Jet Kũrjin ro rej kõjerbal jeel̦boon, kampiutõr ak men ko ãierl̦o̦kwõt ñan kõnnaan ippãn baam̦le ko aer im rũttõmak ro jeid im jatid. Bõtab, juon Kũrjin erũtto ilo tõmak enaaj keememej wõt naanin kakapilõk in, me ej ba: “Juon armej emãlõtlõt, ej lo nana eo im ej tilekek; a ri-bwebwe eo ej wõnm̦aanl̦o̦k im jorrããn kake.”​—JK. 27:12.

Jemel̦el̦e bwe Jeova ekõn̦aan kõjparok kõj. Kõn men in, jejjab kõm̦m̦ao ippãn ro rej kõm̦m̦an jepel, ro rebukwel̦o̦k, im ro rej kowõnm̦aanl̦o̦k l̦õmn̦ak ak katak ko rebõd. (Rom 16:17; 1 Kor. 5:11; 2 Jon 10, 11) Jet me rej kobatok ilo eklejia eo, remaroñ jab pokake kien ko ilo Baibõl̦. (2 Tim. 2:20, 21) Jej keememej men kein ñe jej kããlõt ro jej m̦õttãik er. Bõtab, emaroñ jab pidodo ñan kõm̦m̦ane men in ñe jej kõjerbale app ko me rej ñan message ro jet.

Eaorõk ñan kõjparok wõn ro jej kõm̦m̦ao ippãer, el̦aptata ñe elõñ armej ro rej pãd ilo juon kurub in message. Ewõr jet Kũrjin ro rar pãd ilo kurub rot kein, im ewõr men ko rejjab em̦m̦an rar wal̦o̦k itok jãn aer ãindein. Ewi wãween an juon jeid im jatid maroñ kõjparok el̦aññe ewõr bukwi ak to̦ujin armej ro ilo juon kurub? Jeban maroñ jel̦ã ñan jidik kõn aolep armej rein ilo kurub in im kõn kain armej rot er im jel̦ã el̦aññe em̦m̦an jem̦jerã eo aer ippãn Jeova. Sam 26:4 ej ba: “Ijjab jijet ippãn armej ri-riab, im ijjãmin etal ippãn ro ri-jel̦ã m̦on̦.” Men in ejjab ke kwal̦o̦k bwe jen kõjerbal app in message ko ñan kõnnaan wõt ippãn ro me jejel̦ã kajjier?

Meñe juon Kũrjin ej pãd ilo juon kurub in message edikl̦o̦k, ak ej aikuj in kõjparok wõt kõn joñan iien ko ej jol̦o̦k ñan jeje ñan rein im kõn ta ko rej kõnnaan kaki. Jen jab bõk l̦õmn̦ak eo bwe jej aikuj in bar jejel̦o̦k ñan message ko aer, jekdo̦o̦n ta ko rej kõnnaan kaki ak ewi toon an naaj bõk iien ñan kõm̦m̦ane men in. Paul ear kakkõl Timote kõn “ro rej bõk kun̦aaer ilo men ko ejjel̦o̦k aer l̦o̦k ie.” (1 Tim. 5:13) Ilo raan kein, juon emaroñ bar kõm̦m̦ane men in ilo online.

Juon Kũrjin erũtto ilo tõmak eban kwal̦o̦k ak roñjake jabdewõt naanin kõnanaik ko kõn ro jeid im jatid ak kõn jabdewõt men ko ejjab tõllo̦kũn an ro jet jel̦ã kaki. (Sam 15:3; JK.  20:19) Bareinwõt, eban ãliji ak roñjake jabdewõt nuuj ko rekõl̦l̦apl̦ap ak me ejjab jel̦ã ñe relukkuun m̦ool. (Eps. 4:25) Em̦ool bwe ikijjeen weepjait eo ad jw.org im ilo JW Broadcasting^® eo kajjojo allõñ, jej bõk elõñ m̦õñã ko ilo kõkkar im kõjjel̦ã ko me jemaroñ lõki.

Jet Kũrjin ro rej kõjerbali kein message kein ñan wia, wiakake, im karreelel kõn m̦weiuk ko ak lel̦o̦k jerbal ñan ro jet. Men kein rej ñan peejnej, im rejjab m̦õttan ad kabuñ ñan Jeova. Kũrjin ro me rekõn̦aan bwe ren “jab arõk jããn ñan jidik ilo wãween [aer] mour” reban kõjerbal ro jeid im jatid ñan kajjioñ kõm̦m̦an jããn.​—Hib. 13:5.

Ak ta el̦aññe jej kõjerbal app in message ko ñan kõm̦m̦an jããn in jipañ ñan ro jeid im jatid me rej pãd ilo aikuj ak ñan ro rar iioon jorrããn jãn l̦añ ko rel̦l̦ap? Kõn ad yokwe doon, ekkã ad m̦õn̦õn̦õ in jipañ im kõketake doon. (Jem. 2:15, 16) Bõtab ad kajjioñ kõm̦m̦ane men in ilo juon kurub in message me elõñ armej ro ie, emaroñ ko̦kkure karõk ko rem̦m̦anl̦o̦k me ra eo ak eklejia eo rar kõm̦m̦ani. (1 Tim. 5:3, 4, 9, 10, 16) Im ejjel̦o̦k pere bwe ejjel̦o̦k juon iaad ekõn̦aan kõm̦m̦an bwe armej ren l̦õmn̦ak bwe em̦õj kããlõt kõj ilo juon wãween ejejuwaan ñan loloodjake ro jeid im jatid.

Jekõn̦aan kõm̦m̦ani men ko me rej bõktok aiboojoj ñan Anij. (1 Kor. 10:31) Kõn men in, el̦aññe jej pepe in kõjerbale app in message ko ak jabdewõt kain kein jerbal ko rekapeel, l̦õmn̦ak kõn men ko rekauwõtata remaroñ wal̦o̦k, im lukkuun kõjparok.