Se keskij Cristo itokilijkauaj kitekiuiaj celulares o tabletas, uan kiampa monojnotsaj ininuaya ininchampoyouaj o ininuaya toikniuaj. Toikniuaj katli kuali tlaneltokaj, nochipa kiilnamikij tlen kiijtoua Proverbios: “Se tlen tlalnamiki nimantsi momaka cuenta intla imelak uala tlen mauilili uan momanauia. Pero tlen uiuitikej axmomakaj cuenta uan kinajsi tlen kinkokoua” (Prov. 27:12).

Tijmatij Jehová kineki techmokuitlauis. Yeka, amo timouikaj ininuaya maseualmej katli kinekij techxelosej, katli kinkixtijtokej ipan tlanechikoli o katli tlamachtiaj tlen amo melauak (Rom. 16:17; 1 Cor. 5:11; 2 Juan 10, 11). Uelis se keskij katli monechikouaj touaya, amo kichiuaj tlen Biblia kiijtoua (2 Tim. 2:20, 21). Maske uelis amo ouij tijtlapejpenisej ajkia iuaya timouampojchiuasej, uelis kena ouij tijmatisej kema timotlajkuiljuiliaj ininuaya sekinok ipan teléfono o tableta.

Tlaj nojkia tijtekiuisej kampa miakej motlajkuiljuiliaj, moneki timotlatsintokisej ajkia ininuaya peuas timotlajkuiljuilisej. Se keskij toikniuaj katli nojkia kalaktokej kampa miakej motlajkuiljuiliaj kinpanotok tlen amo kuali. Ma timoiljuikaj, ¿uelis kuali tijmatisej ajkia ininuaya timouikaj tlaj tiitstokej kampa motlajkuiljuiliaj tlauel miakej? Amo kema ueliskia tijmatisej ajkia inijuantij elij uan tlaj kuali tlaneltokaj. Salmo 26:4 kiijtoua: “Axkema ninejnentok ininuaya tlakamej tlen tlakajkayauaj, niyon axnimouikatok ininuaya tlen kipiaj ome ininxayak”. Uajka, moneki san timonojnotsasej ininuaya maseualmej katli kena tikinixmatij.

Nojkia, tlaj tiitstokej kampa amo miakej motlajkuiljuiliaj, moneki kuali tikitasej keski tonali tijtekiuiaj uan tlake mokamanaljuiaj. Amo kinamiki timoiljuisej moneki tijnankilisej nochi tlen kiijkuilouaj, maske uelis kamanaltitosej tlen miak tlamantli o tlauel uejkauaj motlajkuiljuiliaj. Pablo kiiljuik Timoteo amo ma mouika ininuaya maseualmej tlen momajtokej “teilnamikisej, uan tlatsintokatinemisej tlen axinincuenta” (1 Tim. 5:13). Ipan ni tonali nojkia pano ni tlamantli ipan Internet.

Toikniuaj katli kuali tlaneltokaj amo kinpaleuiaj katli tetlaijiljuiaj yon katli kiijtouaj tlen amo kinamiki kimatisej sekinok (Sal. 15:3; Prov. 20:19). Amo kitlakakiliaj yon kimoyauaj noticias o tlamantli tlen amo kimatij tlaj nelnelia panotok (Efes. 4:25). Tlaj tijnekij tijmatisej tlamachtili tlen melauak uan tlake nelnelia panotok, uelis tijtemosej ipan jw.org uan ipan JW Broadcasting^® tlen kisa sejse metstli.

Se keskij toikniuaj kitlaliaj kampa motlajkuiljuiliaj tlen kinamakaj, tlen kinekij kikouasej o kintemouaj katli kinekij tekitisej. Tlen kichiuaj amo moneki mouikas ika tlen tijchiuaj kema titlaueyichiuaj. Cristo itokilijkauaj amo kinchiualtiaj sekinok toikniuaj ma kikouakaj se keski tlamantli san pampa kinekij kipiasej miak tomij (Heb. 13:5).

Uan, ¿kinamiki tlajtlanisej tomij kampa miakej motlajkuiljuiliaj pampa kinekij kinpaleuisej toikniuaj katli kintlasojsoljuilik se tlamantli o katli tlaijiyouiaj? Tojuantij tikinikneliaj toikniuaj, uan timotekipachouaj ipan tlen kinpano, yeka tikinpaleuiaj kema moneki (Sant. 2:15, 16). Maske kiampa tijchiuaj, amo kinamiki tikijtosej kampa miakej tlajkuilouaj ma tlapaleuikaj pampa tijtsakuilisej iteki kali Betel o ininteki ueuejtlakamej, katli kinamiki kichiuasej nopa tekitl (1 Tim. 5:3, 4, 9, 10, 16). Yon se Jehová itlajtoltemajka kineki kinextis kejuak kitekimakatokej ma kinmokuitlaui sekinok toikniuaj.

Ika nochi tlen tijchiuaj tijnekij tijueyichiuasej toTeotsij (1 Cor. 10:31). Yeka, tlaj timoiljuijtokej tijtekiuisej kampa miakej tlajkuilouaj, celular, tableta o seyok tlamantli, achtoui moneki kuali timoiljuisej tlen tijchiuasej.