Makristu amweni ari kushandisa aprikativho jabudiswa wari kuti vaenderere mberi vecibhuya no ukama no vamweni. Asi Makristu akaivha kumujimu, anonasa kushandisa ndhungamiriro iyi: “Muzivi anovona bzakaxata, wofindara; mapenji anoenda mberi, otambujwa ndibzona.”—Mazwi Akangwara 27:12.

Itusu tinozwisisa kuti Jehovha anoda kutingwarira. Asi itusu atishamwarijani no vandhu vanodakarira kukashana, vandhu vakajingwa kana vandhu vanomusijira mazano akaposeka. (VaRoma 16:17; 1 VaKorinto 5:11; 2 Johani 1:10, 11) Atee vamweni vanotoviya kumusongano, avazwiri mupango jinowanika mu Bhaibheri. (2 Timoti 2:20, 21) Ngo kudaro, patinonga tecikheta shamwari jedu ngatiambe tarangarira zviro izvi. Asi zvinganesa maningi kunasa kusana shamwari jaushoni patinobhuya navo tecishandisa mesajhi.

Tinodikana kungwarira maningi patinokheta shamwari jedu, maningi-ningi, gurupu ratinotumiranaro mesajhi parinonga rakakura maningi. Makristu amweni akabatana no magurupu akakura, akava no muviyo jakashata. Waro, hama kana hambzaji ingajingwaririsa kudini, kudari gurupu rondhoro rino mazana kana zviuru zvo vandhu? Zvinganesa maningi kuda kuziva umwe nga umwe wavo, kana kutoziva dangani wakaivha kumujimu kana kuti haiwa. Nduyo 26: 4 inoti: “Andigari pasi pamwepo no vanyepi, andifambi no vacengeji.” Ndhungamiriro iyi, inonasa kukhombija kamare kuti tinodikana kutumira mesajhi basi vandhu vatinoziva.

Pikija gurupu rondhoro rikava no vandhu vashoma, hama kana hambzaji inodikana kuvona kuti iri kupeja nguva yakadini yecitara mesajhi mu gurupumo no kuvonazve kuti zvicinyi zviri kubhuiwaro mondhomo. Atidikani kujizwa kuti tinodikana kudavira mesajhi jese, azvinenyi no zvavari kubhuyaro kana vari kupeja nguva yakadini veciita mabhuyo ondhoo. Pauro wakangwaja Timoti ngo pamusoro po vandhu vakaguma pa ‘kurevesa no kughwina mu [shwiro jo vamweni.]’ (1 Timoti 5:13) Nyamasi uno, zvingaitikavo zvakafanana patinonga tecishandisa aprikativho jinotumira mesajhi.

Mukristu wakaivha aanangi nee aapurukiri zviro zvinoshora vamweni kana zviro zvaacikadikani kuziva zvo Zvapupu zvimweni. (Nduyo 15:3; Mazwi Akangwara 20:19) Cimwenizve, aagari ecinanga zviro zvinothyisa zvaakazwa kana kugara ecindonanga zviro zvaacina cokwadi co kuti ndizvona kana kuti haiwa. (VaEfeso 4:25) Asi, itusu tinoashira zviro zvakawanda maningi mu webisaite yedu, jw.org pomwe no urongwa hwo mweji ngo mweji wo JW Broadcasting^®.

Hama jimweni jinoshandisa aprikativho javo jo kutumira mesajhi kuti vatenge, vatengese no kuzivisa zviro zvavanazvo kana kutopekeja vamweni basa. Ijo i shwiro jo nyagoso basi i ajibeseri pa kunamata Jehovha. Makristu acikadi ‘kudisisa upfumi’ aazoshandisi hama javo kuti vawane mare.—Vaheberi 13:5.

Waro, tingati kudini ngo kushandisa mesajhi kuti tihengere mare kuti tibesere hama no hambzaji jedu jinoda besero kana jawihwa ngo ngozi? Kazinji itusu tinokhombija kuti tinoda i tinodakarira hama jedu no kuda kujivangisa. (Jakobo 2:15, 16) Asi kueja kuita zondhozvo mu gurupu rakakura tecishandisa mesajhi, zvingaita kuti Bheteri ro mundharaundhemo pomwe no vakuru vo ungano vanesehwe kubesera hama iji. (1 Timoti 5:3, 4, 9, 10, 16) Zvokadi kamare, itusu atidi kuvoniwa inga kuti takasanwa ndi Mwari kuti tingwarire hama jedu.

Tinodikana kuita zviro zvinozokuja Mwari. (1 VaKorinto 10:31) Ngo kudaro, azvinenyi dangani tiri kushandisa aprikativho iri yese inotumira mesajhi kana mucini uri wese hao, ngatieje kuvona ngozi jingavepo i toita ciri cese kuti tijingwarire.