Abakristaayo abamwe nibakoresa entunguuka eriho omu by’empurizana kuguma nibahurizana n’abanyabuzaare n’ab’eishe-emwe bagyenzi baabo. Kwonka, Abakristaayo abakuzire omu by’omwoyo baine kuguma nibaijuka obuhabuzi obu: “Omwerinzi ku areeba akabi kaija, ayeshereka, kwonka otaine bwengye akeegyema, kamwita.”​—Enf. 27:12.

Nitwetegyereza gye ngu Yehova naayenda kuturinda. N’ahabw’ekyo, titurikukwatanisa n’abarikureetaho okwebaganisamu, ababingirwe, nari abarikwegyesa ebishuba. (Rom. 16:17; 1 Kor. 5:11; 2 Yoh. 10, 11) Bamwe omu ekibiina nibabaasa kuba batarikutwaza omu muringo ogurikuhikaana n’emitindo ya Baibuli. (2 Tim. 2:20, 21) Twaba nitusherura abanywani, twine kwijuka enshonga egi. Okutoorana abanywani barungi nikibaasa kuguma waaba nookoresa emiringo y’okwohererezana obutumwa.

Twine kuba abeegyendesereza kyahika aha nshonga y’okuhurizana n’abantu baingi turikukoresa emiringo y’okwohererezana obutumwa. Abakristaayo abamwe nibakwatanisa na guruupu mpango omu miringo y’okuhurizana, kandi ebirugiremu ti birungi. Mbwenu shi buzima nikibaasika ow’eishe-emwe nari munyaanyazi-itwe kwerinda yaaba naakwatanisa na guruupu erimu abantu baingi? Ngaaha buzima, nikibaasa kuguma kumanya emitwarize y’abantu boona abari omu guruupu egyo n’embeera zaabo ez’eby’omwoyo. Zaaburi 26:4 nihagira hati: ‘Tindikushutama na bantu bataine mugasho, kandi tindikukwatanisa n’endyarya.’ Mbwenu shi eki tikishemereire kukuhiga kukoresa omuringo gw’okuhurizana n’abu orikumanya bonka?

Nangwa n’obu yaakuba guruupu y’abantu bakye, Omukristaayo aine kubaririra gye obwire bwe n’ebigyendererwa bye. Titurikwenda kufa gakoragana n’abandi n’obu baakuba nibagamba ahari ki nari n’obu baakuba nibamara bwire ki aha miringo y’empurizana egyo. Paulo akarabura Timoseo aha bantu ‘abarikubuzya orukuru, kandi bakeetaasya omu bitari byabo.’ (1 Tim. 5:13) Hati, nikibaasika omuntu kutwaza atyo arikukoresa ekyoma.

Tihaine Omukristaayo okuzire omu by’omwoyo oshemereire kugambuura abandi, kuhurikiza engambo nk’ezo, nari kusheeshuura ebihama by’ab’eishe-emwe. (Zab. 15:3; Enf. 20:19) Kandi naija kwetantara kujanjaaza amakuru agongyeirwemu ebishuba nari agataine buhame. (Efe. 4:25) Nitukira kutunga eby’okurya by’omwoyo, amakuru agarikwesigwa na puroguraamu za JW Broadcasting^® kurabira aha jw.org.

Abajurizi ba Yehova abamwe nibakoresa emiringo y’okwohererezana obutumwa kuguza ebintu, kugura ebintu, n’okurangirira ebintu, nari kusherura abakozi. Ezo n’enshonga z’eby’obushuubuzi, tiziine kakwate n’okuramya Yehova. Abakristaayo tibaine kugira “omutima ogurikukunda” esente, kandi baine kwetantara omuze gw’okukora esente omu b’eishe-emwe bagyenzi baabo.​—Heb. 13:5.

Kandi shi aha kikwatiraine n’okukoresa emiringo y’okwohererezana obutumwa kushorooza esente z’okuhwera ab’eishe-emwe abahikirweho ekihikiirizi? Nitufayo aha b’eishe-emwe kandi nituba nitwenda kuhwerahwerana n’okugumyana. (Yak. 2:15, 16) Kwonka twateeraho kukikora kurabira omu guruupu z’okuhurizana nikiba nikirabanisamu entebeekanisa nungi erikuba etairweho ofiisi eitaagi nari ekibiina. (1 Tim. 5:3, 4, 9, 10, 16) Kandi tihaine n’omwe ahariitwe oine kwereebekyesa nk’oine obujunaanizibwa bw’omutaano aha busyo bwa Ruhanga.

Nitwenda kukora ekirikuhaisa Ruhanga ekitiinisa. (1 Kor. 10:31) N’ahabw’ekyo waaba noocwamu kukoresa emiringo y’okwohererezana obutumwa nari emiringo y’empurizana endiijo, teekateeka aha kabi akarikubaasa kubaho, kandi obe omwegyendesereza.