Ovakuatate vamwe vaundapesa o Internete opo vatomphole nonombunga mbavo novakuatate ovakuavo. Mahi omukuatate wapama motyili una okuhinangela okuti: “Omuna-ndunge umona otyitateka iya ainkholo mahi omuhima kesukile.” — Pro. 27:12.

Onthue tutyii nawa okuti Siovaa uhanda okutuyakulila. Otyo tuhatompholela na vana vayapula vakuavo, na vana vapolwa mewaneno, na vana vatyitukilapo otyili. (Loma 16:17; 1 Kol. 5:11; 2 Suau 10, 11) Vamwe namphila veya apeho komaliongiyo mahi kavalandula ovitumino vya Siovaa. (2 Tim. 2:20, 21) Mokonda yotyo, tyipondola okutupuiya unene okuholovona omapanga, haunene vana tutomphola navo Internete.

Pamwe mo Internete ovanyingi vehole okulinga ovikundyi viokutomphola. Tyina tuli movikundyi ovio, otyiwa okulunguka mokonda ovanyingi vakalele movikundyi ovio, vakalele novitateka ovinyingi. Omokonda yatyi? Okuti omukuatate ulipaka motyikundyi muna ovanthu ovanyingi, vamwe ehenemone-ale walunguka? Au, mokonda motyikundyi otyo, katutyivili okunoñgonoka oñgeni kese umwe ekahi, no ñgeni oupanga wa kese umwe na Huku ukahi. O Salmo 26:4 yati: “Hikala novanthu vokukemba, ndyilityilika ovanthu vokuholeka etyi vekahi.” Otyo tyilekesa okuti, hahe vali okulituma onomesasi novanthu wii nawa, wamuene-ale.

Namphila motyikundyi muna ovanthu vehehi, mahi otyiwa omukuatate elipule okuti: Oityi ovanthu ava veli nokutomphola? Omuvo ulifuepi nakalamo-ale? Motyikundyi otyo mupondola okupopiwa ovipuka ovinyingi, mahi hakuti nove una okupopia-po. Paulu wapopilile Timotiu okuti: Wahapopie “ovityapi nokulipaka povipuka viamuene.” (1 Tim. 5:13) Otyo tyipondola okumoneka tyina tulituma onomesasi mo Internete.

Petupu omukuatate nawike wapama motyili, upondola okupopia omapita omukuatate wae, nokupopia ovipuka viamuene, ine okuvitehelela. (Sal. 15:3; Pro. 20:19) Tupu wesukisa okulityilika okupopia ovipuka ehei nawa. (Efe. 4:25) Etyi tupondola okutala, otyetyi tyili mo site yetu no mo JW Broadcasting^® Omo tuvasa-mo ovipuka oviwa konthele yovakuatate vetu. Iya atyiho tyipopiwa-mo otyili.

Ovakuatate vamwe vatuma onomesasi kuvakuavo mokonda vahanda okuavela vakuavo ovilinga, ine pamwe vena ovipuka valandesa. Mahi katupondola okuhonyeka efendelo lya Siovaa no noniñgoso. Omukuatate wahahande okukala “nohole nonombongo” ulityilika okulinga ovipuka vimulingisisa okumonena movakuatate vae. — Heb. 13:5.

Inkha ovakuatate vatumbukilwa notyiponga ine vena ovitateka, tupondola okutuma omesase mo Internete opo tuite onombongo tuvekuateseko? Tyili tuhole umwe ovakuatate vetu, iya tuhanda umwe okuvekuatesako. (Tia. 2:15, 16) Mahi ankho tutuma omesasi tupondola okutyopola etyi ovakuatate Mombetele, no mewaneno vekahi nokulinga opo vevekuateseko. (1 Tim. 5:3, 4, 9, 10, 16) Tupu katuhande okulilekesa kovanthu ngatyina onthue tuakoyua opo tukuateseko ovakuatate ovo.

Tuhanda okulinga ovipuka vinkhimaneka Huku. (1 Kol. 10:31) Tyina tusoka, inkha matutumu onomesasi no nofoto no novidiu kuvakuetu, otyiwa okusoka kovitateka tupondola okukala navio, atulunguka.