Aklĩsto amwe nĩmatũmĩaa tekinolongyi ya matukũ aa kũneena na andũ ma mũsyĩ kana Ngũsĩ ila ingĩ. Na vate nzika, Mũklĩsto ũla mũimu kĩ-veva nũlilikanaa ũtao ũũ: “Mũndũ wĩ kĩlĩko nĩwonaa ũthũku na kwĩvitha; ĩndĩ ala mate ũmanyi nĩmaendeeaa na kũthĩna.”—Nth. 27:12.

Nĩtwĩsĩ kana Yeova nĩwendete kũtũsũvĩa. Nũndũ wa ũu, tũitindanasya na andũ maetae mũaanĩko, ala atenge, kana ala mamanyĩasya ũvũngũ. (Alo. 16:17; 1 Ako. 5:11; 2 Yoa. 10, 11) O na ve amwe kĩkundinĩ matonya kwĩthĩwa mekaa maũndũ mate ma ndaĩa. (2 Tim. 2:20, 21) Kwoou nĩtũlilikanaa kĩu yĩla tũũnyuva anyanya. Ĩndĩ ti laisi kũnyuva anyanya maitũ nesa yĩla tũũtũmĩa vulongulamu sya kũtũmanĩa mesengyi.

Nĩ ũndũ wa vata mũno kwĩthĩwa twĩ metho ethĩwa twĩneena na kĩkundi kya anyanya kĩ na andũ aingĩ tũtũmĩĩte vulongulamu isu kana isese sya kũea ngewa. Aklĩsto amwe nĩmalikĩte mũisyonĩ nũndũ wa kũlika ikundinĩ isu. Na nengĩ, we nũkwona Mũklĩsto ta wĩsa kwĩsũvĩa ndakalike mũisyonĩ ethĩwa eea ngewa kana etũmanĩa mesengyi na kĩkundi kĩ na andũ maana na maana? Vate nzika, ndwĩsa kũmanya mwĩkalĩle wa kĩla ũmwe na ũndũ ngwatanĩo yake na Yeova ĩilye. Ĩandĩko ya Savuli 26:4 yaĩtye: “Ndyaaĩkalan’ya na andũ ma ũvũngũ; o na ndikaatĩanĩa na akengani.” Wasũanĩa ĩandĩko yĩu, we ndũkwona ta ũndũ wa ũĩ kũeaa ngewa kana kũtũmanĩaa mesengyi na andũ ala wĩsĩ nesa?

O na yĩla Mũklĩsto ũkũtũmanĩa mesengyi na kakundi kanini ka andũ, nĩwaĩle kũsũanĩa nĩ ĩvinda yĩana ata ũkũtũmĩa na naaũ me kakundinĩ kau. Tũyaĩle kwonaa ta twaĩle kũsũngĩaa mesengyi syonthe ila twatũmĩwa o na syĩthĩwe syĩneenea kyaũ kana twĩkua ĩvinda yĩana ata. Vaulo eeie Timotheo esũvĩane na andũ ala mendete “kũsukana na kwĩlikya maũndũnĩ ma andũ angĩ.” (1 Tim. 5:13) Ũmũnthĩ mũndũ no alike maũndũnĩ asu atũmĩĩte vulongulamu na isese isu.

Vai Mũklĩsto mũimu kĩ-veva wenda kũweta kana kwĩthukĩĩsya ndeto sya kĩvũthya iũneenwa ĩũlũ wa Aklĩsto ala angĩ; o na ndenda kũweta kana kwĩthukĩĩsya maũndũ ma kĩmbithĩ ma ana-a-asa ala angĩ. (Sav. 15:3; Nth. 20:19) O na atataa vyũ evathane na maũvoo mongeleelwe mautĩĩo kana mate maĩkĩĩthye. (Aev. 4:25) Kwa w’o, tũkwataa lĩu mwingĩ wa kĩ-veva na maũvoo maĩkĩĩthye vyũ kwĩsĩla jw.org na vitio sya kĩla mwei sya JW Broadcasting^®.

Aklĩsto amwe nĩmatũmĩaa vulongulamu na isese isu kũthoosya, kũũa, na kũtangaasĩthya syĩndũ, kana kũtangaasa wĩa. Ĩndĩ asu nĩ maũndũ ma viasala, ti ma ũthaithi. Aklĩsto ala mesiĩĩaa maikethĩwe na “wendi wa mbesa,” nĩmatataa mũno maikatũmĩe ana-a-asa moo kũmantha mbesa.—Aevl. 13:5.

Nao nata ĩũlũ wa kũtũmĩa vulongulamu isu kũseũvya ikundi sya kũsangĩthya mbesa sya kũtetheesya ana-a-asa me na thĩna kana ala makwatwa nĩ mĩisyo? Nĩtwendete ana-a-asa maitũ mũno, na kwoou nĩtũmatetheeasya yĩla makwatwa nĩ thĩna na nĩtũmekĩaa vinya. (Yak. 2:15, 16) Ĩndĩ kũtũmĩa ikundi isu kwĩka maũndũ asu, no kũvĩngĩĩse mĩvango mĩseo ĩla yĩkĩtwe nĩ ovisi wa ũvonge kana nĩ kĩkundi. (1 Tim. 5:3, 4, 9, 10, 16) Na vate nzika, vai ũmwe witũ wenda andũ aangĩ mambĩĩe kũsũanĩa ta tũnengetwe wĩa wa mwanya wa kũtetheesya malondu ma Ngai.

Ithyĩ twendete kwĩka maũndũ kwondũ wa kũmũtaĩa Ngai. (1 Ako. 10:31) Kwoou yĩla watw’a kũtũmĩa vulongulamu sya kũtũmanĩa mesengyi kana isese ingĩ ta isu, amba kũsũanĩa mĩisyo ĩla ĩtonya kumĩla na ũyĩsũvĩa mũno.