Vaka-Kulishitu vamwe veji kuzachisanga jipolongalamu jahamakina hakushimutwila navausoko wavo, navakwavo vaka-Kulishitu. Muka-Kulishitu atela kukavangiza mazu vatuhuhumuna muMbimbiliya akwamba ngwavo: “Muka-kuzangama eji kumonanga ponde, kaha himwaswama, oloze ou azeneka chinyingi mwalitakaho nakumona lupi.”—Vishi. 27:12.

Twatachikiza ngwetu Yehova asaka kutukinga. Ngocho katwasaka kulikata navaka-kuneha vihandwa, chipwe vaze vafumisa muchikungulwilo, navaka-kunangula vyuma vize vyalimbalaka naMbimbiliyako. (Loma 16:17; Koli. 1, 5:11; Yowa. 2, 10, 11) Vatu vamwe muchikungulwilo kavakavangiza jindongi jamuMbimbiliyako. (Chimo. 2, 2:20, 21) Twatela kwanuka chishina kanechi hakusakula masepa. Chinahase kupwa chachikalu kusakula kanawa masepa nge mweji kushimutwilanga kaha navo hamakina.

Mwatela kuvanguluka chikuma hakusakula masepa, chikumanyi nge mwatunga lizavu lyavatu vavavulu, lize mweji kulituminanga mijimbu kuzachisa makina. Vandumbwetu vamwe vanatungunga mazavu avatu vavavulu hamakina, aze vanazachisanga hakulituminanga mijimbu. Echi chinavalingisa vengile muponde. Uno ndumbwetu nahase kupwa ngachilihi wakuvanguluka, nge atwama mulizavu likwechi vatu vavavulu lize lyeji kulituminanga mijimbu hamakina? Chikupu vene, nachipwa chachikalu kutachikiza vilinga vyamutu himutu mulizavu kaneli, nakwijiva numba nge vapwa vakuhya kushipilitu. Mukanda waSamu 26:4 wamba ngwawo: “Kangweshi kulikata navaka-kutangisako. Ngweji kulihendanga kuli vaze veji kulyonganga kupwa vatu vavilinga vyamwaza.” Echi chinasolola hatoma nge, chapwa chamwaza kulituminanga mijimbu hamakina navatu vaze twatachikiza kanawa.

Numba tuhu lizavu lyakulitumina mijimbu hamakina nalipwa lyavatu vavandende, oloze muka-Kulishitu atela kupwa wakuvanguluka hakutachikiza lwola mwazachisa, navyuma vanahase kushimutwila mulizavu kana. Kamwatela kufwila kukumbulula kala chihande navaneha, nakutwalaho kushimutwila navoko. Paulu alwezele Chimoteu azangame navatu vaze vapwa “vaka-kuyongola vakwavo” kaha nawa “vaka-kulingisa muvyuma vyambala.” (Chimo. 1, 5:13) Namakumbi ano, kuli vatu vaze vanahase kulinga vyuma kana kuzachisa makina.

Kakweshi muka-Kulishitu wakuhya kushipilitu, uze mwasaka kwivwilila kuvyuma vyavipi chipwe vyuma vyakusweka, vize navahanjika hali vakwavo vaka-Kulishituko. (Samu 15:3; Vishi. 20:19) Kaha nawa keshi kutandakanyisa chipwe kwambulula mujimbu, uze katachikijile kanawa mashina namasongoko. (Efwe. 4:25) Tweji kutambulanga kulya chakushipilitu, namijimbu yeka hali vandumbwetu hakeyala yetu ya jw.org, nahapolongalamu ya JW Broadcasting^® kakweji hikakweji.

Vandumbwetu vamwe veji kuzachisanga makina hakulanda vyuma, nahakulanjisa, nahakwingisa vatu milimo. Echi chapwa hikusekasana, keshi himilimo yakushipilituko. Vandumbwetu vaze vasaka kutwama “chakuzeneka kuzanga jimbongo,” kaveshi kuzachisa vandumbwavo mangana vanganyalilehoko.—Hepe. 13:5.

Uno chapwa chakutamo kulomba jimbongo kuzachisa jipolongalamu jahamakina, mangana tukafwe vandumbwetu vaze vanayande, navaze vali muukalu wakulijila tahi? Twazanga vandumbwetu, kaha nawa twasaka kuvazakama. Ngocho tweji kuvakafwanga nakuvakolezeza nge vali muukalu. (Yako. 2:15, 16) Oloze nge natuzachisa jipolongalamu jahamakina hakusaka kukafwa vandumbwetu vali muukalu, kaha katweshi nakukavangiza kunoneka chaOfesi yaMutango, natulama muvikungulwiloko. (Chimo. 1, 5:3, 4, 9, 10, 16) Kaha nawa twatachikiza ngwetu, naumwe wauchi mwasaka kulisolola kuvatu ngwenyi atwama namulimo wakuzakama mikoko jaKalunga.

Twafwila kulinga vyuma vize navitohwesa Kalunga. (Koli. 1, 10:31) Shikaho, shimbu kanda musakule kuzachisa jipolongalamu jahamakina, mwatela kuvanguluka, nakumona ponde yinahase kufumamo.