Sayi Jiphange akalakala ni jitekinolojiya jiji phala kudizwelesa ni mwiji ni jiphange jakamukwa. Maji Okidistá wakulu munzumbi watokala kulembalala okidimwinu kiki: “Mukonda o njimu kilwezu u ki mwena mu kanga, anga u swam’ê kyá; maji o jisemenyi-phe alundujuka ngó, katé kya bonga o divuwa.”—Jisa. 27:12.

Twejiiya kwila Jihova wamesena kutulanga. Kyenyiki kitwandasota kubhanga ukamba ni athu awanuna okilunga, yó ate mukamukonde ni yó akwa kulungulula okidi kya Bibidya. (Loma 16:17; 1 Kol. 5:11; 2 Nzwá 10, 11) Kumbandu yengi sayi ya enemudyongeka netu muyônge nange kamubelesela o itumu ya Bibidya. (2 Tim. 2:20, 21) Mukonda dya kiki kitena kubhonza kusola kyambote omakamba se tudizwelesa ngó bhukaxi kajyaplikativu jiji jajinjimbu.

Twatokala kudilanga bengebenge se okibuka kyakutumikisa jinjimbu mwala athu avulu. Amoxi abhangele mbandu yakibuka kala yiyi kaditundu kyambote. Mukibuka mwala hama ja athu mba mazunda, eye kiwandatena kwijiya kyambote se athu alamu akulu mwene munzumbi mba ala mwene kyambote. Okwila omuthu ubhanga mbandu mukibuka mwala o athu avulu wamudilanga mwene? Jisálamu 26:4 yamba: “Akwa makutu kingixikama-nâ; kingixikina kudita kumoxi ni akwa mangonya.” Ovelusu yiyi ilondekesa kwila onjimu udizwelesa ngo ni athu yó wa ejiya pholo ni pholo.

Nemwene se okibuka kyofele, Okidistá wakulu munzumbi watokala kudibhwidisa: Maka ahi enemuzwela okibuka kiki? Ithangana ikuxi ingene mungaxtala mukibuka kiki? Mujinjimbu jiji atena kuzwelamu maka avulu. Maji eye kiwatokala kudivwa kwila wabhingi kutambwijila ojinjimbu joso. Phawulu wadimuna Timote yalungu ni athu exile “itoka mba akwa jimbwembwe, azwela ima kiyatokala.” (1 Tim. 5:13) Kiki kitena we kubhita lelu bhukaxi kajyaplikativu eletroniku.

Se Kidistá wakulu munzumbi keji zwela kyayibha yalungu ni phange mba kutungununa kikitu kyosweke kyalungu ni mwene ne kya ngó kubhana matwi mumaka kala yâ. (Jisá. 15:3; Jisa. 20:19) Mwene kejisuluka ni kuzwela musoso uvudisa maka ne kuzwela musoso kejiya se wakidi mba wamakutu. (Efe. 4:25) Mukidi musayite yetu jw.org ni programa jetu ja JW Broadcasting^® mwezala ni ima yalungu ni Bibidya ni jilelatodyu ja ubhe.

Sayi jiphange asumba, asumbisa, alondekesa o ima yejiya okubhanga bhukaxi kajyaplikativu jiji. Maji, yâ maka aweji, kalungu ni ubhezelu wetu utubhana kwa Jihova. O Bibidya yamba: “Kimukale mu akwa lwimbi lwa kitadi.” Okidistá wamesena kukayela okitendelesu kiki, kandasota kubhanga wenji mba kukatula mbote bhukaxi kajiphange jê.—Jihe. 13:5.

Okwila kima kyayibha kubhinga kitadi kujiphange bhukaxi ka ji aplikativu phala kukwatekesa ojiphange jabhindama mba abhiti mumavwa? Etu twazolo kyavulu ojiphange jetu twamesena kwakwatekesa kyoso kyabhindama. (Tiya. 2:15, 16) Maji kusota kubhanga kiki bhukaxi kajyaplikativu jiji kitena kubhonzesa okikalakalu kyamubhanga kyá ofiliyale mba okilunga. (1 Tim. 5:3, 4, 9, 10, 16) Mukidi kitwamesena kudilongekesa kwila etu atusolo phala kukwatekesa ojiphange jiji.

Twamesena kubhanga kima kibhana kijingu kwa Jihova. (1 Kol. 10:31) Kyenyiki ande dyakusoneka njimbu bhukaxi kajyaplikativu jiji mba jitekinolojya jengi, twatokala kuxinganeka mu ilwezu itena kumoneka ni kusota kudilanga.