In najbʼen Internet kyuʼn tmajen Jehová tuʼn kyyolin kyukʼil toj kyja ex kyukʼil junjuntl erman. Pero in xi kybʼiʼn erman o che chʼiy toj kyokslabʼil aju consej lu: «Aju xjal at tnabʼl, ok ttil kyjaʼ ttzaj mya bʼaʼn, nneʼl oq tiʼj; atzunju xjal mintiʼ tnabʼl, noq kyjaʼ in xiʼ laqʼeʼ tuj tbʼe ex in tzaj mya bʼaʼn tiʼj» (Prov. 27:12).

Ojtzqiʼn quʼn qa taj Jehová tuʼn t-xqʼuqin qiʼj. Tuʼntzunju, mintiʼ in nok qmojbʼan qibʼ kyukʼil xjal mintiʼ in che jyon tiʼj mujbʼabʼil, kyukʼil qeju o che ex lajoʼn toj ttnam Jehová ex kyukʼil qeju in che yolin tiʼj nya ax tok xnaqʼtzbʼil (Rom. 16:17; 1 Cor. 5:11; 2 Juan 10, 11). Atlo junjun in nok kychmon kyibʼ kyoj chmabʼil, pero mintiʼ in xi kybʼiʼn tkawbʼil Jehová (2 Tim. 2:20, 21). Mas nya kwest tuʼn tok qamiwen qibʼ tukʼil jun erman qa ojtzqiʼn twitz quʼn, pero nya ax jlu in bʼaj aj kyajbʼen redes sociales quʼn.

Qa in qo ximen tiʼj tuʼn qokx toj jun matij grupo, bʼaʼn tuʼn qximen tiʼj alkyeqe tokx toj. Ateʼ junjun erman o tzʼokx kyqʼon kyibʼ toj jun grupo ik tzeʼn jlu ex o tzaj nya bʼaʼn kyiʼj. ¿Tzeʼn jaku tzʼok qxqʼuqin qibʼ qa at nim xjal tokx toj jun grupo? Kwest jaku tzʼel qnikʼ tiʼj alkyeqe tokx toj grupo ex tzeʼn taʼ kyamiwbʼil tukʼil Jehová. In tzaj tqʼamaʼn Salmo 26:4 jlu: «Mi jun maj o chin tene junx kyukʼil qe xjal nikʼal yol ex mintiʼ o tzʼok njunin wibʼe kyukʼil qeju xmletzʼ qe». Tuʼntzunju, mas bʼaʼn qa oʼkx ma qo yolin kyukʼil erman ojtzqiʼn kywitz quʼn.

Axpe ikx, nim toklen tuʼn tok qxqʼuqin qibʼ tiʼj jniʼ ambʼil ex tiʼ in qo yolin tiʼj toj jun grupo maske nya nim qbʼet tokx toj. Noq tiʼxku in che yolin erman tiʼj ex maske kukx in che saman qe mensaje, nya il tiʼj tuʼn t-xi qtzaqʼweʼn tkyaqilju in tzaj kysamaʼn. Xi tqʼamaʼn apóstol Pablo te Timoteo tuʼn tok t-xqʼuqin tibʼ kyiʼj qeju «ẍtaqʼil yol [...] ex nnoʼkx kylamon kyibʼ kyxol txqantl» (1 Tim. 5:13). Ax ikx jaku bʼaj jlu aj tajbʼen Internet quʼn aj qyolin kyukʼil txqantl.

Mintiʼ in nokx kyqʼon kyibʼ tmajen Jehová o che chʼiy toj kyokslabʼil toj jun grupo jatumel in che yolin junjuntl nya bʼaʼn kyiʼj txqantl moqa in xi kyqʼamaʼn tqanil aju mintiʼ tuʼn tok kybʼiʼn kykyaqil (Sal. 15:3; Prov. 20:19). Ex mintiʼ in nok kybʼiʼn tqanil in che yolin xjal tiʼj moqa naʼmx ttzaj qʼamaʼn qa ax tok (Efes. 4:25). At nim xnaqʼtzbʼil ex tqanil jaku tzʼok qeʼ qkʼuʼj tiʼj toj qtembʼil te Internet jw.org ex kyoj programa in che etz tkyaqil xjaw toj JW Broadcasting^®.

Ateʼ junjun erman in che ajbʼen redes sociales kyuʼn tuʼn t-xi kyqʼoʼn tqanil tiʼj kykʼaẍjel, tuʼn kyloqʼin, tuʼn t-xi kyqʼoʼn tqanil kyiʼj junjuntl tiʼchaq moqa tuʼn t-xi kyqʼoʼn tqanil tiʼj jun aqʼuntl. Tkyaqil jlu, mintiʼ toklen tukʼil qkʼulbʼil te Jehová. Tuʼntzunju, qa kyaj erman tuʼn miʼn tok kykʼujlaʼn qʼinumabʼil, kʼokel tilil kyuʼn tuʼn miʼn kyajbʼen erman kyuʼn tuʼn kykambʼan tiʼj pwaq (Heb. 13:5).

¿Yajtzun qa ma tzʼajbʼen jun aplicación quʼn tuʼn t-xi qqanin pwaq tuʼntzun kyxi onit erman in che ikʼ toj mebʼayil moqa aj ttzaj jun xitbʼil tuʼnx twitz txʼotxʼ? Tuʼnju kʼujlaʼn qe erman quʼn, kukx in xi qqʼuqbʼaʼn kykʼuʼj ex in qo onin kyiʼj (Sant. 2:15, 16). Qa ma txi qqanin onbʼil toj jun grupo jatumel kyokx nim erman, mlay tzʼonin jlu tiʼj aqʼuntl in bʼant tuʼn ninja qʼil twitz aqʼuntl moqa kyuʼn ansyan toj kʼloj okslal. ¿Tiquʼn? Tuʼnju oʼkx ttnam Jehová in nonin toj tumel (1 Tim. 5:3, 4, 9, 10, 16). Ex ni jun erman taj tuʼn tkubʼ kyximen txqantl tiʼj qa a in xqʼuqin kyiʼj erman.

Qaj tuʼn t-xi qbʼinchaʼn tkyaqil tuʼn tjaw qnimsaʼn Jehová (1 Cor. 10:31). Tuʼntzunju, qa ma kubʼ qximen tuʼn kyajbʼen redes sociales quʼn moqa alkyexku juntl aplicación tuʼn t-xi samet jun tqanil, bʼaʼn tuʼn qximen tiʼj alkyeqe nya bʼaʼn jaku che tzaj tiʼn ex bʼaʼn tuʼn tten qnabʼil.