Ovakriste tjiva ve ungurisa oviungurisiwa vyouye wakandino okuhakaena ku nomaṱunḓu wawo nOvakriste ovakwao. Otjingaperi kutja, Omukriste ngu noupanga ouwa kuna Jehova me ripurire komambo nga: “Omunazondunge u muna oumba tji mau ya na ṱara; nu ingwi ngu hi nondjiviro u hita mu wo na kamunina po otjipo.”—Omiano 27:12.

Eṱe tu tjiwa kutja Jehova u vanga okututjevera. Kunao, katu kara pu novandu mbe eta ohaṋi, mba kondwa kombongo poo mbe tunduuza omahongero woposyo. (Rom. 16:17; 1 Kor. 5:11; 2 Joh. 10, 11) Ovakambure tjiva mombongo mape ya ave ha hupu otja komirari vyOmbeibela. (2 Tim. 2:20, 21) Indu tji matu toorora omapanga wetu, eṱe matu sokuripurira kotjiṋa ho. Okutoorora omapanga omawa mape ya a ku rire ouzeu, indu tji matu ungurisa oviungurisiwa vyouye wakandino okuhakaena kuna wo.

Ounanḓengu tjinene kweṱe okutoorora omapanga wetu nawa indu tji matu hindasana ozombuze movimbumba ovinene. Ovakriste tjiva va kara moumba mena rokukara norupa movimbumba mbyo. Nu hapo omukambure ma yenene vi okuritjevera, indu tje ri movimbumba mbi novandu omasere poo omayovi? Kaupupu okuvetjiwa avehe nokutja ve noupanga mbu ri vi kuna Jehova. Epsalme 26:4 mari tja: “Hi nehore novanavineya; nu kovanatjurutjutju hi ṱunu ko.” Iho matji raisa kutja onawa okuhindasana ozombuze kuna imba mbu matu tjiwa uriri.

Nandarire kutja tu hindasana ozombuze mokambumba okaṱiṱi, Omukriste auhe ma sokukengeza ohunga noruveze ndu ma ungurisa mokuhinda ozombuze, nokutja ovandu mokambumba ngo ve hungira ohunga nai ye. Eṱe katu sokumuna kutja matu sokuzira ozombuze azehe nḓa hindwa. Paulus wa rakiza Timoteus ohunga novandu ‘ovanazohukutu, nu mbe ritwa moviṋa, mbi he ri ovyawo.’ (1 Tim. 5:13) Ndino, oupupu okuhakaena ku novandu mbe ri nawo okupitira moviunguriswa vyomahakaeneno wouye wakandino.

Omukriste ngu noupanga ouwa kuna Jehova, kamaa handjaura poo okupuratena komambo omavi, poo oviṋa oviundikwa ohunga novakambure varwe. (Eps. 15:3; Omiano 20:19) Eye wina ma sokukara kokure noviṋa mbye hi nokutjiwa kutja ouatjiri. (Ef. 4:25) Eṱe tu nondjivisiro onyingi ndja zikamena kOmbeibela ndji ri korungovi rwetu ndwi jw.org ndji matu yenene okukara nongamburiro mo, na wina oprograma ndji o-JW Broadcasting^® ndji pita omueze auhe.

Ovakambure tjiva ve ungurisa oviungurisiwa vyomahakaeneno wouye wakandino okurandisa, okuranda, okutjivisa oviṋa mbi mave randisa poo okuyandja oviungura. Imbyo omiano vyokutjita ovimariva, nu kavi norupa nomerikotameneno ku Jehova. Ovakriste mbe kongorera erakiza ndi ‘kareye nokuhinoukorokope,’ kave ungurisa ovakambure ovakwao okutjita ovimariva.—Hebr. 13:5.

Hapo eṱe matu yenene okuungurisa oviungurisiwa mbyo okuningira ovimariva mbi mavi vatere ovakambure ovakwetu mbe nouhepe poo mba wirwa i oumba? Eṱe twa suvera ovakambure ovakwetu nu tu nonḓero mu wo, kunao tu kondja okuvevatera nokuvetunduuza. (Jak. 2:15, 16) Posi yokutja, okukondja okutjita nao okupitira movimbumba ovinene mbyo maku tjiti kutja irire ouzeu korutavi rwomberoo poo ombongo okuvevatera. (1 Tim. 5:3, 4, 9, 10, 16) Nu eṱe kamaatu vanga kutja ovandu ve ripure kutja, twa pewa omerizirira wapeke wokuvatera ovakambure ovakwetu.

Eṱe tu vanga okutjita imbi mbi mavi yandja ohiviro ku Mukuru. (1 Kor. 10:31) Kunao, indu tji mo toorora okuungurisa oviungurisiwa vyomahakaeneno wouye wakandino, ripura ohunga noumba mbu mape ya avi yeta nu u kengeze.