Tjínkʼa ndsʼee xi kui síchjén xi sʼa kjibʼatsen ndʼaibi nga fákaonajmí je xínkjín kʼoa tsa kjaʼaísa ndsʼee. Je ndsʼee xi nda síkjaʼaitsjen kuenta sʼín nga i̱ tso Biblia: “Je chjota xi kosonnile josʼín, bʼejnaʼmaa nga jebe xi xkón sikʼéjna, tonga je xi tsín nkjín kon alikui basenjna kʼoa kjoa kajin” (Prov. 27:12).

ʼYañá nga kui xi mele je Jeobá nga tsín jme xi katamaná. Kuinga tsín ya fajtañá je chjota xi xkoa̱ya síkatíoná, xi jetsakichonsjejin naxinandále Niná kʼoa xi kjaʼaí kjoafaʼaitsjen bakóya (Rom. 16:17; 1 Cor. 5:11; 2 Juan 10, 11). Tsakui nichxin tjínkʼa xi bichó ya jinjtín xi tsínni sítjoson jme xi tso Biblia (2 Tim. 2:20, 21). Ngisaa choa ñʼai maná nga nimiyoaa jngo chjota kʼianga ñaki ʼyaxkoaan, tikʼoajinni nga to mensaje nikasénlee xíngiaa.

Ngisaa timachjénngáni nga nda chósonnilee josʼiaan kʼiatsa mená ya kuiyojiaan je grupo jñani nʼio nkjín mani xi tjíojin, nga̱ tsín ʼyaa ngatsʼi. Tjínkʼa ndsʼee xi ya batiojin grupo jebi kʼoa kʼoatso nga tsín nda bichómani. Tonga tsínjin josʼin si̱kuindañá yaoná kʼiatsa siento mani kʼoa tsa jmi mani je chjota xi tjíojin jngo grupo. Alikuijin josʼin jchañá ʼyáni xi ya tjíojin kʼoa jósʼin tjío ngixko̱n Niná. Ya Salmo 26:4 itso: “Alikui ya fajta je chjotandiso, kʼoa alikui ya sisinle je xi jaonkjaín”. Ngisaa chjíle tsa toje si̱kasénlee mensaje je chjota xi ñaki ʼyaxkoaan.

Ninga tochoa chjota tjíojin jngo grupo, tjínnele nga chósonnilee jokji nichxin si̱kʼayalee nga nikasén mensaje kʼoa tsa jme xi chobayañá. Alikui tjínnele kjoanʼio chjiá tsanda ñá kʼiatsa mensaje tífaʼainá, tojme xi tíchobayani kʼoa ninga tosi tonda skí xi ngikʼa. Je Pablo kʼoakitsole je Timoteo nga tsín ya katabájta je chjota xi kʼoasʼin ngale nga “totsʼoa bʼemakao” kʼoa xi tokui kʼoatso jmeni xi tsín je bʼakaole (1 Tim. 5:13). Kʼoati sʼín chjota ndʼaibi, tojme xi fáoyani ya Internet.

Je chjotale Cristo xi nda síkjaʼaitsjen alikui ya tsjonjin yaole jñani kui tíchobayani tʼatsʼe jngo ndsʼee kʼoa tsakui tíchobayani jmeni xi tsín koa̱n nga ʼya xi sʼe̱jinle (Sal. 15:3; Prov. 20:19). Alikui kui kuenta sʼín je én xi tsínni kʼoatjín kʼoa alikui kui kaníbason (Efes. 4:25). Nʼio nkjín koya jmeni xi faʼaitʼa ya jw.org kʼoa xi satíotʼa ya JW Broadcasting^® nga xki̱ sá xi ya Biblia yʼangini kʼoa ñaki kʼoatjín jmeni xi faʼaitʼa.

Tjínkʼa ndsʼee xi kui síchjén jñani nikasénnilee mensaje xíngiaa nga ya kʼoatsole xínkjín tsa jme xi baténa, tsa jme xi batse kʼoa tsa ʼya xi xá machjénle, jebi tʼatsʼe xání, kʼoa alikui koa̱n nga ya si̱kʼójiaan josʼin ʼyaxkoán je Niná. Je chjotale Cristo xi tsín to tao̱n nʼio símekon, alikui kui xá kjinile je ndsʼe̱ nga tao̱n mele sikinje (Heb. 13:5).

Tonga a koaan kʼoasʼin si̱chjén jñani nikasénnilee mensaje xíngiaa tsa tao̱n si̱jé kʼianga nganʼio machjénle jngo ndsʼee kʼoa tsa kjoaxkón kabichóne. Nga tsjoachaa je ndsʼee mandosinná josʼin tjíoni kʼoa binyakaoñá kʼianga nganʼio machjénle (Sant. 2:15, 16). Tsa ñá si̱kasén mensaje nga si̱jélee nganʼio je ndsʼee, ʼndele nga kʼoainganʼioá tosajin tokuitjáchjoalee josʼin jetjíobʼéndajin je sucursal kʼoa tsa jeje̱ xi chjotajchínga sʼin tjío, kʼoa ʼyañá nga nda bichómani jmeni xi je bʼéndajin (1 Tim. 5:3, 4, 9, 10, 16). Tonga aliʼyajin xi tokui kʼoasʼinni nga nda kʼoaxki̱ kʼoa kʼoasʼin sikjaʼaitsjen xi ngikʼa nga je kasʼenele nga sikuinda je ndsʼee.

Kui xi mená nga je Jeobá chʼa̱sjengʼaa tojmeni xi sʼiaan (1 Cor. 10:31). Kʼianga kui si̱chjén jñani nikasénnilee mensaje xíngiaa kʼoa tsa jmesa xi kjaʼaínile, chósonnilee josʼin si̱chjén kʼoa si̱kuindaa yaoná.