Aakriste yamwe ohaya longitha iikwaelektronika yoshinanena, opo ya kwatathane noyaandjawo nosho wo nooitaali ooyakwawo. Odhoshili kutya Omukriste a koka pambepo oku na okukaleka momadhiladhilo omayele ngoka taga ti: “Omunawino ota dhimbulula oshiponga e te shi holama, manga aasama taa nduungile yu uka ko e taa itsu musho.” — Omayel. 27:12.

Otu shi kutya Jehova okwa hala oku tu gamena. Nomolwaashono ihaatu endathana naamboka haye eta etopoko mokati ketu, ya kondwa, nenge haya humitha komeho omalongo ga puka. (Rom. 16:17; 1 Kor. 5:11; 2 Joh. 10, 11) Yamwe mboka haye endathana negongalo otashi vulika ya kale ihaaya vulika kiipango yOmbiimbeli. (2 Tim. 2:20, 21) Onkee ano, uuna tatu panga uukuume nagumwe, otu na okukaleka oshinima shoka momadhiladhilo. Okuhogolola ookuume aawanawa ohaku vulu okukala okudhigu, unene tuu ngele otatu shi okupitila momakwatathano gopaelektronika.

Osha simana okuhogolola nuukeka ookuume, unene tuu ngele mongundu yeni yokwiitumina omatumwalaka omu na aantu oyendji. Sho Aakriste yamwe ya wayimine ongundu onene yokwiitumina omatumwalaka, oshe ya etele iizemo iiwinayi. Mbela omumwatate nenge omumwameme ota vulu ngiini okuhogolola ookuume pandunge, ngele oku li mongundu mu na aantu omathele? Odhoshili kutya otashi ka kala oshidhigu oku ya tseya nawa ayehe nosho wo uupambepo wawo. Ashike, Episalomi 26:4 otali ti: “Kandi na uukuume naantu yaa fele; kandi na ko nasha naayiningithi.” Mbela enyolo ndyoka itali ulike kutya oshi li pandunge okukala owala ho kwatathana naamboka wu shi nawa?

Nokuli nuuna mongundu yokwiitumina omatumwalaka mu na owala aantu aashona, Omukriste oku na okukotokela ethimbo ndyoka ha longitha mokutuma omatumwalaka nosho wo kutya ohaya kala taya popi kombinga yashike. Katu na okukala tu uvite kutya otu na okugalula etumwalaka kehe tatu tuminwa, kashi na nduno mbudhi kutya omuntu ota popi kombinga yashike nonokutya otashi tu pula ethimbo li thike peni. Paulus okwa li a londodha Timoteus shi na ko nasha nayamwe mboka yi ‘igilila okupopyagana nokwiitula miinima yaantu.’ (1 Tim. 5:13) Kunena, oshipu okuninga iinima mbyoka okupitila miikwaelektronika.

Omukriste a koka pambepo ita ka pulakena nenge a popile muuwinayi aamwahe, nokuholola iiholekwa yawo. (Eps. 15:3; Omayel. 20:19) Ita ka pulakena nenge a hokolole iinima kee na uushili muyo. (Ef. 4:25) Ohatu mono iikulya oyindji yopambepo nuuyelele wu li pethimbo nowu shi okwiinekelwa kepandja lyetu lyokointaneta, jw.org nosho wo okupitila mopolohalama yotiivii JW.

Oonzapo dhimwe ohadhi landitha, hadhi landa nokutseyitha iipindi yadho nenge oompito dhiilonga, tadhi longitha oopolohalama dhokutuma omatumwalaka. Ndjono ongeshefa, kayi na sha niinima yopambepo. Aakriste mboka ya hala okukala ya ‘manguluka ko kohole yeliko’ ohaya yanda egamo lyokulikola iimaliwa okupitila maamwahe. — Heb. 13:5.

Ongiini kombinga yokutumina yamwe omatumwalaka tatu ya pula iimaliwa yoku ka kwathela ooitaali ooyakwetu mboka ye na ompumbwe nenge mboka ya dhengwa kiiponga yopaunshitwe? Olundji ohatu ulike kutya otu na ko nasha nayalwe moku ya kwathela nomo ku ya tsa omukumo. (Jak. 2:15, 16) Ihe ngele otwa kambadhala oku shi ninga okupitila moongundu oonene dhokutuminathana omatumwalaka, kungawo otatu ka ya moshipala omalongekidho ngoka taga ningwa koshitayimbelewa nenge kegongalo, opo aamwatate mboka ya kwathelwe. (1 Tim. 5:3, 4, 9, 10, 16) Inatu hala okuningitha yamwe ya dhiladhile kutya otse twa pewa oshinakugwanithwa shokusila oshimpwiyu oonzi dhaKalunga.

Otwa hala okuninga shoka tashi simanekitha Kalunga. (1 Kor. 10:31) Onkee ano, uuna wa hala okulongitha opolohalama yokutuma omatumwalaka nenge omukalo gulwe, dhiladhila kiilanduliko, e to kala wa kotoka.