Sekeda orang Kristian ngena teknologi kemayaharitu ngambika ulih betanyaka rita diri sebilik sereta bala menyadi Kristian ke bukai. Tang, orang Kristian ti tegap ba pengarap deka ingatka jaku lalau tu: “Orang ke mereti deka meda penusah datai, lalu nyeliahka penusah nya, tang orang ke enda berunding deka tetempuhka penusah nya, lalu ngesalka nya.”—J-lam. 27:12.

Kitai nemu Jehovah deka nyaga kitai. Nya alai, kitai enda begulai enggau orang ke mai penyerekang, ke limpang ari pengarap, tauka mai penemu ti salah. (Rom. 16:17; 1 Kor. 5:11; 2 Jhn. 10, 11) Sekeda orang ba eklisia engka enda nitihka ajar Bup Kudus. (2 Tim. 2:20, 21) Kitai ingatka pekara tu, lebuh kitai milih bakih. Tang tu engka tusah dikereja enti kitai ngena aplikasi mesej.

Endang beguna enti kitai bejimat milih bakih lebuh ngena aplikasi mesej. Sekeda orang Kristian enggau raban mesej ti besai, lalu tu ngujungka asil ti enda manah. Baka ni menyadi Kristian ulih bejimat enti sema raban nya bisi beratus tauka beribu iku orang dalam nya? Kitai engka tusah deka ngelala sapa sida lalu sekalika sida bisi pengarap ti tegap tauka enda. Masmur 26:4 madahka: “Aku enda begulai enggau orang ke bula, lalu aku enggai begulai enggau orang ke pura-pura ngapa.” Tu nunjukka manah agi kitai bemesej enggau orang ti dikelala kitai.

Taja pan raban mesej nya mit, orang Kristian patut meresa awak sereta topik ti dikerandau ba raban nya. Kitai enggai ngasaika diri patut nyaut tiap iti mesej, enda ngira topik ti dikerandau tauka berapa lama dikena sida berandau pasal utai nya. Paul nangkan Timoti pasal orang ke “bejakuka orang, ngachau pengawa orang.” (1 Tim. 5:13) Kemayaharitu, pengawa ke baka tu senang dikereja ngena aplikasi elektronik.

Orang Kristian ti tegap ba pengarap enda nyebut tauka ninga berita ngapa tauka resia pasal bala menyadi Kristian ke bukai. (Mas. 15:3; J-lam. 20:19) Lalu iya enda nandu tauka ninga cherita ti dikelangkungka orang tauka cherita ti enda ditemu betul tauka enda. (Eps. 4:25) Kitai bisi mayuh penerang bekaul enggau Bup Kudus sereta riput ke ulih dipechaya ari laman jw.org sereta Berita JW ninting bulan.

Sekeda bala menyadi Kristian ngena aplikasi mesej kena nyual, meli, mandangka utai ke deka dijual tauka meri pengawa ngagai orang. Semua tu bekaul enggau pengawa dagang lalu nadai kaul enggau pengawa sembah ngagai Jehovah. Orang Kristian ke enggai angkunka duit enda ngambi ulih ari bala menyadi Kristian ke bukai ba pengawa dagang.—Heb. 13:5.

Kati kitai ulih ngena aplikasi mesej minta duit kena nulung menyadi Kristian ti begunaka bantu tauka ditinggang penusah? Kitai rinduka bala menyadi Kristian lalu ibuhka sida, nya alai kitai seruran deka nulung sida ti begunaka bantu tauka meransang sida. (Jas. 2:15, 16) Tang enti kitai ngena aplikasi mesej minta duit, tu engka ulih ngasuh pengawa pampang opis tauka eklisia tusah agi kena nulung sida. (1 Tim. 5:3, 4, 9, 10, 16) Lalu kitai mega enggai ngasuh orang ngumbai kitai bisi pengawa ti spesial lalu udah dipilih kena nyaga bala menyadi Kristian kitai.

Kitai deka ngereja semua utai ti ulih ngemuliaka Petara. (1 Kor. 10:31) Nya alai, lebuh deka ngaga pemutus sekalika deka ngena aplikasi mesej tauka teknologi bukai, berundingka empas iya lalu bejimat meh.