Jokristo moko tiyo gi lony ma nyasani e tudore gi wedegi kod Joneno wetegi. Kata kamano, Jokristo motegno biro paro siemni sama gitimo kamano: “Ng’at mariek neno masira ka biro kendo opondo, ng’at ma riekone tin to dhi adhiya kendo ohinyore.”​—Nge. 27:12.

Wang’eyo ni Jehova dwaro ritowa. Nikech mano, ok dwaher riwore gi joma kelo pogruok, joma ogol e kanyakla, kata joma kelo puonj mopogore gi mar Jehova. (Rumi 16:17; 1 Kor. 5:11; 2 Joh. 10, 11) Nitie jomoko ma ni e kanyakla ma samoro ok tim kinda ahinya e luwo puonj mag Muma. (2 Tim. 2:20, 21) Ber paro mano sama wayiero osiepewa. Yiero osiepe mabeyo ok en gima yot ahinya sama watudore gi ji kokalo kuom apps miorogo mesej.

Dwarore ni watang’ moloyo ka wan e grup moting’o ji mang’eny mioroe mesej. Jokristo moko mosedonjo e grube madongo osehinyore marach. To adier, ere kaka owadwa kata nyaminwa nyalo tang’ sama oyiero osiepe e grup ma nigi ji miche modhuro kata alufe? Onge kaka onyalo ng’eyo ng’ato ka ng’ato kuomgi e yo maber, kata winjruok ma gin-go gi Nyasaye. Zaburi 26:4 wacho kama: “Ok ariwra gi jomiriambo, kendo ok awuoth gi jo ma pando kitgi.” Donge mano nyiso ni sama watiyo gi apps miorogo mesej to ber ka watudore mana gi joma wang’eyo achiel kachiel?

To kata ka Jakristo ni e grup moro matin mioroe mesej, pod ber mondo onon ni to otiyo gi thuolo ma romo nade e grubno, kod gik miwacho e grubno. Ok ochuno ni wadwok mesej moro amora mondik e grup ma ok wadewo ni ng’ato ondiko ang’o, to wadhi kawo thuolo ma romo nade e dwoko mesejgo. Paulo nosiemo Timotheo ni otang’ gi ‘jokuoth kod joma donjore e weche mag jomamoko.’ (1 Tim. 5:13) Wadak e kinde ma gima kamano nyalo timore e apps mag oro mesej.

Jakristo motegno ok bi wuoyo marach kuom Jakristo wadgi kata elo wechege maling’ ling’, to bende ok obi yie mondo jomamoko onyise gik ma kamago. (Zab. 15:3; Nge. 20:19) Obiro tang’ gi weche mijimbo kod weche ma ok ong’e korgi maber. (Efe. 4:25) Ka wadwaro chiemb chuny moriere kod weche manyien, wanyalo yudogi e websaitwa mar jw.org kod e programbe ma dwe ka dwe mag JW Broadcasting^®.

Nitie Joneno moko ma tiyo gi grube mag oro mesej e uso, ng’iepo, kata manyo ne jomoko tich. Mago gin weche ohala, kendo ok gitudore gi lamo Jehova. Jokristo ma ok dwar ni gibed “jo mohero pesa” ok yie tiyo marach gi jowetegi e loso pesa.​—Hib. 13:5.

To nade tiyo gi apps miorogo mesej e solo pesa mondo okonygo Jakristo wadwa ma nigi chandruok kata moyudo masira moro? Wahero Jokristo wetewa ahinya, kendo wagomboga konyogi kendo jiwogi. (Jak. 2:15, 16) Kata kamano, temo timo kamano kokalo kuom grube mag oro mesej nyalo chocho chenro ma ofis oseketo, kata ma kanyakla oseketo mar konyo joma kamago. (1 Tim. 5:3, 4, 9, 10, 16) Kendo, onge ng’ato ang’ata kuomwa monego opar ni en gi ting’ makende mar konyo rombe Jehova.

Dwaher timo gik ma biro kelo ne Nyasaye duong’. (1 Kor. 10:31) Omiyo, sa asaya miyiero ka be ibiro tiyo gi app moro mar oro mesej kata lony moro amora ma nyasani, non bende rachne kendo ibed motang’.