Amanye amaKhristu asebenzisa ezempucuko ukuze athintane lezihlobo labazalwane. Kodwa umKhristu oqinileyo ekukhonzeni uyakhumbula iseluleko lesi esikuZaga 27:12: “Olengqondo uthi angabona ingozi abaleke, kodwa isithutha siyaqhubeka singene enkathazweni.”

Siyakwazi ukuthi uJehova ufuna ukusivikela. Yikho siyamlalela nxa esithi singadlelani labantu ababangela ukwahlukana, abasusiweyo ebandleni kumbe abafundisa izinto ezingamanga. (Rom. 16:17; 1 Khor. 5:11; 2 Joh. 10, 11) Abanye abazalwane ebandleni kumbe labo abazana labo bangabe beziphatha ngendlela engafanelanga. (2 Tim. 2:20, 21) Kumele sikukhumbule lokhu nxa sikhetha abangane. Kodwa kungabanzima ukukhetha kuhle abangane kwezokuxhumana.

Kumele sicabangisise ukuthi ngobani esibakhetha ukuthi babe ngabangane bethu ikakhulu emaqenjini amakhulu kwezokuxhumana. Amanye amaKhristu azithele emanyaleni ngokujoyina amaqembu anjalo. Umzalwane angatshengisa njani ukuthi uqaphile nxa sekusiza emaqenjini alamakhulu kumbe izinkulungwane zabantu? Kungabanzima ukwazi ukuthi bonke bangobani sibili lokuthi benza njani endabeni zokukhonza. IHubo 26:4 lithi: “Kangidlelani labantu abakhohlisayo njalo kangiwelelani labazenzisi.” Siyabe sihlakaniphile ke nxa sixoxa labantu esibaziyo kuphela.

Lanxa iqembu lezokuxhumana lilincane, umKhristu kumele ananzelele ukuthi uqeda isikhathi esingakanani exoxa lokuthi abantu abaseqenjini lelo vele bakhuluma ngani. Akumelanga azitshele ukuthi kufanele aphendule wonke amameseji kungelani lokuthi akhuluma ngani kumbe ukuthi azamthathela isikhathi esinganani. UPhawuli waxwayisa uThimothi ngabanye ‘ababenyeya njalo bengenela indaba zabantu.’ (1 Tim. 5:13) Okwakusenziwa ngabantu labo kungenziwa lakwezempucuko.

UmKhristu oqinileyo ekukhonzeni kasoze achothoze kumbe akhulume indaba zabanye eziyimfihlo. Kanti njalo kasoze alalele nxa abanye bechothoza amanye amaKhristu kumbe bekhuluma indaba zawo eziyimfihlo. (Hubo. 15:3; Zaga. 20:19) Kasoze akhulume kumbe alalele indaba okuzicacelayo ukuthi zifakwe isawudo loba okungelabufakazi bokuthi ziliqiniso. (Efe. 4:25) Kulokudla okunengi okusekelwe eBhayibhilini kanye lezindaba esingazithemba ezitholakala ku-jw.org lakunhlelo ze-JW Broadcasting^® eziphuma nyanga zonke.

Abanye oFakazi basebenzisa ezokuxhumana ukuthenga lokuthengisa lokutshengisa izinto abazithengisayo kumbe ukudinga izisebenzi. Le yibhizimusi futhi kayilani lendaba zokukhonza. Kodwa amaKhristu afuna ukubalekela ‘ukuthanda imali’ kawaqali ukusebenzisa abafowabo labodadewabo ukukhanda imali.—Heb. 13:5.

Kumele sisebenzise ezokuxhumana yini ukuthi sicelele abafowethu labodadewethu abahluphekayo imali kumbe labo abehlelwe ngumonakalo? Siyabathanda abazalwane bethu njalo silendaba labo yikho sijayele ukubancedisa futhi sibakhuthaze nxa bedinga ukusekelwa. (Jak. 2:15, 16) Kodwa ukwenza njalo eqenjini elikhulu lezokuxhumana kungaphambanisa inhlelo ezingcono ezenziwa yiwofisi yegatsha kumbe abadala bebandla. (1 Tim. 5:3, 4, 9, 10, 16) Kanti njalo kakula phakathi kwethu ongafuna abantu bacabange ukuthi ukhethiwe ukwenza umsebenzi oqakathekileyo wokunakekela izimvu zikaNkulunkulu.

Konke esikwenzayo sifuna ukukwenzela inkazimulo kaNkulunkulu. (1 Khor. 10:31) Yikho nxa usebenzisa ezokuxhumana kumbe okunye kwezempucuko, cabanga ngezingozi ezingaba khona njalo uqaphe.