Addibila amodha enolabihedha tekonolojiya wihina ethapanyege ni amudhiwa vamodha ni addibila. Mbwenye makiristawu owithwelavo omuzimuni enohara yolaga ela: ‘Muthu ooxaga oona yowopiha onowipita, mbwenye oolodhowa onosusedhawo ofiyedha wiherula.’ — Pro. 27:12.

Nihinona wi Yehova anafuna anibarele. Bumwahaya kannathapanya ni athu enaveda onimwalaniha, ninga athu otxosiwa obe naari enaviriganiha dholebela. (Rom. 16:17; 1 Cor. 5:11; 2 João 10, 11) Ohiya eyo ehikala athu amodha enatugumana ni iyo, mbwenye ehinawiwelela malamulo a mBibliyani. (2 Tim. 2:20, 21) Podi okala ethu yorusa wasakula akwihu nnafunihu wathapanyanaga mu aplikativu a mensaje.

Enohoweleya okala pasope thabwa-thabwa akala gurupu ya mensaje ninnihuna ehunnuwa. Amodhaya yahivolowa gurupu dhendha, mbwenye osogolowa yahikanna makathamiho owinjhiva. Munikuruni mwa mazana obe mwa matxikwi ni matxikwi aathu yere okala yorusa wanona atene ni onona epaddi yewa ya omuzimuni. Muthu anavolowa gurupu yela, onotonyihedha wi muthu oxaga? Salmos 26:4 anawoga egi: ‘Kaginakirati ni athu owoota ginowarabela ale enakuwa emuthu yewa.’ Yolebela ela enotonyihedha wi okala muthu oxaga yakale othapanya naathu nanonihu kove ni kove.

Podive akala gurupu ehunnuwa obe naari, mukiristawu anofwanelela wikoha: Gurupu ela athuya enathapanya muselu baani? Mudhidhi mungasi ginanongimi ngali mugurupuni muna? Mensaje enavokiwa podi osorihaga muselu dhohiyana-iyana, mbwenye iyo kannawaddihedhiwa wakula mwaha dhatedhene dhinathapanyiwa. Pawulo ahimukongomedha Timotiyu okala pole-pole ni athu oowaba ni enavolowela muselu dhaakwiwa. (1 Tim. 5:13) Eyo podi opadduwa peno naathu enalabihedha internet.

Kavo mukiristawu owithwa omuzimuni onafuna omuwoga mukwaye obure newene owoga muselu dhoviteya wodhela oliye, thabwathabwa ovuruwana muselu dhinasorihiwa. (Sal. 15:3; Pro. 20:19) Oliye kanathapanya muselu obe naari ovirisedha muselu dhahinniyena ebaribari. (Efé. 4:25) Mwebaribarene site yehu jw.org ni maporogarama enakumelela vamwerini ninga JW Broadcasting^® ehikanna muselu dhapama dhinakumela mBibliyani ni muselu dhixa.

Addibila amodha enowalabihedha aapilikativo a mensaje wihina yasayele addibila amodha enahowela mabasa obe naari waweddamo malondda. Dhithu ninga ndha kadhiniwanana ni webedha webaribari wa Yehova. Mukiristawu ahinafuna ‘odhivela korowa’ kanadha erana ethu ninga yela. — Heb. 13:5.

Nerege wi ethu yabure walabihedha apilikativo wihina naalobe addibila korowa nakaviheranaga ale anahowela obe efwanyiwe ngovi? Ebaribari wihina nnowadhivela addibila ni nnofuna wakavihera yahowelaga. (Tia. 2:15, 16) Mbwenye walabihedha apilikativo ni makalelo yala podi ovunganyedha mabasa enaapara Filiyale obe naari mulogo. (1 Tim. 5:3, 4, 9, 10, 16) Mwebaribarene, kannafuna witonyihedha wihina di hiyo athomiwe wi naakavihere addibila yala.

Nnafuna nimuthithimihe Yehova. (1 Cor. 10:31) Bumwahaya, nihinalabihedhe aplikativu a mensaje obe ethu emodha enohoweleya okala pasope ni waabiha wubuwela yowopiha erivo.