Fakaaoga he falu Kerisiano e tau matini foou he vahā nei ke matutaki mo e tau magafaoa mo e tau matakainaga. Ka e tokaloto he Kerisiano motua fakaagaaga e fakatonuaga nei: “Kua kitia he tagata lotomatala e kelea, mo e fakamumuli ai a ia; ka ko e tau tagata goagoa, kua o age ai a lautolu, ti fakahala ai a lautolu.”​—Fakatai 27:12.

Loto fakaaue a tautolu ha kua manako a Iehova ke puipui a tautolu. Ti nakai fio a tautolu mo lautolu ne fakatupu e feveheveheaki, kua tuku ki tua, po ke fakaohooho e tau manatu hepe. (Roma 16:17; 1 Kori. 5:11; 2 Ioa. 10, 11) Falu kua lafi mo e fakapotopotoaga kua liga nakai omaoma ke he tau matafakatufono he Tohi Tapu. (2 Timo. 2:20, 21) Tokaloto e tautolu e mena nei ka fifili e tau kapitiga ha tautolu. Ko e fifili e tau kapitiga mitaki kua liga nakai mukamuka ke taute ka fakaaoga e polokalama feutaaki vala tala.

Uho pauaki e mena nei ka fifili e tau kapitiga hako he matakau lahi ka feutaaki e tau vala tala. Falu he tau Kerisiano kua putoia ke he tau matakau lalahi kua kelea e fua ne moua mai. Maeke fēfē he matakainaga taane po ke fifine ke fakaeneene ka totou teau po ke totou afe i loto he matakau? To nakai maeke ke iloa mooli a lautolu oti ia mo e tuaga fakaagaaga ha lautolu oti he matakau. Ia Salamo 26:4 ne pehē: “Nakai nofo au mo e tau tagata matahavala; ti nakai fano au mo e tau tagata pikopiko.” Fakakite he mena nei kua pulotu ni ke matutaki mo e tau tagata kua iloa e tautolu.

Pete ka tote e matakau kua feutaaki e tau vala tala, lata e Kerisiano ke mailoga e lahi he magaaho mo e tau mena ne fakatutala a lautolu ki ai. Nakai kakano kua lata a tautolu ke fai manatu ke he tau vala tala ia, pete foki kua loa e magaaho he fakatutala ki ai. Hataki e Paulo a Timoteo hagaao ki a lautolu kua ‘fa fakatutala mo e hanihani’ ke he tau mena he falu. (1 Timo. 5:13) Mogonei, maeke foki ke taute taha mena pihia puhala he tau meli hila.

To nakai talahau he Kerisiano motua fakaagaaga e tau vala tala ekefakakelea po ke fakakite e tau vala tala galo he tau matakainaga. (Sala. 15:3; Fakatai 20:19) Kalo kehe foki a ia he fatiaki po ke fanogonogo ke he tau vala tala nakai fai fakamooliaga. (Efeso 4:25) Loga e vala tala mitaki ne fakavē ke he Tohi Tapu mo e tau hokotaki mauokafua mai he ha tautolu a faahi kupega hila jw.org mo e tau fakaholoaga he tau mahina takitaha he JW Broadcasting^®.

Fakaaoga he falu matakainaga e tau meli hila ke sela, fakatau, mo e fakatātā e tau koloa po ke foaki e gahua. Ko e tau mena fakapisinisi a ia, nakai ko e vala he tapuakiaga ki a Iehova. Ko e tau Kerisiano kua manako ke kalo kehe he “velevelekoloa” kua totoko e kamatamata ke fakaaoga e tau matakainaga ha tautolu ke moua tupe.​—Hepe. 13:5.

Kua lata kia a tautolu ke fakaaoga e tau polokalama he initanete ke ole tupe ke lagomatai aki e tau matakainaga ha tautolu kua mativa po ke matematekelea ha ko e tau mena tutupu fakaofo? Fa fakakite tumau e tautolu e fakaalofa he lagomatai mo e atihake e taha mo e taha. (Iako. 2:15, 16) Ka ko e lali ke taute pihia puhala he tau matakau lalahi he meli hila kua liga fakatauhele e tau fakatokaaga mitaki ne taute he la ofisa he matakavi po ke fakapotopotoaga. (1 Timo. 5:3, 4, 9, 10, 16) Nakai fai ia tautolu kua manako ke kitia mai he tau tagata kua fifili pauaki a tautolu ke leveki e tau matakainaga ha tautolu.

Manako a tautolu ke taute e tau mena kua fakaheke e Atua. (1 Kori. 10:31) Ti ka fifili a tautolu ke fakaaoga e tau polokalama he initanete po ke tau meli hila, manamanatu ke he tau hagahagakelea mo e mataala.