Sɔm brɔda ɛn sista dɛn kin yuz di tɛknɔlɔji we de naw fɔ tɔk wit dɛn fambul dɛn ɛn dɛn kɔmpin Jiova Witnɛs dɛn. Bɔt machɔ Kristian go de mɛmba dis advays we se: “Udat gɛt sɛns nain de si denja i ayd pan am, bɔt udat ful de waka go insay de ɛn sɔfa fɔ dat.”—Prɔv. 27:​12.

Wi no se Jiova want fɔ protɛkt wi. So wi nɔ de kip kɔmpin wit di wan dɛn we de mek pipul dɛn skata, di wan dɛn we disfɛloship, ɔ di wan dɛn we de tɔk bɔt lay lay tin dɛn. (Rom. 16:​17; 1 Kɔr. 5:​11; 2 Jɔn 10, 11) I kin bi se sɔm brɔda ɛn sista dɛn ɔ ɔda pipul dɛn we de na di kɔngrigeshɔn nɔ de obe di lɔ dɛn we de na di Baybul. (2 Tim. 2:​20, 21) So wi want fɔ mɛmba dis we wi de pik wi padi dɛn. Bɔt i nɔ kin izi fɔ lɛ wi pik gud padi dɛn if wi jɔs de tɔk wit dɛn tru ap dɛn we de fɔ sɛn ɛn risiv mɛsej.

I rili impɔtant fɔ lɛ wi tek tɛm pik di rayt padi dɛn if wi de tink fɔ jɔyn mɛsej grup dɛn we gɛt bɔku pipul dɛn. Sɔm Kristian dɛn dɔn jɔyn dɛn kayn grup dɛn de, ɛn bad tin dɛn dɔn apin bikɔs ɔf dat. Aw brɔda ɔ sista go sho se i de tek tɛm if i de tink fɔ jɔyn grup we gɛt bɔku bɔku pipul dɛn? I nɔ pɔsibul fɔ no udat ɔl di wan dɛn we de na di grup rili bi, ɛn fɔ no if dɛn ɔl gɛt strɔng fet pan Jiova. Sam 26:​4 se: “A nɔ de kip kɔmpin wit udat de pan rikishi ɛn a nɔ de jɔyn gɛŋ wit udat ipokrit.” Yu nɔ tink se dis vas de ɛp wi fɔ no se i rili mek sɛns fɔ lɛ wi jɔs de sɛn mɛsej to pipul dɛn we wi sabi?

Ilɛksɛf di pipul dɛn we de na di grup nɔ bɔku, wi nid fɔ de chɛk ɔmɔs tɛm wi de yuz fɔ sɛn mɛsej ɛn wetin di pipul dɛn na di grup de tɔk bɔt. Wi nɔ fɔ tink se wi nid fɔ de riplay di mɛsej dɛn ilɛk wetin dɛn de tɔk bɔt ɔ aw lɔng dɛn de tek fɔ sɛn di mɛsej dɛn. Pɔl bin wɔn Timoti bɔt pipul dɛn we “kin kongosa . . . ɛn put mɔt pan ɔda pipul dɛn biznɛs.” (1 Tim. 5:​13) I pɔsibul fɔ lɛ wisɛf du dɛn sem tin dɛn de as wi de yuz ilɛktronik tin dɛn.

Ɛnibɔdi we na machɔ Kristian nɔ go tɔk bad bɔt in kɔmpin Kristian, ɛn i nɔ go lisin we ɔda pɔsin de tɔk bad bɔt in kɔmpin Kristian. Ɛn i nɔ go lisin ɔ tɔk bɔt ɛnitin we i nɔ gɛt rayt fɔ no bɔt in kɔmpin Kristian. (Sam 15:​3; Prɔv. 20:​19) Dɔn bak, i nɔ go tɔk ɔ lisin to stori we pipul dɛn dɔn ad pan, ɔ ɛni tɔk we i nɔ shɔ se kɔrɛkt. (Ɛfi. 4:​25) Wi gɛt bɔku tin dɛn we wi shɔ bɔt we de na wi jw.org wɛbsayt ɛn wi JW Brɔdkastin^® program dɛn we kin kɔmɔt ɛni mɔnt.

Sɔm brɔda ɛn sista dɛn kin yuz mɛsej ap dɛn fɔ bay sɔntin, fɔ sɛl, ɛn fɔ advatayz sɔntin ɔ gi wok to pipul dɛn. Na biznɛs dɛn de du, ɛn i nɔ gɛt natin fɔ du wit wi savis to Jiova. Kristian dɛn we “nɔ lɛk mɔni” nɔ de ɛva yuz dɛn brɔda ɛn sista dɛn fɔ tray fɔ mek mɔni.—Ibru. 13:​5.

Yu tink se wi fɔ yuz mɛsej ap dɛn fɔ aks fɔ mɔni fɔ wi brɔda ɛn sista dɛn we nid ɛp, ɔ fɔ di wan dɛn we de na say dɛn we nachɔral dizasta dɔn apin? Bikɔs wi lɛk ɛn bisin bɔt wi brɔda ɛn sista dɛn, bɔku tɛm, wi kin ɛp di wan dɛn we nid ɛp, ɛn wi kin ɛnkɔrej dɛn. (Jems 2:​15, 16) Bɔt if wi tray fɔ du dat bay we wi de yuz mɛsej grup dɛn usay bɔku pipul dɛn de, i kin mek i nɔ izi fɔ lɛ di branch ɔfis ɔ di kɔngrigeshɔn ɛlda dɛn ɛp dɛn brɔda ɛn sista dɛn de. (1 Tim. 5:​3, 4, 9, 10, 16) Ɛn wi nɔ want fɔ lɛ pipul dɛn fil se dɛn dɔn pik wi fɔ du spɛshal tin fɔ ɛp wi brɔda ɛn sista dɛn.

Wi want fɔ du wetin go briŋ prez to Gɔd. (1 Kɔr. 10:​31) So we yu de yuz mɛsej ap ɔ ɔda tɛknɔlɔji, na fɔ tink bɔt di denja dɛn we de de, ɛn tek tɛm.