Aina Klistu yamwi yakaomvya ivya kupangapanga ivyayako ndakai pakuti yalanzyanya na ya lupwa alino na ya Nte yauze. Nomba Umwina Klistu uwakula muli vyakwe Leza akatwalilila ukwiusya ukusunda kwakuti: “Uwamano ndi walola ingofyo, akafisama, lelo iciwelewele cene cikapitapo sile nga cipeziwa ningo.”—Mapi. 27:12.

Twamanya ukuti Yeova akalonda ukutucingilila. Fwandi tusilonda ukuvwana na antu aakaleta ulupato, azingwe nanti aakaleta ivisambilizyo vya ufi. (Loma 16:17; 1 Kol. 5:11; 2 Yoa. 10, 11) Limwi aina yamwi nanti antu aakazanwa na ina amu cilongano yasilondela masunde amuli Baibo. (2 Tim. 2:20, 21) Tulinzile ukwiusya icisinka ci lino tukusoolola ivyuza. Cingatala ukusoolola ningo ivyuza ndi cakuti tukalanda sile nayo ukuomvya mapuloglamu aakutumilapo mameseji.

Cacindama sana ukuya acenjele lino tukusoolola ivyuza sana sana ndi cakuti twaya umu maumba aakalamba akulanzyanyizizyamo. Aina Klistu yamwi yakaingila umu maumba aakalamba aakulanzyanyizizyamo nupya ivikacitika visizipa. Uzye umwina nanti nkazi angacenjela uli ndi cakuti umwi umba lilyo muli antu aingi sana? Cisi canguke ukumanya vino yonsi amwi umba lilyo yaya nanti ndi cakuti yakwata utailo ukome. Pa Masamu 26:4 pakalanda ukuti: “Nsi iizya na antu antumpu, nanti ukuikumika ku antu asomvi.” Mazwi yaa yakutulanga ukuti icintu ca mpomvu cino tungacita u kutumilana sile mameseji na antu yano twamanya ningo.

Nanti sile umwi umba ilinono, Umwina Klistu alinzile ukucenjela pa nsita ino akasumba kulanzyanya na antu yayo alino na malyasi yano yakalanzyanyapo. Tutalinzile ukulola kwati tulinzile ukuwezya mameseji yonsi asi mulandu na vino yakulandapo nanti insita ino tumasumba. Paulo wacelwile Timoti ukutaaluka uku yantu ya “lwambo aakayika umu milandu ya yantu yauze iitayakumile.” (1 Tim. 5:13, NWT.) Na ndakai kwene cangupala sana ukucita vivyo ukuomvya intaneti.

Umwina Klistu uwakula muli vyakwe Leza, atange atemwe ukulanda nanti ukuvwa ilyasi lya nkama nanti ilikulanda iviipe pali ya kapepa yauze. (Masa. 15:3; Mapi. 20:19) Nupya atange atemwe ukuswilizya nanti ukuvwa ukwi lyasi ilili lyonsi ilya kulumbilizya nanti lino atamanyilepo ivisinka vyonsi. (Efes. 4:25) Twakwata ivyeo ivingi ivikalanda pali Baibo na malyasi yano tungataila, pa jw.org na muli puloglamu ya cila mwezi iya JW Broadcasting^®

Ya Nte yamwi yakaomvya maumba kwene yaa ukutumilapo mameseji ndi cakuti yakulonda ukukazya, ukukala, kumanyisya iviya vino yakweti nanti ukwingizya yauze incito. Ukucita vivyo uuculuzi nupya vitalemana nu kupepa Yeova. Umwina Klistu aakalonda ukwikala umi uwa “kuntatemwisya impiya,” atalinzile ukuomvya aina pa kupanga impiya.—Ayeb. 13:5.

Uzye tulinzile ukuomvya mapuloglamu kwene yaa aakutumilamo mameseji ukulenga impiya izya kwazwa aakulondekwa uwazwilizyo nanti aatiyaponelwa nu uzanzo? Twatemwa aina nupya twaikako amano, fwandi ilingi tukaazwa yano yakulondekwa uwazwilizyo nu kuyakomelezya. (Yako. 2:15, 16) Nomba ukucita vivyo ukuomvya maumba aakutumilamo mameseji, cingalenga citalile iofesi lya musambo nanti icilongano ukuyazwa. (1 Tim. 5:3, 4, 9, 10, 16) Nupya citange cizipe ukulenga antu yaelenganya ukuti iyatusoolola umu nzila iiyele ukusakamala aina.

Tukalondesya ukucita ivintu ivingaleta ululumbi kuli Leza. (1 Kol. 10:31) Fwandi nga mwasoololapo ukuomvya mapuloglamu aakutumilamo mameseji, mwaelenganya pa mazanzo aangayako nupya mwaya acenjele.