Amanye amaKrestu asebenzisa zetheknoloji bona athintane nemindenawo kunye nabanye aboFakazi. UmKrestu ovuthiweko kuzokufuze acabangisise ngeselulekwesi: “Ovuthiweko nabona ingozi uyabhaca kodwana abanganalwazi bayaragalala, bahlupheke.”—IzA 27:12.

Siyazwisisa ukuthi uJehova ufuna ukusivikela. Kungebangelo singazihlanganisi nabantu abathanda ipikiswano, abantu abasusiweko ngitjho nalabo abanemibono engakafaneli. (Rom. 16:17; 1 Kor. 5:11; 2 Jwa. 10, 11) Abanye abakhona ebandleni kungenzeka bangaziphathi ngendlela efaneleko begodu bangayilaleli imithetho yeBhayibheli. (2 Thim. 2:20, 21) Nasifuna ukwenza ubungani nabanye, kufuze sikukhumbule lokhu. Ukukhetha abangani angekhe kwaba bulula nasikwenza ngokuthumelelana imilayezo.

Ukukhetha abantu esizihlanganisa nabo kuqakathekile, khulukhulu nasithumelelana nabantu imiyalezo. Amanye amaKrestu khewaba yingcenye yesiqhema esikhulu begodu lokho kwaletha imiphumela ebuhlungu. Umfowethu namtjhana udadwethu khuyini angayenza bona atjheje lokha nakasesiqhemeni esinabantu abamakhulu namkha abaziinkulungwana esithumelelana imiyalezo? Angeze kwakghoneka bona abazi kuhle abantu aqoqa nabo nokuthi ubuhlobo babo noJehova bunjani. IRhubo 26:4 lithi, “Angihlali neengilamkhuba, namkha ngizihlanganise nabazenzisi.” Umtlolo lo ukuveza kuhle ukuthi kukuhlakanipha ukhuluma kwaphela nabantu obaziko.

Ngitjho nalokha abantu aqoqa nabo babancani, umKrestu kufuze atjheje bona singangani isikhathi abanaso kwezokuthintana, atjheje nezinto akhuluma ngazo. Akukafuzi sibe nomuzwa wokuthi kufuze siphendule omunye nomunye umyalezo kwezokuthintana begodu kungakhathaliseki ukuthi kukhulunywa ngani nokuthi kuthatha isikhathi esingangani ukhuluma ngezintwezo. UPowula walemukisa uThimothi ngabantu abathileko ‘ebebazokuthanda iindaba zabanye bakhulume nalokho ekungakakafaneli bona bakutjho.’ (1 Thim. 5:13) Nanamhlanjesi kubulula khulu ukukhuluma ngezintwezo.

Akakho umKrestu ovuthiweko ongakhuluma kumbi ngabanye, akhulume ngeendaba ekungakafaneli namkha akhulume ngeendaba eziyifihlo zamanye amaKrestu. (Rhu. 15:3; IzA. 20:19) Uzokubalekela ukukhuluma ngeendaba ezithusako namtjhana imibiko engakaqinisekiswa. (Efe. 4:25) Minengi imibiko evela eBhayibhelini esiyifumanako ngezinzolwazi i-jw.org kunye ne-JW Broadcasting eza qobe ngenyanga.

Amanye amaKrestu asebenzisa izinto ze-elekthronikhi bona athenge, athengise begodu akhangise ngezinto zabo, anikele nabanye amathuba womsebenzi. Izintwezo zizinto eziphathelene nemisebenzi ingasi izinto eziphathelene noJehova. AmaKrestu akukafuzi ‘abe nethando lemali’ begodu kufuze abalekele ukusebenzisa amanye amaKrestu bona abenzele imali.—Heb. 13:5.

Kuthiwani ngokusebenzisa zokuthintana bona benze isikhwama sokusiza amaKrestu ehlelwe ziinhlekelele? Siyabathanda abafowethu nabodadwethu begodu kanengi sinendaba nokusiza, khulukhulu labo abatlhoga ukusekelwa. (Jak. 2:15, 16) Nasingalinga ukwenza njalo sisebenzisa zokuthintana, lokho kungaphikisana nehlelo le-ofisi legatja namkha ihlelo lebandla. (1 Thim. 5:3, 4, 9, 10, 16) Asifuni ukwenza abantu bacabange ukuthi sinesabelo esikhethekileko sokusiza izimvu zakaZimu.

Sifuna ukuphazimulisa uZimu. (1 Kor. 10:31) Yeke, nawuzokuqunta bona uzisebenzise zokuthintana namkha awa, kuzokuba kuhle ukucabanga ngeengozi ezingabakhona begodu uzibalekele.