Ācɛ Ocijali Ku Ujehofa ōhī gē bi ɔdā ō le gwo uwaya amāŋ ukɔmputa ku uwa, le kɔka mla ācɛ apɔlɛ ku uwa mɛmla Ācɛ Ocijali ɔhá duu. Amáŋ, Ɔcɛ O Yɛce Ukraist nōo jikoko géē bi ukɔ́ nyā ipu ɔtu nōo kahinii: “Ɔ̄cɛ ojéeyī géē má unwalu yɔ̄ ī wā, cɛ́ɛ́ ó kwú nyā ŋmá ɔwɛ ɔ́ɔmā. Amáŋ olíla ā, ī wā gɔɔ́gɔɔ́ í gwōtū ipú unwalu, cɛ́ɛ́ ó gbɔɔ́ ō hīíjémā igbihājɛ.”—Aíit. 27:12.

Ó wɛ ɔdā nōo jɛ alɔ eyī nɛhi ku Ujehofa dɔka ō gbo alɔ. Ohigbu ɛnyā, alɔ i gē piyatɔha mla ācɛ nōo gē bi ō kɔ wɛ ipu ujɔ, ācɛ néē je taajɛ ŋma ipu ujɔ, amāŋ ācɛ nōo gē nyila ɔka ɛkɛmgbɛ ŋ. (Uróm 16:17; 1 Ukɔ́r. 5:11; 2 Ujɔ́n. 10, 11) Ayinɛ amāŋ ku ācɛ ōhī nōo gē piyatɔha mla ujɔ a i lɔfu ya uce ɔwɛ okpaakpa ekoohi ŋ. (2 Utím. 2:20, 21) Alɔ bi ɛnyā ipu ɔtu, eko nɛ alɔ yɔ i fu ācɛ nōo géē wɛ ɔkpa ku alɔ. Gbɔbu ɛɛ ku alɔ fu aɔkpa olɔhi, i wɛ ku alɔ géē yɔ i kɔka mla uwa ɛga o kɔka piii gbɔbu ŋ.

Alɔ leyi kwɛɛcɛ ohigbu aoklobiya amāŋ ancɛnya nɛ alɔ gē lɛ a. Ācɛ O Yɛce Ukraist ōhī nōo gáā wɛ ipu ígwu alɛwa ɛga okɔka a, má ku ɔdobɔbi alɛwa bɛɛcɛ ŋma anu. Ɛgɛnyá nɛ a géē leyi kwɛɛcɛ fiyɛ, ɔdaŋ ku ígwu ku ācɛ nɛ a gē kɔka mla uwa a nwune nɛhi a? Ó gáā tɔɔtɛ ku alɔ jé āhɔ̄ ku oduudu ācɛ ɛga o kɔka gla ŋ. Ɔkpá ku Aíjē Kú Ɛ̄gbā ɛyi 26:4 kahinii: “Ń gē klá ɛga éyi tɔ̄há mla ācɛ o hɛ́ ācɛ lé ŋ́, ɛ́ɛ́ nɛ̄ n gē yɛ mla ācɛ ō yá obɔ̄bí mɛ́mla aóleyɛpa ŋ́.” Ɛnyā mafu ka ó wɛ ɔdā ijeeyi ō kɔka mla ācɛ nɛ alɔ jé a foofunu.

Ɔdaŋ ku ígwu ku ācɛ nɛ alɔ gē kɔka mla uwa i nwune ŋ naana, alɔ cika ō leyi kwɛɛcɛ ohigbu eko nɛ alɔ gē bi le kɔka mla ɔdā néē yɔ i kɛla lɛyikwu ɔ a. Alɔ i cika ō ta ohi ta umɛseji doodu, ɛgɛ duuma nɛ ɔdā néē yɔ i ka a kóō lɛ a ŋ. Upɔlu pi Utimoti ahɔ̄ lɛyikwu ācɛ ōhī nōo lɔfu “gē yúúwɔ́ɔkɔ, ge gwōtū ipú ɛlā kú ācɛ ɔhá” a. (1 Utím. 5:13) Icɛ, ó tɔɔtɛ ku alɔ ya ɔdā ekponu ɔɔma ō bu ipu ɔdā ō le gwo uwaya ku alɔ amāŋ ukɔmputa ku alɔ.

Ɔcɛ Ocijali Ku Ujehofa nōo jikoko i gáā kɛla amāŋ jahɔ tu ɛlā obɔbi ō ka, amāŋ ɔdā otayinu lɛyikwu Ɔcɛ Ocijali ɔhá ŋ. (Aíjē 15:3; Aíit. 20:19) Ó kē cika ō jahɔ tu ɔ̄kā obɔbi, amāŋ ɛlā nōó wɛ ɔkwɛyi ŋ. (Āfi. 4:25) Alɔ lɛ alɛwa ku aɛnɛɛnɛ ɛlā mla aɔka nōo ŋma ipu Ubáyíbu nɛ alɔ lɔfu kpɔtuce nōo yɔ ipu uwɛbsait ku jw.org ku alɔ, mla ōmiya ku JW Broadcasting^® ku ɔya doodu.

Ācɛ Ocijali Ku Ujehofa ōhī gē bi ɛga o kɔka le lá ɔla amāŋ je ɔla lá. É klla gē bi ɔ le dā ācɛ lɛyikwu ɔdā ɛpɛɛpɛ néē yɔ i je lá, amāŋ le je uklɔ lɛ ācɛ ɔhá. Ɛnyā wɛ ɔhi ō ta, ó kē lɛ ɔdā duuma ō ya mla ɛ̄gbā ō gba ku Ujehofa ŋ. Ācɛ O Yɛce Ukraist nōo dɔka ō lɛ iyi uwa “tū cíí ŋmá ihɔtū kú ije ō yá” a, i gáā ceyitikwu ya ije ŋma ɛgiyi ayinɛ uwa ŋ.—Uhíb. 13:5.

Alɔ cika ō bi ɛga ō kɔka le dɔka ije lɛ ayinɛ nɛ ɛgbá ce uwa, amāŋ ācɛ nɛ ɔdā amiya ya da uwa a? Alɔ yihɔtu ayinɛ alɔ nɛhi klla bi uwa ipu ɔtu, ohigbu ɛnyā, igbalɛwa alɔ gē je otabɔ lɛ ācɛ nɛ ɛgbá ce uwa klla gē ta uwa ɔtu kwu. (Ujɛ́m. 2:15, 16) Amáŋ, ō ceyitikwu ya ɛnyā ipu ɛga ō kɔka ku ígwu alɛwa, lɔfu ya kóō lɔnɔ lɛ abɔ ku ɛga ō yuklɔ ku alɔ amāŋ anyakwɔcɛ ku ujɔ kéē ta uwa abɔ. (1 Utím. 5:3, 4, 9, 10, 16) Alɔ i kē dɔka ku ācɛ kē gbɛla ka é fu uwɔ ku a leyi kwu ayinɛ ŋ.

Alɔ dɔka ō ya ɔdā nōo géē bi owoofu gē lɛ Ɔwɔico. (1 Ukɔ́r. 10:31) Ohigbu ɛnyā, ɔdaŋ ku a yɔ i miya ō bi ɔdā ō le gwo uwaya ku uwɔ, ukɔmputa amāŋ ɔdā ɔhá le yuklɔ, leyi yɛ unwalu nōo lɔfu bɛɛcɛ ŋma anu a, cɛɛ ku a leyi kwɛɛcɛ lɔɔlɔhi.