Sertin Kretien servi bann nouvo teknolozi pou res an kontak avek zot fami ek bann lezot Temwin. Me enn Kretien ki ena matirite pou rapel sa konsey-la: “Enn dimounn ki ena bon zizman kasiet kan li trouv danze, me enn dimounn ki pena lexperyans kontign ale ek pey bann konsekans.”​—Prov. 27:12.

Nou konpran ki Zeova anvi protez nou. Akoz sa, nou pa anvi ena okenn kontak ar bann dimounn ki kree bann divizion, avek bann exkli, ek avek bann ki fann bann fos lide. (Rom. 16:17; 1 Kor. 5:11; 2 Zan 10, 11) Ena osi sertin dan lasanble ki pena enn bon kondwit. (2 Tim. 2: 20, 21) Alor, nou bizin rapel sa bann kitsoz-la kan nou swazir nou bann kamarad. Parkont, li kapav difisil pou swazir bien nou bann kamarad kan nou kominik avek zot par mesaz.

Nou bizin fer plis atansion ankor kan nou lor enn group mesaz kot ena boukou dimounn. Sertin Kretien ki ti dan bann group koumsa, finn gagn boukou problem. Kouma enn Kretien kapav fer bien atansion si li dan enn group kot ena plizir santenn dimounn? An realite, li inposib pou vremem konn bien sa kantite dimounn-la, ek sirtou pou kone si se bann dimounn spiritiel. Psom 26:4 dir: “Mo pa frekant dimoun malonet, ni mars ar bann ipokrit.” Sa verse-la fer nou konpran ki li pli saz ki nou avoy mesaz zis bann dimounn ki nou kone personelman.

Mem si enn Kretien lor enn group kot ena tigit dimounn, li bizin fer bien atansion ar kantite letan ki li pase pou avoy bann mesaz ek lor size ki pe koze dan sa bann mesaz-la. Fode pa nou panse ki nou bizin reponn tou bann mesaz, partisip dan tou size ki pe koze, ek pas boukou letan dan sa bann konversasion-la. Pol ti averti Timote konsernan bann dimounn ki ‘fer palab, ek koz ninport.’ (1 Tim. 5:13) Azordi, ena sa bann kalite koze-la lor bann mesaz elektronik.

Enn Kretien ki ena matirite pa pou kritik lezot, ni mem ekout sa bann kalite koze la, ouswa partaz bann linformasion ki konfidansiel lor lezot Kretien. (Ps. 15:3; Prov. 20:19) Li pa pou partaz ek ekout bann zistwar ki paret exazere ouswa bann zistwar ki pa kone si vremem zot vre. (Efe. 4:25) Parkont, lor nou sit Internet ek lor Program Televizion JW ki sorti toule mwa, nou gagn manze spiritiel ek bann rapor ki nou kapav fer konfians.

Sertin Temwin servi bann mesaz elektronik pou aste, vande, fer bann piblisite, ouswa pou fer bann dimounn gagn travay. Sa bann kitsoz-la zot bann kitsoz materyel ki pena okenn lien avek nou ladorasion pou Zeova. Bann Kretien ki “pa les lamour pou larzan dominn zot lavi,” pa pou rod fer kas lot latet zot bann frer ek ser.​—Ebre 13:5, NW.

Eski nou kapav servi bann mesaz elektronik pou ramas kas pou nou bann frer ki bizin led, ouswa pou bann ki pe soufer akoz enn katastrof? Li vre ki nou anvi montre nou lamour pou nou bann frer ek ser kan nou ed zot ek ankouraz zot. (Zak 2:15, 16) Me kan nou kree bann group pou ramas kas pou nou bann frer ek ser, li vinn pli difisil pou lasanble lokal ouswa biro nasional pou ed sa bann frer ek ser-la. (1 Tim. 5:3, 4, 9, 10, 16, NW) Anplis, nou pa anvi donn lezot linpresion ki nou finn gagn enn responsabilite spesial pou pran swin bann frer ek ser.

Nou anvi fer tou pou donn laglwar Zeova. (1 Kor. 10:31) Alor, kan nou deside si nou pou servi bann aplikasion mesaz ouswa bann lezot teknolozi, anou reflesi lor bann danze ki kapav ena, ek anou fer bien atansion.