Bakreste babañwi baitusisanga lipangaliko kuli baambole ni mabasi abona ni Lipaki babañwi. Nihakulicwalo, Bakreste babatiile kwa moya bahupulanga kelezo ye, yeli: “Mutu yabutali ubona kozi mi waipata, kono babasina zibo bazwelapili cwalo mi hasamulaho bautwa butuku.”—Liprov. 27:12.

Lwaziba kuli Jehova ubata kulusileleza. Kacwalo, haluezangi siango ni batu babatahisa lifapahano, babazwisizwe mwa puteho, kamba babaluta lituto zekeluhile. (Maro. 16:17; 1 Makor. 5:11; 2 Joa. 10, 11) Mizwale ni likazeli babañwi kamba batu babañwi babaswalisana ni bona bakona kusapila ka kuya ka likuka za mwa Bibele. (2 Tim. 2:20, 21) Kacwalo, haluketa balikani, luswanela kuhupulanga taba yeo. Kono kukona kulubela taata kuketa balikani babande haiba luitusisa ma Apps a kulumelana ka ona mashango.

Luswanela kunyakisisa batu boluka eza siango ni bona sihulu haiba lunahana za kuba mwa sikwata sa batu babañata sa kulumelana ka sona mashango. Bakreste babañwi ba mwa likwata mokunani batu babañata, mi taba yeo itahisize butata. Muzwale kamba kaizeli ukona kutokomela cwañi haiba sikwata sali ku sona sinani batu babañata-ñata? Kutaata hahulu kuziba hande batu kaufela baba mwa sikwata seo ni kuziba haiba batiile kwa moya kamba kutokwa. Liñolo la Samu 26:4 libulela kuli: “Haniswalisani ni bapumi, mi niambuka babapata sebali sona.” Taba yeo ibonisa kuli neikaba hande kuñolelana mashango ni batu boluzibana ni bona.

Nihaikaba kuli Mukreste u mwa sikwata sesinani batu babanyinyani, uswanela kutokomela nako yatanda ni litaba zeambolwa mwa sikwata seo. Haluswaneli kunahana kuli lutokwa kualaba mashango kaufela abañola batu mwa sikwata ibe kuli aambola zañi kamba kueza cwalo kukaanga nako yekuma kai. Paulusi naalemusize Timotea ka za batu bane bakaba “basebi [ni kuikenya] mwa litaba za babañwi.” (1 Tim. 5:13) Kacenu, haiba lusatokomeli, lwakona kuba basebi kamba kuikenya mwa litaba za babañwi halunze luitusisa ma Apps a kulumelana ka ona mashango.

Mukreste yahulile kwa moya haana kubulela kamba kuteeleza kwa litaba za kunyaza Mukreste yomuñwi, kamba litaba zeli kunutu zeama Lipaki babañwi. (Samu 15:3; Liprov. 20:19) Mi haana kuteeleza kamba kukandekela babañwi litaba za kuikupulela zekomokisa kamba zesina hande bupaki. (Maef. 4:25) Lwakona kufumana litaba zende zeñata ni lipiho za niti fa webusaiti yaluna ya jw.org ni mwa progilamu ya ka kweli ya JW Broadcasting^®.

Lipaki babañwi baitusisanga ma Apps a kulumelana ka ona mashango kuli balekise kamba kuleka lika zeñwi, kufundota lika zeñwi kamba kuzibahaza musebezi oliteñi obabata kukenya batu babañwi. Litaba zecwalo haliswaneli kukopanywa hamoho ni litaba za bulapeli bwaluna. Bakreste bababata kuambuka ‘kuba ni lilato la masheleñi’ habaswaneli kuitusisa mizwale babona kuli bafumane masheleñi.—Maheb. 13:5.

Kono kana lwakona kuitusisa ma Apps a kulumelana ka ona mashango kuli lukupe masheleñi kwa mizwale ni likaizeli babañwi ilikuli lutuse Bakreste baba mwa butokwi kamba babawezwi ki kozi? Lwalata mizwale ni likaizeli baluna mi lwaiyakatwa bona. Kacwalo, hañata lwalikanga kubatusa ni kubasusueza. (Jak. 2:15, 16) Kono haiba lueza cwalo ka kuitusisa ma Apps a kulumelana ka ona mashango mi lukupa tuso kwa sikwata seluli ku sona sesinani batu babañata, lukasuhana lwalyanganisa tukiso yende yeezwanga ki ofisi ya mutai kamba baana-bahulu mwa puteho. (1 Tim. 5:3, 4, 9, 10, 16) Mi halubati kubonisa inge kuli lufilwe buikalabelo bobuipitezi bwa kubabalela mizwale baluna.

Lubata kueza lika zekakanyisa Mulimu. (1 Makor. 10:31) Kacwalo, musika itusisa kale ma Apps a kulumelana ka ona mashango kamba liprogilamu zeñwi, munyakisise kozi yekona kubateñi, mi mube ni tokomelo.