Inievo jọ a rẹ rọ eware itanẹte sa-sa nọ i kieze lele ahwo uviuwou rai gbe inievo ukoko na ta ẹme. Dede na, Ileleikristi nọ i kruga ziezi a rẹ kareghẹhọ ohrẹ Ebaibol nana, inọ: “Ohwo nọ o wo areghẹ ọ rẹ ruẹ oware enwoma, o ve siomano, rekọ ogbori ọ rẹ nyaruọ ẹe, ọ vẹ reoja oware nọ u re noi ze.”​—Itẹ 27:12.

U woma gaga inọ Jihova ọ rẹ gwọlọ thọ omai ẹsikpobi. Oyejabọ nọ ọ rọ ta nọ ma du kuomagbe ahwo nọ a rẹ wha ohẹriẹ ze he na, te ahwo nọ a si no ukoko no hayo otu nọ o re wuhrẹ eware nọ e rrọ uzẹme he. (Rom 16:17; 1 Kọr. 5:11; 2 Jọn 10, 11) Makọ ahwo jọ nọ a rrọ ukoko na dede a sai wo uruemu nọ u woma tere he. (2 Tim. 2:20, 21) Fikiere, ma daoma rri ahwo otiọye na mu nọ ma te bi roro kpahe ahwo nọ ma re lele nyusu. Whaọ, ma sai rri ahwo otiọna mu hu nọ ma te bi lele ae ta ẹme evaọ itanẹte.

U wuzou gaga re ma roro kpahe oghẹrẹ ahwo nọ ma re mu usu kugbe, maero otẹrọnọ ahwo buobu a te jọ utu nọ ma rẹ jọ vi uwou se ohwohwo. Inievo jọ a wha uye se omarai no fiki utu utiona nọ a kuomagbe. Ẹme na họ, o te jọ bẹbẹ re oniọvo o rri otọ mu nọ ọ tẹ rrọ utu nọ ahwo buobu a rẹ jọ vi uwou se ohwohwo. Ọ te sae riẹ ahwo na jọ họ, gbe oghẹrẹ nọ a kruga te evaọ ukoko na. Olezi 26:4 o ta nọ: “Mẹ rẹ jọ kugbe ahwo eviẹhọ họ, yọ mẹ rẹ kẹnoma kẹ ahwo nọ a rẹ ko oghẹrẹ ohwo nọ a rrọ dhere.” Kọ onana u gbe dhesẹ nọ ahwo nọ ma riẹ te uwou ọvo ma re lele ta ẹme evaọ itanẹte ẹsikpobi?

Ahwo nọ a rrọ utu nọ a rẹ jọ vi uwou se ohwohwo evaọ itanẹte a gbẹ maki bu hu, Oleleikristi ọ sai roro kpahe oghẹrẹ eme nọ a be hai vi gbe oke nọ o be rehọ mi ei. O gbahọ nọ ma rẹ kpahe fihọ ẹme kpobi nọ a vi hi, hayo jọ oria evuẹ itanẹte na oke lelehie. Pọl ukọ na ọ vẹvẹ Timoti unu inọ ọ yọroma kpahe “iguiguẹgu . . . gbe enọ i re dhomahọ eme amọfa.” (1 Tim. 5:13) Kareghẹhọ nọ ohwo ọ sae jọ oguiguẹgu je dhomahọ eme amọfa evaọ itanẹte.

Oniọvo nọ o kruga evaọ ukoko na ọ rẹ poviẹ ibe Oleleikristi riẹ hẹ, yọ ọ rẹ ta ẹme nọ u fo nọ a rẹ ko dhere kpahe iẹe kẹ amọfa ha. (Ol. 15:3; Itẹ 20:19) Yọ o re vi iku nọ a brokpa họ hayo erọ a tanọ a tanọ se omọfa ha. (Ẹf. 4:25) Oria evuẹ itanẹte jw.org mai gbe omaa JW Broadcasting^® kamara kamara mai ma rẹ jọ gaviezọ kẹ iwuhrẹ Ọghẹnẹ gbe iyẹrẹ nọ ma rẹ sai fievahọ.

Inievo jọ a rẹ rọ eware itanẹte nana ghoro eki rai, zẹ eware, dẹ eware, je tube zizie ahwo kẹ iruo. A te ru enẹ yọ okọ rai a rrọ, orọnikọ iruẹru ukoko ho. Ma riẹ nọ Oleleikristi ọ rẹ whaha “uyoyou ugho,” fikiere ọ rẹ rọ ibe Ileleikristi riẹ kọ okọ họ.​—Hib. 13:5.

Kọ u fo re ma rọ eware itanẹte nana vuẹ amọfa nọ a rọ igho ze re ma ro fiobọhọ kẹ inievo nọ eware okpẹtu e via kẹ? Ginọ uzẹme inọ ma you ibe Ileleikristi mai, yọ ma rẹ gwọlọ fiobọhọ kẹ ae jẹ tuduhọ ae awọ nọ a te wo ebẹbẹ. (Jem. 2:15, 16) Rekọ ma tẹ be rọ oware itanẹte nọ a re ro vi uwou se ahwo buobu ru onana, o rẹ sai ru ei jọ bẹbẹ kẹ inievo ukoko rai hayo uwou ogha re a fiobọhọ. (1 Tim. 5:3, 4, 9, 10, 16) Yọ ma gwọlọ ru amọfa roro nọ a kẹ omai iruo jọ sa ha, nọ ma rẹ rọ rẹrote uthuru Ọghẹnẹ.

Ma gwọlọ ru oware nọ o rẹ wha orro se Jihova. (1 Kọr. 10:31) Fikiere nọ who te bi roro sọ who re kuomagbe utu jọ nọ ahwo a rẹ jọ vi uwou se ohwohwo evaọ itanẹte, kareghẹhọ ebẹbẹ nọ e rẹ sai noi ze re whọ jẹ yọroma gaga.