Seki tokniuan kinekij nochipa iniuan tajtoskej ininchankauan uan okseki tokniuan, yejua ika kitekitiltiaj teposmej tein axkan onkakej. Sayoj ke tokniuan akin mochikauaj kiyolpaktiskej Jiova kitakamatij nejin tayolmajxitilis: “Akin tamatkej kiita ouijkayot uan motatia, sayoj ke akin amo kipiaj tamatilis kisentokaj taixpan uan tajyouiaj” (Prov. 27:12).

Tikmatij ke Jiova kineki techyekpias. Yejua ika, amo timouikaj iniuan akin kitemouaj maj amo kuali timouikakan iniuan oksekin, akin kinkalankixtijkej itech nechikol oso akin tamachtiaj tein amo melauak (Rom. 16:17; 1 Cor. 5:11; 2 Juan 10, 11). Sekin akin touan monechikouaj xa amo kitakamatij itanauatiluan Jiova (2 Tim. 2:20, 21). Tikelnamikij nejin keman tikixpejpenaj akoni iuan timouikaskej. Sayoj ke uelis ouij techkisas kuali tikixpejpenaskej akoni iuan timouikaskej keman tikuij aplicaciones kampa se motajkuilouilia.

Komo tiknemilijtokej timokalakiskej itech se grupo kampa miakej motajkuilouiliaj, maj timotajtanikan akonimej iniuan timotajkuilouilijtoskej. Seki tokniuan mokalakianij itech nejin grupos uan kinpanouani tein amo kuali. ¿Keniuj uelis timoyekpiaskej komo semi miakej moajsij itech grupo? Ouij techkisas tikmatiskej akonimej nejon taltikpakneminij uan ox yekmelauj kuali mouikaj iuan Jiova. Salmo 26:4 kijtoua: “Amo nimouika iniuan akin kiuelitaj takajkayauaskej nion iniuan akin kitatiaj keniuj yekmelauj monejnemiltiaj”. Nejin kinextia ke okachi kuali maj timotajkuilouilikan sayoj iniuan akin tikinixmatij.

Hasta itech grupos kampa amo miakej moajsij moneki timoyekpiaskej, porin uelis uejkauak timotajkuilouilijtoskej uan uelis ika motajtojtos tein amo kinamiki. Amo moneki tiknemiliskej ke nochipa moneki titanankiliskej, maski tein yeski ika motajtojtos oso maski uejkauakya tajkuilojtokej. Pablo kiluij Timoteo maj amo mouikani iniuan akin “mochiuakij tajtoleros uan motenkalakijtinemij kampa amo intekiu” (1 Tim. 5:13). Axkan, sekin no uelis kichiuaskej nejin itech Internet.

Tokniuan akin mochikauaj kiyolpaktiskej Jiova amo kinkakij akin kinijijtouaj okseki tokniuan oso kitematiltiaj tein amo moneki momatis, nion yejuan kichiuaj nejon (Sal. 15:3; Prov. 20:19). Amo kikakij nion kitematiltiaj tein ouij tekisa se kineltokas oso tein amo momati ox melauak (Efes. 4:25). Tikseliaj miak tamachtilis tein techpaleuia uan techmatiltiaj miak taman tein melauak itech jw.org, uan tein mejmetstika kisa itech JW Broadcasting^®.

Seki tokniuan kikuij aplicaciones kampa se motajkuilouilia uan ompa kitematiltiaj toni kinamakaj, ke kinekij kikouaskej teisa, ke kitemakaj tekit oso kiteixmatiltiaj seki taman tein monamaka. Nejon ika tekitij uan amo moneki kimaneloskej ika totaueyichiualis. Tokniuan akin amo kinekij “kitasojtatinemiskej [...] intomin” amo kitemouaj motomintiskej inintechkopa tokniuan (Heb. 13:5).

Uan komo tiknekij tikinpaleuiskej tokniuan akin kipanouaj tatasojtilis oso nemij kampa mochiuak se tetsauit, ¿uelis titajtaniskej tomin ika nejin aplicaciones? Kemej tikintasojtaj tokniuan, miakpa tiktemouaj tikinyolchikauaskej uan tikinpaleuiskej komo moneki (Sant. 2:15, 16). Sayoj ke komo titajtanij nepaleuil itech se grupo kampa miakej motajkuilouiliaj, uelis tikchiuaskej maj tokniuan akin tekitij Betel oso tokniuan tayekananij ouij kinkisa kinpaleuiskej, uan tein yejuan kichiuaj okachi tapaleuia (1 Tim. 5:3, 4, 9, 10, 16). Uan tein melauj, nion se tokniuj kineki kiteajsikamatiltis ke yejua kiixtalijkej maj kinyekpia tokniuan.

Ika nochi tein tikchiuaskej tiknekij tikueyitaliskej Dios (1 Cor. 10:31). Yejua ika, keman tikixejekoskej ox tikuiskej se aplicación kampa se motajkuilouilia oso okseki taman, maj itech titanemilikan toni ouijkayomej uelis techualkuilis uan maj tiknextikan tamatilis.