Alguns irmon ta uza tekinolojia pa pâpia ku ses família i ku otus irmon. Má un kriston maduru debe lenbra sénpri di kel konsedju li: ‘Un algen prudenti ta odja prigu i el ta sukundi, má kes ki ka ten spiriénsa ta kontinua ta bai i es ta kai na prublémas.’ — Pro. 27:12.

Nu sabe ma Jeová krê proteje-nu. Pur isu, nu ka ta kolega ku kes algen ki ta kria divizon, ki sta dizasosiadu ô ki ta spadja ensinus ki ka sta di akordu ku Bíblia. (Rom. 16:17; 1 Cor. 5:11; 2 João 10, 11) Tanbê alguns algen ki ta bai runion, talvês ka ta obi ku leis di Jeová. (2 Tim. 2:20, 21) Nu ka debe skese di kel-li óras ki nu ta skodje amigus. I pode ser difísil skodje bons amigu si nu ta pâpia ku es sô através di aplikativus di manda mensájen.

É más inportanti inda nu toma kuidadu óras ki un grupu di manda mensájen é grandi. Alguns ki entra na kes tipu di grupu li tevi mau rezultadu. Na un grupu ku senténas ô ti milharis di algen, ta sérba inposível konxe kada un di es i sabe modi ki ses amizadi ku Jeová sta. Bu ta atxa ma un algen ki ta faze párti di un grupu sima kel-li sta toma kuidadu? Salmo 26:4 ta fla: ‘N ka ta konvive ku ómis mintirozu, N ta ivita kes ki ta sukundi kel ki es é.’ Kel testu li ta mostra ma ta sérba mutu más midjór si nu manda mensájen sô pa kes algen ki nu konxe dretu.

Sikrê kel grupu di manda mensájen é pikinoti, un kriston meste pergunta se kabésa: ‘Sobri kuzê ki algen di es grupu sta ta pâpia? Kantu ténpu ki N sta ta gasta ku kel-li?’ Kes mensájen li ta pâpia di txeu asuntu. Má bu ka meste xinti obrigadu na partisipa na kada un di es. Polu aviza Timótiu sobri kes algen ki ta ‘pâpia dimás’ i ki ‘ta mete na asuntus di otus algen’. (1 Tim. 5:13) Mésmu kuza pode kontise oji através di aplikativu di manda mensájen.

Ninhun kriston maduru ka ta obi ô pâpia mal di otu irmon ô pâpia di asuntus sobri kel irmon ki otus algen ka debe sabe. I nen el ka ta obi kes kuza li. (Sal. 15:3; Pro. 20:19) Tanbê el ka ta fika ta pâpia ô ta ripiti kes stória izajeradu ô ki ka sta konfirmadu. (Efé. 4:25) Nu ten sertéza ma nos site jw.org i kes prugrama ki ta sai tudu mês di JW Broadcasting^® sta xeiu di bons informason sobri Bíblia i di rilatórius atualizadu.

Alguns irmon ta kustuma uza aplikativus di manda mensájen, pa oferese trabadju, pa bende, kunpra i pâpia di kuzas ki es sta ta bende. Kes kuza li é asuntu di nogósiu i es ka ten nada aver ku nos adorason pa Jeová. Un kriston ki krê fika livri di ‘amor pa dinheru’ nunka ka ta uza se irmons pa tenta ganha dinheru. — Heb. 13:5.

Ten otus irmon ki ta uza aplikativus di manda mensájen pa pidi dinheru pa djuda kes irmon ki sta pasa nisisidadi ô ki sta sufri pamodi dizastri na naturéza. Má nu debe faze kel-li? Nu ta ama nos irmons i nu krê djuda-s óras ki es meste. (Tia. 2:15, 16) Má si nu tenta faze kel-li através di kes grupu grandi di manda mensájen, na verdadi nu sta trapadja kuzê ki Filial ô ki kongregasons sta faze pa djuda kes irmon. (1 Tim. 5:3, 4, 9, 10, 16) I di sertéza nu ka krê pa otus algen pensa ma nu diziginadu pa djuda kes irmon.

Nu krê faze kel ki ta da glória pa Jeová. (1 Cor. 10:31) Pur isu, óras ki nu ta uza aplikativus di manda mensájen ô otu tekinolojia nu debe pensa na kes prigu i toma kuidadu.