Bakristu baguma bali bakolesa eteknolojiya ya zene omu kugenderera kuganira n’abantu b’emilala yabo n’abandi Bahamirizi ba Yehova. Aliko kweri Abakristu bakulire ekiroho bakwanene kugenderera kuyibuka linola hano: “Omuntu mwenge anabona obuhanya n’okuchibisha, aliko echihwinja chinagenderera embere n’okuhanyagala.”​—Mez. 27:12.

Rhusimire bwenene okubona oku Yehova alonzeze kurhulanga. Bobola, rhurhakwanene kuchiheba haguma n’abantu balerha olushombo, abachirwe omu chibaga, changwa abanalerha amawazo marhakwanene. (Ro. 16:17; 1 Ko. 5:11; 2 Yo. 10, 11) Bantu baguma bakaba bali omu chibaga, aliko eyi barhakenga amakanuni mali omu Biblia. (2 Ti. 2:20, 21) Rhukwanene kuyibuka echola amango yirhwachishoga abera. Aliko byakaba bikomere okuchishoga abera benja nka rhunaganira nabo kugerera am’aplikasiyo m’okurhumirana amamesaje konyine.

Ahanene kuli kw’akamaro okukenguka bwenene amango rhuli omu chigusho ch’okurhumirana amamesaje oku Enternete. Bakristu baguma bachihebere mw’ebyola bigusho, byanabalerhere ebintu bibi. Nka gurhe si mwene-werhu changwa mwali-werhu akaj’akenguka amango ali omu chigusho cha bantu kamama? Byakakomera okumenya bali bantu nyabachi, n’ehali y’ekiroho y’abola bantu boshi bali omu chigusho. Zaburi 26:4 ederhere ntya: “Ntachiheba haguma n’abalyalya, kandi inanchiyasa balala babisha oku bali.” Orhabwene ok’olula lwandiko lukuhanwire ok’okolese am’aplikasiyo m’okurhumirana amamesaje omu kuganira n’abantu ochimenyere woyo wenyine?

Chiro akaba okw’echigusho chili cha bantu bageke, Omukristu akwanene kugerereza akasanzi anamala omu kurhumirana amamesaje, na bantu nyabachi anaganira nabo. Rhurhakwanene kuyinja rhwachiyunva oku bihemere rhuleme rhwashubiza ku buli mesaje chiro akaba ederhere eju ya bichi changwa akasanzi byarhola. Paulo alihanwire Timoteo eju y’abantu bakayinjire “baveba abandi n’okuchiheba omu birhabalolere.” (1 Ti. 5:13) Zene, biyorohere okujira echintu chili nk’echola oku Enternete.

Nta Mukristu okulire ekiroho okwanene kuderha changwa kuyunviriza eby’obuhwinja, wala emyazi y’esiri elolere ababo Bakristu. (Zb. 15:3; Mez. 20:19) Binahemere aleke kushandaza emyazi evire yakabya changwa erhali y’okuli. (Efe. 4:25) Rhunapata myazi minene enihirwe eyumangire oku Biblia kugerera esite yerhu ye Enternete ya jw.org n’eprograme ya buli mwezi ya JW Télédiffusion.

Bahamirizi baguma banakolesa amamesaje oku Enternete omu kugula, okuguza, n’okuganira eju y’ebyabo by’obuchuruzi changwa kuha abantu akasi. Ebyola bili bya buchuruzi, si ntaho bibuganene n’emparamyo ya Yehova. Abakristu balonzeze “balekane n’okusima efuranga,” barhakolesa chiro n’ehityu bene-babo nka bikoleso byabo by’okupata furanga zinene.​—Ebr. 13:5.

Ka rhukwanene kukolesa am’aplikasiyo m’okurhumirana amamesaje omu kuhemera bene-berhu changwa bali-berhu efuranga bali omu bulagirire wala omu chinjira? Rhuzigire bene-berhu rhunabalagireko, che chirhumire rhunazigana kurhabala balala bali omu bulagirire n’okubaheba omurhima. (Yak. 2:15, 16) Aliko nka rhujirire ntyo kugerera echigusho ch’okurhumirana amamesaje, okola kwakavuruga emipango omurhabi gulolere eneo yabo changwa echibaga chabo charholere omu kubarhabala. (1 Ti. 5:3, 4, 9, 10, 16) Na ntaye n’omuguma mu rhwewe wakasima abandi bamubone nka yewe yibachishogere omu kushishikala entama za Mungu.

Rhuhigirire okujira ebyalerhera Mungu obukuze. (1 Ko. 10:31) Che chirhumire, amango rhwamachishoga okukolesa aplikasiyo y’okurhumirana emesaje changwa eyindi-yindi njira y’eteknolojiya, rhumenye obuhanya bwakarhengerera, rhunakenguke.