Krɩstʋ ñɩma nabɛyɛ lakɩnɩ tʋmɩyɛ sɔnɔ sɔnɔ lɛɣtʋ ñɩnʋʋ wondu nɛ pa nɛ pɔ-hɔʋ taa ñɩma nɛ koobiya lalaa pɔyɔɔdʋʋnɩ ɖama. Ɛlɛ, Krɩstʋ tʋ weyi ɛpɩ fezuu taa yɔ, ɛɛsɔʋ lɔŋ tasʋʋ pʋnɛ pɩ-yɔɔ: “Ɛyʋ lɔŋ tʋ naɣ kʋñɔŋ nɛ ɛmɛlɩɣ, ɛlɛ kɩmɛlɛmɩŋ ɖɛɣ nɛ ikpiɖiɣ.”—Adu. 27:12.

Pɩkɛdɩnɩ-ɖʋ se Yehowa sɔɔlaa se ɛkandɩyɩ ɖɔ-yɔɔ. Pʋyɔɔ lɛ, ɖa nɛ mba pɔkɔŋnɩ tayʋʋ ɛyaa taa yɔ, mba palɩzɩ-wɛ ɛgbɛyɛ taa yɔ, nɛ mba posusuu cɛtɩm wɩlɩtʋ yɔ, ɖɩɩɖʋʋ taabalɩyɛ. (Roma 16:17; 1 Kɔr. 5:11; 2 Yoh. 10, 11) Ɛyaa nabɛyɛ pɩzɩɣ nɛ pɛwɛɛ ɛgbɛyɛ taa, ɛlɛ paaɖɔŋ Bibl paɣtʋ yɔɔ. (2 Tim. 2:20, 21) Alɩwaatʋ ndʋ ɖɩlɩzɩɣ ɖa-taabalaa yɔ, tɔm ndʋ tɩwɛɣ ɖa-ñʋʋ taa. Pɩpɩzɩɣ nɛ pɩɩwɛɣ-ɖʋ kɛlɛʋ ye application waa mba pamaɣnɩ message waa yɔ pɔ-yɔɔ ɖɩtɩŋɩɣna se ɖɩlɩzɩ-wɛ yɔ.

Ye ña nɛ ɛyaa sakɩyɛ ɩkpɛndaa nɛ ɩmaɣ ɖama message waa yɔ, pɩcɛyɩ siŋŋ se ŋkpa ña-tɩ alɩwaatʋ ndʋ ŋlɩzɩɣ taabalaa pɛ-hɛkʋ taa yɔ. Krɩstʋ ñɩma nabɛyɛ nɛ ɛyaa sakɩyɛ pɛkpɛndɩ mbʋ nɛ petiyiɣni ɖama message waa lɛ, pɩkɔnɩ-wɛ kaɖɛ. Ɛzɩma koobu nɔɔyʋ pɩzɩɣ nɛ ɛkpa ɛ-tɩ ye ɛyaa mba ɛ nɛ wɛ pɛkpɛndaa nɛ petiyiɣni ɖama message waa yɔ, patalɩ mɩnɩŋ sakɩyɛ yaa kudokiŋ sakɩyɛ yɔ? Koobu ɛnʋ, ɛɛkaɣ pɩzʋʋ nɛ ɛtɩlɩ ɛyaa mba ɛ nɛ wɛ pɛkpɛndaa nɛ pamaɣ ɖama message waa yɔ patɩŋa camɩyɛ nɛ fezuu taa wɛtʋ ndʋ pɛwɛna yɔ. Keɣa 25:4 yɔɔdʋʋ se: “Ma nɛ cɛtɩm tɩnaa ɖɩɩcakɩ, maawoki tɛɛ nɛ pɩ-yɔɔ tʋ tɛ.” Mayaɣ ŋga kawɩlɩɣ se pɩkɛɣnɩ lɔŋsɩnɖɛ se ɖɩlabɩnɩ tʋmɩyɛ application waa mba pamaɣnɩ message waa nɛ ɖɩyɔɔdɩnɩ ɛyaa mba ɖɩsɩm-wɛ camɩyɛ yɔ pe-ɖeke.

Paa ɛyaa mba ɖa nɛ wɛ ɖɩkpɛndaa nɛ ɖɩmaɣ ɖama message waa yɔ, patɩɖɔɔ yɔ, pɩcɛyaa se ɖɩmaɣzɩ alɩwaatʋ ɛzɩma pɩkpakɩɣ-ɖʋ yɔ nɛ mbʋ pɩ-tɔm ɖɩyɔɔdʋʋ message waa mba pa-taa yɔ pɩ-yɔɔ. Pɩfɛyɩ se ɖɩmaɣzɩ se pɩpɔzʋʋ se ɖicosi message waa yɔɔ paa ɛbɛ tɔm patɩɩyɔɔdʋʋ yaa alɩwaatʋ ɛzɩma pakpakɩɣ-ɖʋ yɔ. Pɔɔlɩ paɣ Timootee se ɛkpa ɛ-tɩ nɛ ɛyaa mba “pacakɩ yem nɛ paalakɩ tʋmɩyɛ naɖɩyɛ, ɛlɛ pɔyɔɔdʋʋ ɖɔɖɔ ɛyaa tɔm nɛ paɖʋʋ pɔ-nɔsɩ lalaa tɔm taa” yɔ. (1 Tim. 5:13) Sɔnɔ, ɖa ɖɔɖɔ ɖɩpɩzɩɣ ɖɩtɩŋnɩ application waa mba pamaɣnɩ message waa yɔ pɔ-yɔɔ nɛ ɖɩla mbʋ ɖɔɖɔ.

Krɩstʋ tʋ weyi ɛpɩ fezuu taa yɔ, ɛɛkaɣ maʋ yaa ɛɛkaɣ welisuu e-koobiya Krɩstʋ ñɩma yɔɔ tɔm kɩdɛkɛdɩtʋ yaa pɔ-yɔɔ mɛsaɣ tɛɛ tɔm. (Keɣa 14:3; Adu. 20:19) Yaa eetiyiɣna nɛ eewelisiɣ ɖɔɖɔ tɔm ndʋ tɩɩkɛdɩɣnɩ lalaa yaa tɔm ndʋ ɛ-maɣmaɣ etiɖiɣzina se tɩkɛ toovenim yaa cɛtɩm tɔm yɔ. (Efɛz. 4:25) Fezuu taa tɔɔnaɣ sakɩyɛ nɛ tɔm kɩfatʋ ndʋ ɖɩpɩzɩɣ nɛ ɖɩtaa liu yɔ, tɩwɛ ɖɛ-tɛ intɛrnɛɛtɩ lone jw.org yɔɔ nɛ JW Tɔm Ðɩyɔɔdɩyɛ^® yɔɔ ɖʋtʋ ndʋ palakɩ paa fenaɣ ŋga yɔ tɩ-taa.

Koobiya nabɛyɛ tɩŋɩɣnɩ application waa mba pamaɣnɩ message waa yɔ pɔ-yɔɔ nɛ pɛpɛdɩɣ, payakɩ yaa peheyiɣ ɛyaa wondu ndʋ pɛpɛdɩɣ yɔ tɩ-tɔm yaa pañɩnɩɣ lalaa tʋma. Lakasɩ nzɩ sɩkɛ tadɩyɛ, nɛ siitukuuni Yehowa sɛtʋ paa ññɩɩ. Krɩstʋ ñɩma mba patɩsɔɔlɩ se ‘pɛwɛɛnɩ liidiye sɔɔlɩm’ yɔ, paañakɩ pana se palabɩnɩ tʋmɩyɛ po-koobiya nɛ pehiɣ liidiye.—Ebr. 13:5.

Ɛzɩ pɩwɛɛ se ɖɩtɩŋnɩ application waa mba pamaɣnɩ message waa yɔ pɔ-yɔɔ nɛ ɖɩpɔzɩ se lalaa ɩha liidiye nɛ pasɩnɩ koobiya mba pɛwɛ kɩcɛyɩm taa yaa asɛyʋʋ nakʋyʋ talɩ-wɛ yɔ? Ðɩsɔɔlɩ ɖo-koobiya nɛ ɖɩmaɣzɩɣ pɔ-yɔɔ, nɛ pʋyɔɔ lɛ, ɖoŋ ɖoŋ lɛ, ɖɩsɩɣnɩ mba pɛwɛ kɩcɛyɩm taa yɔ nɛ ɖɩkpazɩɣ-wɛ ɖoŋ. (Yak. 2:15, 16) Ɛlɛ ye ɖa nɛ ɛyaa sakɩyɛ, ɖɩkpɛndaa nɛ ɖɩmaɣ ɖama message waa nɛ ɖɩtɩŋɩɣnɩ pɩ-yɔɔ se ɖɩla mbʋ yɔ, pɩpɩzɩɣ nɛ pɩwɛɛ kaɖɛ Ɛgbɛyɛ piliŋa ŋga kɔcɔŋnɩ ɛjaɖɛ nɖɩ ɖɩ-taa ɖɩwɛɛ yɔ ɖɩ-yɔɔ yaa ɖɛ-ɛgbɛyɛ se ɖɩsɩnɩ koobiya mba. (1 Tim. 5:3, 4, 9, 10, 16) Nɛ pɩtʋʋ fɛyɩ se ɖa-taa nɔɔyʋ tɩsɔɔlɩ se eyele nɛ lalaa maɣzɩ se paɖʋ-ɩ ŋgee tʋmɩyɛ naɖɩyɛ se ɛcɔnɩ koobiya yɔɔ.

Ðɩsɔɔlaa se ɖɩla mbʋ pɩɖʋʋ Ɛsɔ hɩɖɛ yɔ. (1 Kɔr. 10:31) Ye mbʋ, ŋŋkpakɩɣ lɩmaɣza se ŋlakɩnɩ tʋmɩyɛ application waa mba petiyiɣni message waa yɔ pa-taa nakʋyʋ yaa lɛɣtʋ ñɩnʋʋ wonuu nakʋyʋ yaa ŋŋlakɩna lɛ, maɣzɩ camɩyɛ nɛ ŋna kala wena ŋpɩzɩɣ nɛ ŋkatɩ yɔ, nɛ ŋkpa ña-tɩ.