojlo Jehovah tọn wẹ nado bayi hihọ́na mí. Enẹwutu, mí ma nọ dogbẹ́ hẹ mẹhe nọ hẹn kinklan wá, mẹhe yin didesẹ sọn agun mẹ, kavi nọ ze nuplọnmẹ agọ̀ lẹ daga lẹ. (Lom. 16:17; 1 Kọl. 5:11; 2 Joh. 10, 11) Mẹdelẹ he nọ dogbẹ́ hẹ agun lọ gán nọma nọ yinuwa to aliho he doyẹyi de mẹ. (2 Tim. 2:20, 21) Mí nọ hẹn ehe do ayiha mẹ, eyin mí jlo na de họntọn mítọn lẹ. Gbẹdohẹmẹtọ dagbe lẹ dide sọgan nọma bọawu, eyin mí nọ yí aplikasiọn wekanhlanmẹ tọn de zan.

Onú titengbe wẹ e yin nado nọ pọ́n ogbẹ́ do dó, eyin mí nọ yí tito wekanhlanmẹ tọn he bẹ pipli he mẹ gbẹtọ nọ sù te hẹn lẹ zan. Klistiani delẹ ko biọ pipli he mẹ gbẹtọ sù te lẹ mẹ, bọ enẹ ko hẹn kọdetọn ylankan lẹ wá. Nawẹ Klistiani de gán yí zinzin zan gbọn, eyin e tin to pipli he bẹ gbẹtọ kanweko susu kavi fọtọ́n susu lẹ hẹn de mẹ? E ma na yọnbayi nado yọ́n gbẹtọ alọpa he mẹhe to pipli enẹ mẹ lẹpo yin na taun tọn, gọna teninọ gbigbọmẹ tọn yetọn. Salmu lẹ 26:4 dọ dọ: “Yẹn ma nọ dogbẹ́ hẹ mẹklọtọ lẹ, podọ yẹn nọ dapana mẹhe nọ whlá nuhe yé yin lẹ.” Be enẹ ma dohia dọ mẹhe mí yọnẹn nukun sọ nukun lẹ kẹdẹ wẹ mí dona nọ dọhodopọ hẹ gbọn aplikasiọn wekanhlanmẹ tọn lẹ gblamẹ ya?

Eyin pipli de ma tlẹ bẹ mẹsusu hẹn sọmọ, Klistiani de dona nọ gbeje whenu he e nọ yizan gọna nue ji mẹhe to pipli lọ mẹ lẹ nọ dọhodo lẹ pọ́n ganji. Mí ma dona nọ mọdọ mí to dandannu glọ nado na gblọndo wekanhlanmẹ lẹ tọn, mahopọnna nue ji yé dọhodo kavi whenu nẹmu he enẹ na yí to mí si. Paulu na avase Timoti gando mẹhe yin ‘mẹnudọtọ bo nọ dádo whẹho mẹdevo lẹ tọn mẹ’ lẹ go. (1 Tim. 5:13) To egbehe, mí gán wà nudopolọ whenue mí to nuhe nuyọnẹn wintinwintin detọ́n lẹ zan.

Kunnudetọ he whèwhín de ma nọ má kavi dotoaina homọdọdomẹgo depope kavi nudọnamẹ aṣli tọn lẹ gando yisenọ hatọ lẹ go. (Salm. 15:3; Howh. 20:19) Podọ, e nọ dapana linlin he nọ gbàhundonamẹ kavi dehe ma do dodonu lẹ. (Efe. 4:25) Na nugbo tọn, mí nọ mọ núdùdù gbigbọmẹ tọn susugege po nudọnamẹ agọe tọn he go yè gán dejido lẹ po yí to nọtẹn Intẹnẹt tọn mítọn jw.org ji, podọ gbọn tito sunmẹsunmẹ tọn lẹ gblamẹ to Televiziọn JW^® ji.

Kunnudetọ delẹ nọ yí wekanhlanmẹ he nọ yin didohlan gbọn nuyizan nuyọnẹn wintinwintin tọn gblamẹ lẹ zan nado sànú, họ̀nú, jla ajọ́nú lẹ kavi ze agbasazọ́n donukọnnamẹ. Whẹho ajọwiwa tọn wẹ ehelẹ yin bo ma yin tito yẹwhehọluduta tọn lẹ. Klistiani he jlo na nọgbẹ̀ “matin wanyina akuẹ” lẹ nọ dapana mẹtẹnpọn depope nado yí pipli mẹmẹsunnu lẹ tọn mítọn zan na yanwle ajọwiwa tọn lẹ.—Heb. 13:5.

Bọ etẹwẹ lo na nuhe dù aplikasiọn wekanhlanmẹ tọn lẹ yiyizan nado biọ akuẹ do yisenọ he to nuhudo mẹ lẹ tamẹ kavi nado na yé alọgọ kọgbọ tọn? Mí nọ saba do owanyi mẹtọnhopọn tọn hia eyin mí nọ gọalọ bosọ nọ na tuli ode awetọ. (Jak. 2:15, 16) Amọ́, tintẹnpọn nado wàmọ gbọn wekinkan hlan pipli he bẹ mẹsusu hẹn lẹ gblamẹ gán bẹpla tito he pọnte hugan he wekantẹn alahọ tọn kavi agun lọ to bibayi nado gọalọ lẹ. (1 Tim. 5:3, 4, 9, 10, 16) Na nugbo tọn, mẹdepope ma na jlo nado hẹn mẹlẹ lẹndọ emilẹ wẹ do azọngban vonọtaun lọ nado penukundo mẹmẹsunnu mítọn lẹ go.

Ojlo mítọn wẹ nado wà nue na hẹn gigo wá na Jiwheyẹwhe. (1 Kọl. 10:31) Enẹwutu, whenue a to nudide bayi nado yí aplikasiọn wekanhlanmẹ tọn de kavi nuyizan nuyọnẹn wintinwintin tọn devo zan, nọ lẹnnupọndo owù lọ lẹ ji bosọ nọ nọ̀ aṣeji.