Chi beuꞈ teˇ co˗e, Shaˉhkiˆhkanˍ ve chaw yehˬ kʼa maˇ heˆ leh awˬ chawˇ htaꞈ caˉ daꞈ htaˇ, awˬ hkʼeun awˬ suhˉ awˬ suhˉ yehˇ ve yoˬ. Yaꞈ hkʼaˇ, co ha hpawˇ ve chaw mawˇ lehˬ Liꞈ hpu hkʼaw beˆ maˍ laˇ ve htaꞈ hkʼaˬ htaˆ kaꞈ tawnˇ taˍ ve yoˬ. Oˇ kaˬ lo kʼoˆ ve, “dawˇ nyi puiˉ ve chaw lehˬ kawˆ tuˬ dawˇ haˍ tuˬ gaˬ laˇ chehˇ ve htaꞈ shiˍ leh, jaw kʼai puiˉ ve yoˬ. Maˇ dawˇ nyi puiˉ ve chaw lehˬ, awˬ gʼuˇ suhˍ caˉ kʼai leh dawˇ haˍ tuˬ htaꞈ gʼa hpuˇ ve yoˬ.”—Tawˇ naˉ ve 27:12.

Yaˬhoˉvaˬ ngaˬ hui htaꞈ haꞈ shaˉ laˇ gaˇ ve tehꞈ ngaˬ hui shiˍ ve yoˬ. Hkʼe te leh, maˇ hawˍ daꞈ puiˉ ve chaw geh, Hkriꞈ yaˇ awˬ moˍ hkʼaw tawˆ cheˆ ve chaw geh, yawˇ hui hkʼe leˇ maˇ cawˇ ve hpawˇ yonˍ tcuh gaˇ ve chaw hui geh, awˬ chawˇ maˇ te gaˇ. (Roˉmaꞈ 16:17; 1 Kawˇrenˍhtuˆ 5:11; 2 Yoˇhanˬ 10, 11) Chi hkʼoˆ kaꞈ, Liꞈ hpu hkʼaw kʼoˆ taˍ ve hkʼe hkʼa dehꞈ maˇ gʼaꞈ te ve awˬ viˉ awˬ nyi kaꞈ cawˬ sheˍ ve yoˬ. (2 Tiˆmoˉseˍ 2:20, 21) Chi htaꞈ pa taw, ngaˬ hui a shu geh awˬ chawˇ te tuˬ leuˆ htaˇ, shaˍ tiꞈ gʼa te ve yoˬ. Yaꞈ hkʼaˇ, ngaˬ hui ehˆ yehˇ leh awˬ nu ve chaw geh tawˇ yaw daꞈ htaˇ awˬ lawn chi maˇ sha.

Ngaˬ hui awˬ hkʼeun hkʼaw liꞈ bvuhꞈ feu piˇ chehˇ ve laiˉ gʼaˇ cawˬ ve kʼo, ngaˬ hui shaˍ tiꞈ hkʼa dehꞈ gʼa te ve yoˬ. Awˬ viˉ awˬ nyi awˬ moˍ chi hkʼe ve hkʼaw loꞈ˗e htaˇ, awˬ viˉ awˬ nyi teˇ hpaˍ hpaˍ heuˆ la kuiˬ cawˬ ve gʼa hpuˇ ve yoˬ. Awˬ lawehˬ awˬ hinˉ gʼaˇ ve awˬ moˍ hkʼaw ngaˬ hui chehˇ ve kʼo, teˇ gʼaˇ le le hkʼaˬ hkʼe hpehꞈ ve kaꞈ ngaˬ hui maˇ shiˍ. Maˇ heˆ leh yawˇ hui co ha hpawˇ yonˍ yeˬ ve naˍ kaꞈ ngaˬ hui maˇ shiˍ. Chiˇ mvuh liꞈ ve 26:4 hkʼaw kʼoˆ ve, “teꞈ chiˉ awˬ bon maˇ cawˬ ve chaw hui leh, heˍ puiˉ ve chaw htaꞈ ngaˬ awˬ chawˇ te tuˬ ve maˇ heˆ.” Liꞈ hpu chi teˇ tawn hkʼaw kʼoˆ maˍ laˇ ve, ngaˬ hui shiˍ daꞈ ve chaw htaꞈ ceh tiˉ ehˆ hkʼaw liꞈ bvuhꞈ daꞈ cawˇ ve yoˬ.

Awˬ moˍ hkʼaw hkʼaˬ nyiˇ gʼaˇ maˇ cawˬ ve htawˇ, ngaˬ hui awˬ yanˇ hkʼaˬ hkʼe maw yehˇ ve leh Aˬ htoꞈ ma ve awˬ lawn yaw daꞈ ve kaꞈ shaˍ tiꞈ gʼa te cawˇ ve yoˬ. Chaw teˇ hpaˍ kʼo, shu aˬ htoꞈ ma ve awˬ lawn yaw daꞈ ve htawˇ maˇ kʼoˆ, awˬ yanˇ hkʼaˬ hkʼe maw shonˇ ve htawˇ maˇ kʼoˆ, yawˇ gʼa hkʼawꞈ piˇ ve tehꞈ dawˇ ve yoˬ. Yaꞈ hkʼaˇ, ngaˬ hui chi hkʼe maˇ te. ‘Kʼoˆ maˇ keunˍ ve teˇ hpaˍ leh yawˇ hui htaꞈ maˇ caˉ daꞈ ve shu te kuiˬ htaꞈ ca shoꞈ shaꞈ piˇ ve’ maˇ gʼa te tuˬ Pawˇluꞈ Tiˆmoˉseˍ htaꞈ shaˍ tiꞈ piˇ ve yoˬ. (1 Tiˆmoˉseˍ 5:13) Ehˆ yehˇ leh liꞈ bvuhꞈ feu ve kaꞈ chi hkʼe hpehꞈ la gʼa puiˉ ve yoˬ.

Co ha hpawˇ ve chaw mawˇ lehˬ shu ve awˬ lawn maˇ kʼoˆ ve maˇ heˆ leh maˇ kʼoˆ keunˍ maˇ kʼoˆ cawˇ ve awˬ lawn awˬ nu ve awˬ viˉ awˬ nyi htaꞈ maˇ kʼoˆ piˇ. Hkʼa dehꞈ maˇ gʼa chaˬ nyi sheˍ ve awˬ lawn htaꞈ awˬ tehˬ hkʼe leˇ maˇ gʼa kʼoˆ. L eh yawˇ kaꞈ awˬ lawn oˇ ve htaꞈ maˇ gʼa na. (Chiˇ mvuh ve 15:3; Tawˇ naˉ ve 20:19; Eˇfeˇsuꞈ 4:25) Ngaˬ hui ve awˬ lawn yonˍ gʼa ve leh co ha hpawˇ ve caˇ tuˬ teˇ hpaˍ, vehˆsaiˉ jw.org leh teˇ ha pa le le JW awˬ han tawˆ kuiˬ hkʼaw awˬ lawn maˇ maˇ cawˬ ve yoˬ.

Awˬ viˉ awˬ nyi teˇ hpaˍ kʼo, mawˇ vuiˬ mawˇ hawˇ ve maˇ heˆ leh, shu dawˇ cawˇ tuˬ awˬ han feu piˇ ve maˇ heˆ leh, kanˉ gʼa te tuˬ ehˆ chi yehˇ ve yoˬ. Yaꞈ hkʼaˇ, awˬ lawn chi lehˬ tanˇ kaˬ hkʼaˇ hpehꞈ leh Yaˬhoˉvaˬ htaꞈ oˉ kʼoˍ pui ve maˇ caˉ daꞈ. ‘Hpu htaꞈ sheˉ lai ve teˇ ceuˬ’ awˬ viˉ awˬ nyi coˇ caˇ leh maˇ te ve chaw kʼo, awˬ nu ve awˬ viˉ awˬ nyi geh tanˇ kaˬ hpawˇ A shu yawˇ awˬ to awˬ bon cawˬ tuˬ ehˆ chi ve maˇ yehˇ.—Heˍbrehˇ 13:5.

Awˬ viˉ awˬ nyi tuꞈ ve hkanˍ ve leh awˬ viˉ awˬ nyi mvuhˇ yeˬ mvuhˇ hawˉ hpawˇ gʼa hpuˇ chehˇ ve chaw ga piˇ tuˬ hpu tanˇ tanˇ ve awˬ moˍ awˬ hkʼeun hkʼaw tehꞈ cawˇ˗aw laˇ? Ngaˬ hui awˬ viˉ awˬ nyi htaꞈ haꞈ leh dawˇ haˍ ve pa taw, ngaˬ hui ga piˇ leh awˬ gʼaˇ piˇ gaˇ ve yoˬ. (Yaˍkoˆ 2:15, 16) Awˬ tcuhˉ puiˍ leh Hkriꞈ yaˇ awˬ moˍ awˬ viˉ awˬ nyi htaꞈ ga piˇ chehˇ ve htaꞈ shoꞈ shaꞈ piˇ chehˇ ve yoˬ. (1 Tiˆmoˉseˍ 5:3, 4, 9, 10, 16) Awˬ nu ve awˬ viˉ awˬ nyi htaꞈ ngaˬ hui nyi haꞈ shaˉ piˇ tuˬ daꞈ jaˇ ve awˬ vuiˬ gʼa ve tehꞈ awˬ viˉ awˬ nyi htaꞈ maˇ dawˇ yaꞈ tcuh gaˇ.

Gʼuiˬ sha awˬ meꞈ awˬ hponˇ gʼa tuˬ ngaˬ hui teˇ ceuˬ le le te gaˇ ve yoˬ. (1 Kawˇrenˍhtuˆ 10:31) Chi htaꞈ pa taw, ngaˬ hui ehˆ maˇ heˆ leh awˬ hkʼeun awˬ suhˉ awˬ suhˉ yehˇ htaˇ shaˍ tiꞈ gʼa te cawˇ ve yoˬ.