Hkristan nkau gaw, nta masha ni hte matut mahkai na matu, Sakse Hkam shada matut mahkai na matu, madang tsaw ai ladat hpaji ni hpe lang nga sai. Kunghpan ai Hkristan ni gaw ndai sadi jaw ga hpe hkan sa ai: “Myit su ai wa gaw, yubak lam hpe tau chye nna, koi kau nga ai; Nyan tang ai wa chyawm gaw, dingyang sa wa nna, ari hkrum nga ai.”​—Gsh 27:12.

Yehowa anhte hpe makawp maga ya ai majaw, grai chyeju dum ai. Dai majaw anhte gaw, shapraw da hkrum ai ni, myit bra hkra galaw ai ni, ntsen ai myit nga wa hkra galaw ai ni hte n kanawn ai. (Rom 16:17; 1 Ko 5:11; 2 Yh 10, 11) Nawku hpung hte kanawn mazum nga ai nkau gaw, kaja ai akyang lailen n madun ma ai. (2 Tm 2:20, 21) Kanawn manang lata ai shaloi, dai hpe anhte matsing da ra ai. App ni hku na tsun shaga ai shaloi grai sadi ra ai.

Laksan hku nna sadi ra na gaw, masha law law hte kalang ta matut mahkai na tsun shaga ai aten hta re. Hkristan nkau gaw, dai zawn galaw ai majaw, n kaja ai akyu ni lu wa ma ai. Arau matut mahkai ai hpung hta, masha tsa lam hku, hkying lam hku law taw yang gaw gara hku sadi lu na? Shanhte a wenyi lam, shanhte gaw kaning re ai masha re ai hpe n chye lu ai. Shakawn Kungdawn 26:4 hta ndai hku tsun da ai: “Matu nhpang n hten ai ni hte rau ngai n dung nngai, Hpyi hpun ai ni kaw, ngai n shang nngai.” Ndai Chyum daw hku nga yang, tinang hku hkau ai ni hte sha, laika sa ai, laika hkap la ai gaw hpaji rawng ai lam re.

Masha law law hte n rai yang pyi, aten kade daram lang ai, hpa lam ni tsun ai ngu ai hpe Hkristan ni sadi ra ai. Tsun shaga ai lam yawng hpe aten jaw na bai htang ra ai ngu, n hkamsha ging ai. “N mai tsun ai ga tsun nga ma ai hte, tinang hte n seng ai amu hta hkan bawk lawm” ai ni a lam Timohti hpe Pawlu sadi jaw wa ai. (1 Tm 5:13) Dai ni aten hta mung ladat hpaji hpe akyu jashawn nna, dai zawn masa nga wa chye ai.

Kung hpan ai lam n nga ai Hkristan ni gaw, shada da hpe mara tam ai ga (sh) n tsun ging ai lam ni hpe tsun wa chye ai. (Shk 15:3; Gsh 20:19) Ngut na shi gaw, kaga ni hpe mau mat shangun ai shiga ni, n teng ai shiga ni hpe mung tsun wa chye ai. (Ehp 4:25) Anhte hta shata shagu na JW TV lamang hte jw.org website ni kaw na, ra nga ai wenyi malu masha ni hpe hpring tup lu la nga ai.

Sakse hkam nkau gaw, electronic jak rai ni hku nna, rai dut ai, mari ai (sh) bungli saw shaga ai lam ni galaw ai. Dai lam ni gaw, hpaga bungli a matu re. Wenyi lam a matu n re. “Gumhpraw marin ai” hpe koi ai Hkristan ni gaw, hpaga lam a matu hpunau nauna ni hpe akyu jashawn na n re.​—Heb 13:5.

Hkye mawai bungli a matu, ra kadawn nga ai hpunau nauna ni hpe karum ya na matu, dai app ni hku nna alu gumhpraw hta ai gaw gara hku kun? Anhte gaw shada da n-gun jaw ai, karum ya ai hku nna tsawra myit madun ga ai. (Yak 2:15, 16) Raitim, dai zawn alu gumhpraw hta ai gaw, ginjaw garan run hte buga nawku hpung a lamang hpe dingbai dingna byin shangun chye ai. (1 Tm 5:3, 4, 9, 10, 16) Karai a sagu ni hpe yu lajang na matu, laksan lit ap da hkrum ai wa re ngu anhte kadai mung shadu hkrum mayu na n re.

Anhte yawng gaw Karai Kasang hpe shagrau mayu ga ai. (1 Ko 10:31) Dai majaw, laika sa ai, laika hkap la ai app ni hpe lang ai shaloi raitim, kaga jak rai ni hpe lang ai shaloi raitim, shoihpa nga shangun ai lam ni hpe myit yu nna sadi mat wa ga.