សំណួរពីអ្នកអាន
ហេតុអ្វីគ្រិស្តសាសនិកគួរប្រុងប្រយ័ត្នចំពោះការប្រើកម្មវិធីផ្ញើសារក្នុងគ្រឿងអេឡិចត្រូនិក?
គ្រិស្តសាសនិកខ្លះប្រើបច្ចេកវិទ្យាទំនើបដើម្បីទាក់ទងជាមួយក្រុមគ្រួសារនិងបងប្អូនរួមជំនឿ។ គ្រិស្តសាសនិកដែលមានភាពចាស់ទុំនឹងចងចាំអំពីយោបល់នេះដែលថា៖ «មនុស្សដែលមានគំនិតឆ្លៀវឆ្លាត គេឃើញការអាក្រក់មក ក៏ពួនខ្លួន តែមនុស្សល្ងង់ខ្លៅ គេចេះតែដើរទៅ ហើយក៏ត្រូវមានទុក្ខ»។—សុភ. ២៧:១២
យើងយល់ថាព្រះយេហូវ៉ាចង់ការពារយើង។ ដូច្នេះ យើងមិនសេពគប់ពួកអ្នកដែលបណ្ដាលឲ្យបែកបាក់គ្នា អ្នកដែលបានត្រូវបណ្ដាច់មិត្តភាព ឬអ្នកដែលបង្រៀនអ្វីខុសទេ។ (រ៉ូម ១៦:១៧; ១កូ. ៥:១១; ២យ៉ូន. ១០, ១១) បងប្អូនខ្លះឬបុគ្គលខ្លះដែលសេពគប់ជាមួយក្រុមជំនុំប្រហែលជាមិនធ្វើតាមច្បាប់ក្នុងគម្ពីរឡើយ។ (២ធី. ២:២០, ២១) យើងចងចាំអំពីចំណុចនេះពេលយើងជ្រើសរើសមិត្តភក្ដិ។ ប៉ុន្តែយើងប្រហែលជាពិបាកជ្រើសរើសមិត្តភក្ដិល្អ តាមកម្មវិធីផ្ញើសារ។
បើយើងកំពុងគិតអំពីការប្រើកម្មវិធីផ្ញើសារជាក្រុមធំឬយ៉ាងណា យើងគួរពិចារណាយ៉ាងដិតដល់អំពីអ្នកណាដែលយើងនឹងសេពគប់ជាមួយ។ គ្រិស្តសាសនិកខ្លះធ្លាប់ចូលរួមក្នុងក្រុមផ្ញើសារដែលមានគ្នាច្រើន ហើយទទួលលទ្ធផលមិនល្អ។ តើបងប្អូនណាម្នាក់អាចប្រុងប្រយ័ត្នក្នុងក្រុមផ្ញើសារដែលមានគ្នារាប់រយឬរាប់ពាន់នាក់យ៉ាងដូចម្ដេច? គ្មានវិធីឲ្យដឹងថាអស់អ្នកដែលនៅក្នុងក្រុមនោះជាមនុស្សបែបណា ឬមានជំនឿរឹងមាំប៉ុណ្ណាឡើយ។ ទំនុកតម្កើង ២៦:៤ ចែងថា៖ «ទូលបង្គំមិនបានអង្គុយរួមជាមួយនឹងមនុស្សភូតភរឡើយ ក៏មិនបានសមាគមជាមួយនឹងមនុស្សមានពុតដែរ»។ នេះបង្ហាញថាគឺជាការឈ្លាសវៃឲ្យផ្ញើសារតែជាមួយមនុស្សដែលយើងស្គាល់ប៉ុណ្ណោះ មែនទេ?
ទោះជាគ្រិស្តសាសនិកណាម្នាក់ផ្ញើសារក្នុងក្រុមតូចជាងក្ដី គាត់ត្រូវគិតអំពីរយៈពេលដែលគាត់ចំណាយ និងប្រធានបទដែលបានត្រូវលើកឡើងក្នុងក្រុមនោះ។ យើងមិនចាំបាច់មានអារម្មណ៍ថាយើងត្រូវផ្ញើសារតបនឹងអ្នកឯទៀត ចំពោះរឿងទាំងអស់ដែលគេនិយាយ ឬចំពោះអ្វីដែលនាំឲ្យយើងខាតពេលទេ។ ប៉ូលបានព្រមានធីម៉ូថេអំពីបុគ្គលដែល«និយាយដើមគេហើយជ្រៀតជ្រែកក្នុងរឿងអ្នកដទៃ»។ (១ធី. ៥:១៣) សព្វថ្ងៃនេះ នេះក៏អាចកើតឡើងតាមកម្មវិធីផ្ញើសារក្នុងគ្រឿងអេឡិចត្រូនិកដែរ។
គ្រិស្តសាសនិកដែលមានភាពចាស់ទុំនឹងមិនប្រាប់ឬស្ដាប់ពាក្យរិះគន់ ឬរឿងសម្ងាត់អំពីគ្រិស្តសាសនិកឯទៀតទេ។ (ទំនុក. ១៥:៣; សុភ. ២០:១៩) ម្យ៉ាងទៀត គាត់មិនប្រាប់តឬស្ដាប់រឿងដែលគាត់មិនដឹងច្បាស់ ឬរឿងដែលគេនិយាយពន្លើសឡើយ។ (អេភ. ៤:២៥) យើងមានព័ត៌មានល្អៗជាច្រើនដែលមានមូលដ្ឋានលើគម្ពីរ និងសេចក្ដីរាយការណ៍ដែលយើងអាចទុកចិត្តបាននៅក្នុងគេហទំព័ររបស់យើងjw.org និងក្នុងកម្មវិធីប្រចាំខែនៅJWទូរទស្សន៍។
សាក្សីខ្លះប្រើកម្មវិធីផ្ញើសារក្នុងគ្រឿងអេឡិចត្រូនិកដើម្បីទិញ លក់ និងផ្សព្វផ្សាយផលិតផល ឬជ្រើសរើសបុគ្គលិកការងារ។ អ្វីទាំងនេះត្រូវបែងចែកឲ្យដាច់ពីការគោរពប្រណិប័តន៍របស់យើង។ គ្រិស្តសាសនិកដែលចង់«ប្រាសចាកការស្រឡាញ់ប្រាក់» មិនប្រើប្រាស់បងប្អូនធ្វើជាវិធីដើម្បីរកលុយឡើយ។—ហេ. ១៣:៥
តើយើងគួរប្រើកម្មវិធីផ្ញើសារក្នុងគ្រឿងអេឡិចត្រូនិកដើម្បីសុំជំនួយជាលុយកាក់ឲ្យបងប្អូនដែលខ្វះខាត ឬបងប្អូនដែលរងទុក្ខដោយសារមហន្តរាយឬទេ? យើងស្រឡាញ់បងប្អូនរបស់យើង ហើយយកចិត្តទុកដាក់ចំពោះពួកគេ ដូច្នេះយើងច្រើនតែជួយពួកអ្នកដែលត្រូវការជំនួយ និងលើកទឹកចិត្តពួកគេ។ (យ៉ា. ២:១៥, ១៦) ប៉ុន្តែការព្យាយាមធ្វើដូច្នេះតាមរយៈការផ្ញើសារជាក្រុមធំប្រហែលជាធ្វើឲ្យការិយាល័យសាខាឬក្រុមជំនុំកាន់តែពិបាកក្នុងការជួយពួកអ្នកទាំងនោះ។ (១ធី. ៥:៣, ៤, ៩, ១០, ១៦) ម្យ៉ាងវិញទៀត យើងម្នាក់ៗច្បាស់ជាមិនចង់ឲ្យអ្នកឯទៀតគិតថា យើងជាអ្នកដែលបានត្រូវជ្រើសរើសជាពិសេសដើម្បីឲ្យមើលថែបងប្អូនទេ។
យើងចង់ធ្វើអ្វីដែលនឹងនាំឲ្យព្រះទទួលការសរសើរតម្កើង។ (១កូ. ១០:៣១) ដូច្នេះ ពេលអ្នកសម្រេចចិត្តថាគួរឬមិនគួរប្រើកម្មវិធីផ្ញើសារក្នុងគ្រឿងអេឡិចត្រូនិកឬបច្ចេកវិទ្យាផ្សេងទៀត សូមគិតអំពីផលវិបាក ហើយសូមប្រុងប្រយ័ត្ន។
លោកអ្នកក៏ប្រហែលជាចូលចិត្តដែរ
ទស្សនាវដ្ដី
សំណួរពីអ្នកអាន ខែកក្កដា ឆ្នាំ២០២២
ទស្សនាវដ្ដី
សំណួរពីអ្នកអាន ខែមេសា ឆ្នាំ២០២២
បើគ្រិស្តសាសនិកណាម្នាក់លែងលះប្រពន្ធគាត់ដោយគ្មានមូលដ្ឋានលើគម្ពីរ ហើយក្រោយមករៀបការជាមួយបុគ្គលផ្សេង តើក្រុមជំនុំមានទស្សនៈយ៉ាងណាចំពោះអាពាហ៍ពិពាហ៍ពីមុន និងអាពាហ៍ពិពាហ៍ថ្មី?
ទស្សនាវដ្ដី
សំណួរពីអ្នកអាន ខែមីនា ឆ្នាំ២០២២
ទស្សនាវដ្ដី
សំណួរពីអ្នកអាន ខែធ្នូ ឆ្នាំ២០២១
ទស្សនាវដ្ដី
សំណួរពីអ្នកអាន ខែធ្នូ ឆ្នាំ២០២០
តើពាក្យរបស់សាវ័កប៉ូលនៅកូរិនថូសទី១ ១៥:២៩ មានន័យថាគ្រិស្តសាសនិកខ្លះនៅសម័យរបស់គាត់បានទទួលការជ្រមុជទឹកជំនួសបុគ្គលដែលបានស្លាប់ឬទេ?
