Usan na karuan nga Cristiano i moderno nga teknolohia tapenu makikomunika ta kafamilia anna kapangngurugda ira. Ngem mawag tu daddamman na manakam nga Cristiano yaw nga tabarang: “Masingan na masirib nga tolay i peligro anna mattagu yayya, ngem madderechu laman i awan tu ekspiriensana anna mazziga-riga yayya ta efekto natun.”​—Prov. 27:12.

Ammu tam nga kayà ittam nga protektan ni Jehova. Yayya nga manaki tam i makilallang turi ira ta mamassirina, ta nadisfellow ira, onu turi ira ta manuddu tu mali ira nga ideya. (Roma 16:17; 1 Cor. 5:11; 2 Juan 10, 11) Egga karuan ta kongregasion nga ariadda tuttuttulan i dorob na Biblia. (2 Tim. 2:20, 21) Daddammattam nakuan yatun nu mappili ittam tu pakikkofunattam. Marigatan ittam nga mappili tu mapia nga kokkofun nu puru messaging application laman i pakikomunika tam nira.

Mas nga magimmugug ittam ta pappili tu mapia nga kokkofun nu dakal onu aru i miembro na messaging group. Egga karuan nga Cristiano nga naj-join ira ta darakal nga group ngem marake i narresultanna. Kunnasi gare gapa nga makapagimmugug i tadday nga brother onu sister nu egga i magatu onu rinivu nga miembro na tadday nga group? Magga imposible nga mammuan i kurug nga kata-katolay anna i espiritualidad na ngamin nga miembro natun. Kagian na Salmo 26:4: “Ari ngà mevulu ta totolay ira nga awan tu kebilangad-da; ari ngà melivu-livu ta minaggappa-appe ira.” Mas masirib gafu nu i-message tam laman danuri kilala tam.

Maski ta baraddi nga messaging group, mawag lagapa nga usitakkan na tadday nga Cristiano nu piga nga oras i mofuna tatun anna nu anni i pabbiridadda tatun nga group. Ari ittam nakuan nga maobliga nga marreply mas ngana nu komforme i pabbiridadda onu aru nga tiempo i usadda ta pa-chat. Inabisowan ni Pablo si Timoteo meyannung ta totolay nga “chismosa anna minakki-alam ta pattolay na tanakuan.” (1 Tim. 5:13, NW) Mesimmu gapa yatun sangawe maski ta messaging application ira.

Ari nakuan nga makkagi onu magginna i tadday nga manakam nga Saksi ta maski anni nga kritisismo onu konfidensial nga informasion meyannung ta tanakuan nga Saksi. (Sal. 15:3; Prov. 20:19) Ibitana gapa nga ipakoli i istoria nga naamma-ammungan, kakkadda-kaddag, onu report ira nga ari mabba nga napakurug. (Efe. 4:25) Napakaru nga nebase-Biblia nga informasion anna mapattalakkan ira nga report i malawa tam ta website tam nga jw.org anna ta vinulan nga programa na JW Broadcasting^®.

Usan na karuan nga Saksi i messaging application tapenu mallaku, gumatang, mangi-promote tu produkto ira, onu mangiyofer tu trabahu ta totolay. Konektadu danatun ta negosio, ari tu ta paddayaw tam kani Jehova. Nu kayà na tadday nga Cristiano nga ‘iyarayyu i attolena ta pangaya ta kuartu,’ mawag tu lillitanna i maski anni nga tentasion nga usan i wawwaragi para ta negosio.​—Heb. 13:5.

Puede tam kari gapa nga usan i messaging application ira tapenu massolicit tu kuartu para ta wawwaragi nga magawag onu danuri nafektan na kalamidad? Siempre, iddukattam i wawwaragi tam, interesadu tam nira, anna maruddu nga kayà tam ira nga uffunan anna pagaramman. (Sant. 2:15, 16) Ngem nu kuattam danatun ta darakal nga messaging group, awayyana nga madaral natun i mas makasta ira nga unnug nga kukukuan na lokal nga panga nga ofisina onu na kongregasion. (1 Tim. 5:3, 4, 9, 10, 16) Magga awan tu maski sinni nittam i kayàna nga nonopan na totolay nga egga i espesial nga annunganna nga uffunan i wawwaragi.

Karagatattam nga kuan i makedayaw ta Dios. (1 Cor. 10:31) Yayya nga nu mangusa ittam tu messaging application onu tanakuan paga nga teknolohia, nonopattam nakuan i posible ira nga peligro natun anna magimmugug ittam.