Sekimej tokniuan kintekitiltiaj seki aplicaciones niman ijkon nonojnotsaskej imiuan inchanejkauan niman oksekimej tokniuan. Melauak, tokniuan akin chikauak kipiyaj intlaneltokil nochipa kilnamiktokej yejuin: “Sen tlakatl yejuan kuajli tlanemilia, ijkuak kita itlaj xkuajli nochiua, nejkuania. Pero sen yejuan xkuajli tlanemilia, yej más yau, niman ijkon itlaj ipan nochiua” (Prov. 27:12).

Kuajli tikmatstokej ika Jehová kineki techtlajpiyas. Ika yejon, xtonotsaj imiuan akin texexelouaj, akin yokinkixtijkej itech tlanechikojli nion imiuan akin temachtiaj tlen xmelauak (Rom. 16:17; 1 Cor. 5:11; 2 Juan 10, 11). Kanaj sekimej akin touan nosentlaliaj ipan tlanechikojli xkitlakamatstokej tlen toTajtsin techijlia (2 Tim. 2:20, 21). Ijkuak yakaj tikixmatstokej niman miyekpa tikitanij, xtechtekiyomaka tikitaskej tla uelis yes toamigo noso ka. San ika, ijkuak yakaj xkeman tikitanij niman san tikixmatij ipan Internet, más techtekiyomaka tikitaskej tla uelis yes toamigo.

Melak noneki matotlajpiyakan tla tikinkuij aplicaciones kampa notitlanij mensajes niman tla tinemij ipan se ueyi grupo. Sekimej tokniuan akin yonenkej ipan uejueyimej grupos kampa notitlanij mensajes yokixnamijkej tlen xkuajli. San ika, ¿kenon uelis totlajpiyaskej tla tinemij ipan se grupo kampa melak miyekej nemij? Ijkuak melak miyekej nemij ipan se grupo, ouijtika tikmatis akinomej ompa nemij niman tla yemelak kuajli kitekichiuilijtokej Jehová. Salmo 26:4 kijtoua: “Xkaman ninouika iminuan on tlakajkayajkej, nion ninosentlalia iminuan on omexayakyejkej”. ¿Xmelak ika más kuajli tla san tonojnotsaj imiuan akin kema tikimixmatstokej niman tikimitanij?

Maski tla tinemiskiaj ipan se grupo kampa xmiyekej nemij, noneki totlajpiyaskej maka melak uejkaujtipan ompa tontlajkuilojtoskej. Niman, noneki totlajpiyaskej itech tlen ompa noijtoua. Maka matiknemilikan ika noneki nochipa tikinnankiliskej on mensajes tlen ompa kinuajtitlanij, maski tla oksekimej san itech yejon tlajtotokej. Pablo okijli Timoteo maka manouika imiuan akin tetejteneuaj nion imiuan akin “nochi ika nokalaktiaj niman peua tlamach kijijtouaj” (1 Tim. 5:13). Yejuin techititia ika aman noijki noneki totlajpiyaskej hasta ipan Internet.

Akin chikauak kipiyaj intlaneltokil xnokalaktiaj kampa tetejteneuaj nion kampa noijtoua tlen san sekimej noneki kimatiskej (Sal. 15:3; Prov. 20:19). Yejuamej xkikakij nion xkiteijliaj noticias tla xkimatij tla yemelak ijkon onochiuj (Efes. 4:25). Tla tejuamej tiknekij itlaj tikasikamatiskej, kuakon, uelis tikalakiskej ipan sitio jw.org noso ipan JW Broadcasting^®. Ompa, ikalpan Jehová kitlalia nochi tlen ika uelis tikchikauaskej totlaneltokil niman noijki kintlalia noticias tlen kema uelis tikinneltokaskej.

Sekimej tokniuan kintekitiltiaj aplicaciones kampa notitlanij mensajes niman ijkon tlanemakaskej, tlakouaskej noso kitetekiuiltiskej tekitl. Tla tikitaj, ipan yejuin aplicaciones uelis nochiuas miyek tlemach, san ika, tejuamej xkipiya ika tikinkuiskej para ompa tikueyichiuaskej toTajtsin. Tokniuan akin nokojtiliaj nemiskej san ika achijtsin tomin, xkinekij san intech oksekimej tokniuan kitlantoskej tomin (Heb. 13:5).

¿Kuajli yes tla tikinkuij yejuin aplicaciones niman ijkon tikinpaleuiskej tokniuan akin xkipiyaj tomintsin noso akin chantij kampa tlaixpoliui? Melauak ika tiknekij tikinpaleuiskej tokniuan niman tikinyolchikauaskej pampa melak tikintlasojtlaj (Sant. 2:15, 16). San ika, xkuajli yeskia tla tikchijchiuaj se grupo san pampa tiknekij tikinpaleuiskej niman tikinyolchikauaskej. ¿Tleka? Pampa tikchiujtoskiaj se tekitl tlen xtejuamej technamiki matikchiuakan. Matikilnamikikan ika yejon itekiyo sucursal noso intekiyo tlayekankej akin nemij ipan tlanechikojli. Tikmatstokej ika yejuamej más kuajli kichiuaskej intekiyo (1 Tim. 5:3, 4, 9, 10, 16). Noijki, nion se tokniuj xkipiya ika kinemilis ika san yejua akin noneki kintlajpiyas tokniuan.

Tiknekij ika nochi tlen tikchiuaj makiueyichiua toTajtsin (1 Cor. 10:31). Ika yejon, ijkuak tiknemiliskej tla tikinkuiskej aplicaciones kampa notitlanij mensajes noso okse tecnología, matitlanemilikan itech tlen ueliskia panos niman matotlajpiyakan.