Baka-Kilistu babangi bakapangesa makina mangana basimutwiye na babushoko bwabo na bakwabo baka-Kilistu. Oloni muka-Kilistu wa kuhya ku sipilitu napande kwanuka eci cinangulo: ‘Baka-mana omwo bamona bukalu bwija, balishweka. Oloni muka-kujeneka kuyongola akobelamo, co kulutwe akalibeya.’—Visi 27:12.

Tuzibuka ngwetu Yehova ashaka kutunyungilila. Ngeci, kutwesi kulikwatasana na banu baje batonda kutwangununa, baje banatundu mu cikungulukilo nambe baje bakakundwiya bilongesa bya kuhenga. (Loma 16:17; 1 Koli 5:11; 2 Yowa 10, 11) Banu bamo baje bali na kulikwatasana na cikungulukilo kubesi na kwononoka binangulo bya mu Mbimbiliya. (2 Tima 2:20, 21) Co kutwapandele kulikwatasana na banu ba cifwa eci. Oloni kunasa kupwa kwakukalu kwangula babusamba ha apu ya kulitumina tumizimbu.

Simbu kanda tulikwatasane na cibunga ca ha apu cije cili na banu babangi, tunapande kuzibuka cifwa ca banu balimo. Baka-Kilistu bamo banakobela mu bukalu mwafwa ya kulikwatasana na bibunga bije bili na banu babangi. Ndolome nambe ndokazi asa kwangula bati babusamba bababwa mu cibunga ca ha apu cije cili na banu babangi? Kwakukalu kulinga ngoco mwafwa kasa kuzibuka mwamubwa umo na umo wabo nambe kuzibuka indi likulahelo lyabo linakanyama. Mukanda wa Myaso 26:4 ngwawo: “Kunjesi kukala hamo na banu baka-makuli nambe kusimutwiya na baka-cibembulu.” Eci cinangulo cimwesa ngwaco tunapande kusimutwiya lika na banu batuzibuka mwamubwa ha apu ya kulitumina tumizimbu.

Nameme nga mu cibunga mutuli muli banu babandondo, kutwapandele kumanesela simbu yaingi ku kulitumina tumizimbu, co lalo tunapande kwilula biñanda bitusimutwiya. Tunapande kuzibukila cimweja simbu itumanesela kukulitumina tumizimbu, co lalo kutwapandele kusimutwiya na banu ha ñanda yoshe-yoshe. Paulu walekele Timateo ngwendi keti alikwatasane na ‘baka-lufwe na baka-kulikobelesa mu byuma byambala.’ (1 Tima 5:13) Ano matangwa, kwakwasi manene kulikwatasana na banu ba cifwa eci ha makina.

Muka-Kilistu wa kuhya ku sipilitu kapandele kwendeka nambe kutolilila ku biñanda bya kushwekesa bya bakwabo baka-kukulahela. (Myaso 15:3; Visi 20:19) Co lalo kapandele kutolilila ku biñanda bya makuli. (Efeso 4:25) Tukatambula biñanda byabingi bya kukundama ku Mbimbiliya ha webusaiti yetu ya jw.org na ha JW Broadcasting^® ije ikatuhuka ha ngonde na ngonde, co twabikulahela.

Bakaleho bamo bakapangesa ma apu a kulitumina tumizimbu mu kulanda, kulandulula, kutsimanesa mingoso nambe kukobelesa bipangi. Ebi binapu bingila bya kuwanenamo bimbongo, co kubyakundamene ku kulemesa Yehova. Ngeci, baka-Kilistu baje kubashaka kukala na “cizemo ca bimbongo” kubapandele kupangesa bandolome na bandokazi babo mu kushaka kuwana bufuko.—Heve 13:5.

Batico kupangesa awa ma apu mu kulomba bimbongo bya kukwasa bandolome betu baje bali mu bujene nambe baje banaliwana na bukalu bwa cishitukila? Tukakwasa bandolome betu mwafwa twabazema, co twabaka mbunge. (Yako 2:15, 16) Oloni kubalombela bukwasi kupangesa apu kunasa kwonowesa baka-munango nambe cikungulukilo kubakwasa mu ngila yaibwa. (1 Tima 5:3, 4, 9, 10, 16) Co lalo, naumo wahi ashaka alimwese ngwendi ikeye ibanangula mangana akwase bandolome na bandokazi betu.

Tushaka kulinga byuma bije binena bumpau kuli Njambi. (1 Koli 10:31) Ngeci, omwo tupangesa ma apu a kulitumina tumizimbu nambe ma apu eka, tunapande kusinganyekesesa ha bukalu butundamo.