Hari inai nega ai Keristani taudia ese teknoloji idia gaukaralaia edia famili bona witnes turadia idia hereva henidia totona. To, lo Keristani tauna be inai sisiba do ia laloa: “Aonega tauna ese dika ia itaia noho, bona unai dika dekena amo ia raka siri, to aonega lasi tauna, be unai dika dekenai do ia raka lao, bona gabeai hisihisi do ia davaria.”​—Aon. 27:12.

Ita laloparara Iehova ia ura ita ia gimaia. Unai dainai ita ura lasi kongrigeisen idia hapararaia taudia, idia atoa siri taudia bona hereva momokani idia mogea taudia ita bamoa. (Roma 16:17; 1 Kor. 5:11; 2 Ioa. 10, 11) Kongrigeisen idia bamoa taudia haida be Baibel ena taravatu idia badinaia lasi. (2 Tim. 2:​20, 21) Tura matamatadia ita ura abia hidi neganai, unai gaudia ita laloa be namo. To intanet dekenai tura namodia ita abia hidi be auka. Meseij grup badana ta lalonai, tura namodia abia hidi totona ita naria namonamo be mai anina bada.

Keristani taudia haida be grup badadia haida lalonai idia vareai bona hekwakwanai idia davaria. Bema grup ta lalonai taunimanima handred o tausen idia noho, tadikaka o taihu ta be edena bamona do ia naria namonamo? Unai grup lalonai ibounai edia kara eiava edia abidadama ia goada o lasi be do ia diba lasi. Salamo 26:4 ia gwau: “Koikoi taudia danu lau helai noho lasi, bona kara maoromaoro koikoi taudia danu, be lau haboua tamona lasi.” Unai ese ia hahedinaraia aonega karana be ita diba taudia sibona dekenai meseij ita siaia.

Danu ena be grup be maragi to Keristani tauna be ena nega do ia haorea lasi bona do idia kikilaia gaudia dekenai do ia naria namonamo. Herevana idia kikilaia gauna be lata eiava kwadogi to ita be meseij ibounai do ita haerelaia lasi. Paulo ese Timoteo ia hamaoroa “idia udu mauri, ma haida edia mauri lalonai idia vara gaudia idia kikilaia” taudia dekenai do ia naria namonamo. (1 Tim. 5:13) Hari inai negai, teks meseij ita siaia lao mai neganai unai ia vara diba.

Lo Keristani tauna be ena tadikaka taihu dekenai idia gwauraia hadikaia herevadia eiava hehuni herevadia do ia kamonai o gwauraia lasi. (Sal. 15:3; Aon. 20:19) Sivarai koikoidia do ia dadaraia. (Efe. 4:25) Ita be jw.org websait bona hua ta ta ena JW Broadcasting^® amo Baibel ena hereva bona sivarai momokanidia ita abia.

Tadikaka taihu haida be intanet amo taunimanima haida dekenai moni gaukara eiava idia hoihoilaia kohu idia hahedinaraia. Unai be bisinesi karana bona Iehova tomadiho henia karana lasi. Keristani taudia be ‘moni idia ura henia dikadika lasi,’ unai dainai edia tadikaka taihu dekenai edia bisinesi do idia herevalaia lasi.​—Heb. 13:5.

Disasta o hekwakwanai ta ia vara dainai tadikaka taihu amo moni ita noia totona meseij ita siaia be maoro, a? Ita be nega ibounai mai lalokau ida ta ta ita durua bona hagoadaia. (Iam. 2:​15, 16) To grup badana dekenai moni noia totona meseij siaia karana ese brens ofesi o kongrigeisen ese ia hegaegaelaia dalana ia kohu diba. (1 Tim. 5:​3, 4, 9, 10, 16) Ita ura lasi haida do idia laloa brens ese ita ia abia hidi moni ita gogoa totona.

Ita ura Dirava ita hanamoa. (1 Kor. 10:31) Unai dainai bema ita ura teknoloji matamata ita gaukaralaia ena dika do ita laloa bona do ita naria namonamo.