Us-usaren ti dadduma a Kristiano ti moderno a teknolohia tapno makikomunikarda kadagiti kapamilia ken kapammatianda. Nupay kasta, laglagipen ti Kristiano a nataengan iti naespirituan daytoy a balakad: “Makita ti masirib a tao ti peggad ket aglemmeng, ngem agdiretso latta ti awanan kapadasan ket agsagaba.”—Prov. 27:12.

Apresiarentayo ta kayatnatayo a protektaran ni Jehova. Gapu iti dayta, ditay makikadua kadagidiay mamagsisina, nailaksid, wenno mangiwarwaras kadagiti di umiso a sursuro. (Roma 16:17; 1 Cor. 5:11; 2 Juan 10, 11) Mabalin a saan a nadayaw ti kababalin ti dadduma a naitimpuyog iti kongregasion. (2 Tim. 2:20, 21) Dayta ti laglagipentayo no makigayyemtayo. Mabalin a saan a kaskarina ti panagpili iti nasayaat a kakadua no iti panagusar iti messaging application.

Nakapatpateg ti panagbalin a napili kadagiti pakikaduaan nangruna iti dadakkel a messaging group. Naki-join ti dadduma a Kristiano iti dadakkel a grupo, ket saan a nasayaat ti resulta dagita. Kasano a makapagannad ti maysa a kabsat no ginasut wenno rinibu pay ketdi ti miembro ti maysa a messaging group? Imposible a maammuanna ti agpayso a kinasiasino ken naespirituan a kasasaad ti amin nga adda iti grupo. Kuna ti Salmo 26:4: “Saanak a makikadua kadagiti naulbod a tattao, ken liklikak dagidiay mangilimed iti kinasiasinoda.” Saan kadi nga iparparegta dayta ti panangusar iti messaging application a pakikomunikar laeng kadagiti personal nga am-ammom?

Uray iti babbabassit a messaging group, masapul nga agannad latta ti maysa a Kristiano iti kaadu ti orasna iti dayta a grupo ken no ania ti mapagsasaritaan. Ditay koma marikna nga obligadotayo a sumungbat aniaman ti mapagsasaritaan wenno kasanoman kapaut ti pannaki-chat-da. Pinakdaaran ni Pablo ni Timoteo maipapan kadagiti ‘tsismosa ken mannakibiang iti biag ti sabsabali.’ (1 Tim. 5:13) Ita, posible a mapasamak met dayta iti elektroniko a pamay-an.

Ti Kristiano a nataengan iti naespirituan ket saan nga agkomento wenno dumngeg iti aniaman a panangkritikar wenno kompidensial nga impormasion maipapan kadagiti kapammatianna. (Sal. 15:3; Prov. 20:19) Liklikanna met dagiti makapakigtot wenno saan a kompirmado a report. (Efe. 4:25) Nagadu ti nasayaat ken naibatay-Biblia nga impormasion ken mapagtalkan a damag iti website-tayo a jw.org ken iti binulan a programa ti JW Broadcasting^®.

Us-usaren ti dadduma a Saksi ti electronic messaging tapno aglako, gumatang, ken agi-advertise iti produkto wenno agi-offer iti trabaho. Nakomersialan dagita a banag, ken awan koneksionda iti panagdaydayawtayo. Dagiti Kristiano a ‘saanda nga ay-ayaten ti kuarta’ dida pulos usaren ti panagkakabsattayo tapno makakuartada.—Heb. 13:5.

Masapul kadi nga usarentayo dagiti messaging application tapno dumawattayo iti kuarta para kadagiti kakabsat nga agkasapulan wenno biktima ti didigra? Masansan nga ipakitatayo ti ayat ken pannakaseknan babaen ti panagtitinnulong ken panagpipinnaregta. (Sant. 2:15, 16) Ngem no aramidentayo dayta babaen ti dakkel a messaging group, mabalin a maapektaran dagiti nasaysayaat nga urnos nga ar-aramiden ti sanga nga opisina wenno ti kongregasion. (1 Tim. 5:3, 4, 9, 10, 16) Sigurado a ditay kayat nga ipapan dagiti tattao a datayo ti naikkan iti espesial nga asaynment a mangasikaso kadagiti karnero ti Dios.

Dagiti pakaidayawan ti Dios ti kayattayo nga aramiden. (1 Cor. 10:31) No ngarud agusarka iti messaging application wenno dadduma pay a teknolohia, panunotem dagiti posible a peggad, ken agannadka.