Abandi Bakristayo bakakolesaya eby’etekinologia erikanirania n’abahughu babu n’abandi Bema balikyabu. Aliwe, Omukristayo oyukulire bunyakirimu akabya inian’ibukire erihabulha lino: “Omundu w’obulengekania amalhangira ebibi, akayibisa; nikwa abakiru bakathwangana ibaghalhwa busana n’ekyo.”​—Emi. 27:12.

Thunasi ngoku Yehova anzire erithutheya okw’ebi. Busana n’ekyo, sithuli kolongana n’abakaletha erighabulhana, abahighithirwe, kutse abakahengemaya ekwenene. (Abar. 16:17; 1 Kor. 5:11; 2 Yn. 10, 11) Abandi omwa kithunga banganabya isibawithe emighendere eyuwene. (2 Tim. 2:20, 21) Thukabya ithun’ibukire eki thukasombolha abanywani. Kyangana kalha erisombolha abanywani abuwene thukakolesya eby’etekinologia eby’erithumirana esyomeseji.

Ni kikulhu eriminya abawukakolongana nabu kwilhabirirya bikahika okw’ingira omwa syogurupu sy’erithumirana esyomeseji esiri mw’abandu banene. Abandi Bakristayo babiriyingirya omwa syogurupu ng’esi, aliwe mwabirilhwiririra ebitsibu. Mughalha wethu kutse mwali wethu angayitheya athi amabya omwa gurupu eyirimo ebikumi kutse esyongumi sy’abandu? Kikalire eriminya abandu abosi abo nga bawithe mibereki kandi obunyakirimu bwabu nga buli buthi. Esyonyimbo 26:4 hathi: “Sindi siba n’abandu bathya-bathya, Kandi sindi righa erighenda n’abathebya.” Mbwino eki sikiri kanganaya kithi wutholere iwakolesya esyondegheka esy’erithumirana esyomeseji n’abawasi ndeke basa?

Nibya n’egurupu nomuyangabya mw’abandu bake, Omukristayo atholere inialebya obuthuku obo akakolesaya n’ebya bandu abo bakakanayako. Sikwama kyayowa nga thutholere ithwakanirania n’abandi nomubangabya ibakakanaya okuki kutse erighunza buthuku bungahi ibanemukanirania. Paulo mwakunga Timoteo okwa bandu abakabya “mbandangania n’eriyingirya omo myatsi y’abandi.” (1 Tim. 5:13) Munabwire, kyolhobire erikolha ekindu ng’ekyo erilhabira omwa by’etekinologia.

Sihali Omukristayo oyukulire bunyakirimu oyuwanganza eribugha kutse erihulikirira emyatsi ey’eritsweba-tsweba kutse ey’embiitha eyihambire okwa balikyethu. (Esy. 15:3; Emi. 20:19) Iyo iniakendianza eriyihighulha okwa myatsi ey’ebyuka kutse ey’ebinyambwirwa. (Efe. 4:25) Thukabana ebyalya bingyi eby’obunyakirimu n’emyatsi mingyi eyihikire okwa muthahulha wethu owe jw.org n’okwa ndegheka y’obuli kwezi eya JW Broadcasting^®.

Abandi Bema ba Yehova bakakolesaya eby’etekinologia erighulya, erighulha, n’erithererera ebindu byabu kutse emibiiri. Eyo ni myatsi y’esuburu, si y’eringirya omw’iramya lyethu. Abakristayo abathanzire erikwamirira “erianza esyofranka” bakayitheghaya okwa kithegho eky’erilhangira olhughanda lhw’abalikyethu ng’enzira y’erikoleramu esyosente.​—Ebr. 13:5.

Kandi ibbwa erikolesya esyondegheka esi erianza erisorokerya balikyethu b’esyosente abali omwa buyithawa kutse abawire kw’ebitsinduli? Mughulhu wosi thukakanganaya kuthukatsomanangana n’eriwathikania. (Yak. 2:15, 16) Aliwe erikolha ekyo erilhabira omwa syogurupu sy’erithumirana esyomeseji esiri mw’abandu banene ikikendi lemesya endegheka y’ekyaghanda ky’omuthahulha kutse ey’ekithunga ey’eriwathikya. (1 Tim. 5:3, 4, 9, 10, 16) Kandi omo kwenene okw’ithwe sihali omundu oyuwanganza eriyikangania nga n’iyo wahebirwe olhukwamirwa olhw’embaghane olhw’eriwathikya esyombuli sya Nyamuhanga.

Thwanzire erikolha ekyangaha Nyamuhanga y’olhukengerwa. (1 Kor. 10:31) Neryo wukathwamu nga wukolesaye endegheka y’erithumirana esyomeseji kutse ebindi eby’etekinologia, ambi iwalengekania okwa kabi akangabyamu, kandi iwayitheya.