Batemwe ya Yehova ya nkaka ke sadilá ba-aplikasion yina bantu mingi ke sadilá bubu yayi, samu na kusolola na bantu ya famiye ya bawu mpe batemwe ya nkaka. Kasi bakristo yina ke ya kukula na kimpeve, ke landá konseye yayi: ‘Muntu ya mayela ke talá kima yina lendá talisa yandi mpasi mpe ke bumbaná, kasi bantu yina ke ve na mayela ke kwenda kaka na mantwala mpe ke kutaná na bampasi.’—Bin. 27:12.

Beto zaba ti Yehova ke na nsatu ya kubumba beto. Na yawu, beto ke vukuná ve na ba yina ke sosá kunata badivizion, ba yina ba basisá na kimvuka, to ba yina ke zonzilá malongi yina me katuka ve na Biblia. (Rom. 16:17; 1 Ko. 5:11; 2 Yoa. 10, 11) Beto zimbana ve ti, na kati ya kimvuka, ya ke na ba yina ke landá ve misiku ya Biblia. (2 Tim. 2:20, 21) Beto zolá bumba dikanisi yayi na yintu ntangu beto ke solá bakamarade ya beto. Ya lenda vanda mpasi na beto na kusola bakamarade ya bien ntangu beto ke sadilá ba-aplikasion yina ke sadisá na kufilisa bamesaje.

Ya ke na ba yina ke sadilá ba-aplikasion yayi samu na kusala bagrupe ya bakamarade. Ya ke mbote na kusala keba na kukota na bagrupe ya faso yina surtout si bantu ke mingi. Bakristo ya nkaka kotá na bagrupe ya faso yayi, mpe ya natiná bawu mambu ya yimbi. Wa’ faso mpangi ya kento to ya bakala lenda sala keba si yandi ke na kati ya grupe yina ke na bantu kuluta 100 to 1000? Ya ke mpasi na kuzaba bien nani ke mosi na mosi ya bawu mpe faso ke kimpeve ya yandi. Nkunga 26:4 me zonza: ‘Mu ke salá ve kikamarade na bantu ya luvunu, mpe mu ke kimá ba yina ke bumbá kimuntu ya bawu.’ Ya ke na lakisá ti ya ke bien na kufilisa bamesaje kaka na bantu yina beto zaba.

Ata grupe yango ke kaka na bantu fioti, beto zolá sala keba na ntangu yina beto ke lutisá na kufilisa bamesaje mpe na bamambu yina bantu yina ke na bagrupe yango ke zonzá. Beto zolá kanisa ve ti beto me lunga kupesa bareponse na bamesaje nyonso yina ba ke filisá beto, sans kusala keba na mambu yina ya ke na zonzá to na ntangu yina ya ke na baká beto. Paul kebisá Timote samu na bantu yina ke ‘tongá mpe ke kotá na mambu ya bantu ya nkaka .’ (1 Tim. 5:13) Bubu yayi, beto lenda sala mpe mambu yayi Paul me zonzila na nzila ya internet.

Temwe ya Yehova yina ke ya kukula na kimpeve ke salá ve mpe ke kuwá ve mambu yina ke zonzilá yimbi ya bampangi mpe yandi ke basisá ve mambu yina me tala ve yandi. (Nku. 15:3; Bin. 20:19) Na yawu, yandi zolá landa ve mpe kuzonzila ve bansangu yina bantu nyonso ke na zonzilá, kasi ba me baka ve tangu ya kutala si ya ke vrai. (Ef. 4:25) Beto ke zwá madya mingi ya kimpeve mpe bansangu mingi yina beto lenda sala konfianse na site ya beto jw.org mpe ba-mois nyonso na emision JW Télédiffusion.

Batemwe ya Yehova ya nkaka ke sadilá ba-aplikasion yina ke sadisá na kufilisa bamesaje na internet, samu na kutekisa, kusumba, kusala publisite ya bima yina ba ke teká, mpe kupesa bisalu na bantu. Bima ya faso yayi ke kwenda ve nzila mosi na kisalu ya Yehova. Bakristo yina ke ve na ‘luzolo ya mbongo,’ lenda sadila ata fioti ve kikamarade yina ba ke na yawu na bampangi ya bawu samu na kusala komerse.—Ebr. 13:5.

Beto lenda sadila kwandi ba-aplikasion yina ke sadisá na kufilisa bamesaje samu na kulomba nbongo samu na bampangi ya beto yina ke na nsatu ya yawu, to ba yina me kuzwa mambu ya mpasi? Beto ke zola bampangi ya beto mpe beto ke kipeke bawu, na yawu ntangu nyonso beto ke sadisá mpe ke pesá ngolo na ba yina ke na nsatu ya yawu. (Zaki 2:15, 16) Kasi, kusosa kusala yawu na nzila ya bagrupe ya internet, lenda kumisa mpasi aide yina filiale to kimvuka ke na nsatu ya kupesa bawu. (1 Tim. 5:3, 4, 9, 10, 16) Ya vrai, ata muntu na kati ya beto ke na nsatu bantu ya nkaka kanisa ti, ni na yandi kaka ba me pesa responsabilite ya kukipe bampangi ya yandi batemwe.

Beto ke zolá kusala kaka mambu yina ke pesa nkembo na Nzambi. (1 Ko. 10:31) Na yawu, ntangu beto ke baká desizion ya kusadila ba-aplikasion yina ke sadisá na kufilisa bamesaje na internet, beto zolá sala keba samu ya lenda natina beto mambu ya yimbi.