Welche Yeehoowa sayn Tsayer penutse ti teknoloxii fer mit sayn familye un fer mit sayn priiter un xwestere fertseele. Awer, een rayfe krist erinert sich fon tiise aanreet: “Ti kluuch persoon siit te kefoer un ferxtekelt sich; awer ti unferninfticher keen foran un layte ti xtroof.” (Xpr. 27:12)

Meyer ferxteen tas Yeehoowa wil uns xitse. Tes weeche, keen mer net um mit tëne woo wole ti kemaynt teele, tëne woo tesasosiirt sin orer mit tëne woo ferkheerte aanunge uf rechne. (Rom. 16:17; 1 Kor. 5:11; 2 Yo. 10, 11) Un noch, welche woo in te fersamlunge keen, fiilaycht tuun net ti kesetse fon te Piipel aan heere. (2 Tim. 2:20, 21) Wën mer unser froynte raus suuche, hale mer tas in unser khop. Awer, es khan xweyer sin kuute froynte raus suuche wën mer mit tëne fertseele ploos torich pexeet aplikatiiwe.

Hauptseechlich wën mer am tenke sin in een kroos krup rin keen, sole mer uf phase mit weem mer um keen tuun. Welche kriste sin in kroose krupe rin kang, awer ti resultaate waare net kuut kewees. Wii khent eene pruuter orer xwester uf phase wën te krup hot hunerte orer tausente persoone trin? Es weyer unmeechlich se wise weer se wërklich sin un wii sin se kaystlich traan. Psalm 26:4 saat: “Ich keen net um mit hinerlistiche mëner, un hale mich wayt fon tëne woo ferxtekele was se sin.” Tiise tekst tsaycht tas es fiil kluucher is torich pexeet aplikatiive xpreche ploos mit layt woo mer khëne.

Soo kaar wën te krup fer pexeete xike kleen is, een krist praycht sich frooe: ‘Iwer was tuun ti layt in tiise krup fertseele? Wii fiil tsayt fertraype ich too?’ Meyer sole net tenke tas mer prayche yeete pexeet antworte, een tuun iwer was fer sache sin se orer wii lang tuun ti kexpreeche taure. Phaul hot Timoteus aan kesaat iwer layt woo teete ‘kwatx un xnepich sin in te anere sayn sache’. (1 Tim. 5:13) Hayt tsu taach, khene ti layt sich soo torich aplikatiiwe aan xtele.

Eene rayfe krist teet nii mools xlecht iwer anere priiter xpreche, un wën yemant tas macht, tuut eyer tas net horiche. Es kilt aach fer ti informatsyoone iwer ti priiter woo ti anere thërfe net wise. (Psal. 15:3; Xpr. 20:19) Tee halt sich aach wech fon kexichte woo ti layt rayse oone aks orer woo net pewayst wëre khene. (Ëfe. 4:25) Sicher, torich unser site jw.org un ti prokrame fon te JW Broadcasting^® yeete moonat, kriin mer fiil kaystlich esmitel un relatoorye woo ma truf traue khan.

Welche Yeehoowa sayn Tsayer penutse ti pexeet aplikatiiwe fer kexefte mache, fer se tsayche was se ferkhaafe orer fer aarwayt aan piite. Tiise sin kexefte sache un thërfe net rin kemext wëre in Yeehoowa sayn aanpeetung. Ti kriste woo wole ‘fray fon te liip tsum kelt sin’, tuun nii mools unser pruuterxaft penutse fer kelt kriin. (Hep. 13:5)

Awer, weyer es richtich ti pexeet aplikatiiwe penutse fer kelt ferlange fer unser priiter woo een neetichkheet layte orer woo hon een unklik mit kemacht? Meyer liipe unser priiter un meyer khimere uns mit tëne. Tes weeche, tuun mer eftas helfe un uf muute tii woo es prayche. (Tya. 2:15, 16) Awer fersuuche tas mache torich eene kroos pexeet krup khan in woerheet xteere was ti filyaal orer ti elteste xon am mache sin. (1 Tim. 5:3, 4, 9, 10, 16) Un kewis, meyer wole net ti anere tenke mache tas mer ti ekstra flicht kriit hon fer tiise priiter helfe.

Meyer wole mache was eer tsu Kot pringt. (1 Kor. 10:31) Tan, wëns tuu raus suuche tuust een pexeet aplikatiiw orer anere teknoloxii penutse, tenk aan te kefoore, un phas uf.