Abakristu bingi bikubombela ifoni pamo itabuleti ukuti bayobesanieghe na ba mumbumba yabo kangi na Bakristu abinabo. Loli Unkristu unkusi mwambepo, ikukumbuka ubulongosi ubu: “Linga umundu wa mahala aghubwene ubulughu ikubwalala, loli unsita mahala ikwitagha itolo mbulughu po panyuma ikupilika ukubaba.”—Mbu. 27:12.

Tukundaghisya fiyo Yehova panongwa yakuti ikutufighilila. Loli tutikulondiwa ukwangala na bandu aba batikukolelana na bangi, bepusiwe nkipanga pamo bikukasya ifimanyisyo ifyabutungulu. (Rom. 16:17; 1 Kor. 5:11; 2 Yoh. 10, 11) Bamo aba bikukolelana nikipanga batikupilikila ifundo sya mu Baibolo. (2 Tim. 2:20, 21) Linga tukusala abamanyani, tukukumbukila ifundo iyi. Ukusala abamanyani abanunu kubaghile ukuya kukafu fiyofiyo linga tukuyobesania nabo mwakutumilana amameseji.

Kwakulondiwa fiyo ukuya maso linga tukusala abamanyani abanunu fiyofiyo linga tukutumilana amameseji pamalo agha abandu bingi bikwangalilapo. Abakristu bamo bikwingila pa malo agha nififukwa ifibibi. Ngimba unkamu pamo umulumbu ikulondiwa ukuya maso bulebule linga ingile pamalo agha pali abandu bingi? Kubaghile ukuya kukafu ukummanya umundu aliwesa linga ali nulwitiko lwamaka pamo hayi. Ilemba lya Salimo 26:4 likuti: “Ngaya mbulilanisi na batungulu, nalinga ko kwenda na bandu abasyobi.” Ifundo iyi yikunangisya ukuti kubaghile ukuya kwamahala ukutumilana amameseji na bandu bene aba tubamenye kanunu.

Nalinga ukuti libaghile ukuya gulu lya bandu abanandi loli Unkristu ikulondiwa ukuya maso nakabalilo aka ikumalila pakutuma amameseji kangi na isi abandu bikuyoba. Tutikulondiwa ukwamula imeseji yiliyosa iyi tuyibwene kisita kwinong’onela isi yikuyoba pamo akabalilo aka tukuya pakumalila. Pauli alinsokile Timoti isyakufwana na bandu aba “bayobiyobi kangi basomani abandu.” (1 Tim. 5:13) Amasiku agha, tubaghile ukubomba mwakufwana itolo pafoni pamo pa tabuleti.

Unketi unkusi mwambepo akabaghila ukwamula pamo ukupilikisya inkhani isyakisisi isyakuyoba isya Nkristu umwinake. (Sal. 15:3; Mbu. 20:19) Kangi akabaghila ukuyoba pamo ukupilikisya inkhani isyakutilisya pamo isi sikaya nubuketi. (Ef. 4:25) Tuli ninkhani inunu fiyo isya mu Baibolo isi tukusisubila pa webusayiti yitu iya jw.org kangi na mapulogilamu gha pa JW Broadcasting^®.

Abaketi bamo bikubombela amameseji gha pa foni pamo patabuleti ukuti bulisye, bule, bafumusye ikindu kimo pamo ukuti abandu bayaghe imbombo. Isi nkhani syakufwana nukubomba ibizinesi kangi kutikukolelana nukwiputa kwa Yehova. Unkristu uyu atikulonda ukuti “angayagha ngana ndalama” atikubombela abakamu ukuti mo asyaghileghe indalama.—Hib. 13:5.

Ngimba tubaghile ukulemba amameseji linga tukulonda ukusuma indalama isyakubatulila abakamu aba bikulonda ubutuli pamo baghene ningozi sya kipeliwa? Utubalilo twingi tukunangisania ulughano mwakutulana nukukasania. (Yak. 2:15, 16) Loli ukutuma amameseji pa gulu lya bandu kubaghile ukusofania imbatiko iyi ofesi pamo ikipanga kikubombela pakubatula abakamu na balumbu. (1 Tim. 5:3, 4, 9, 10, 16) Kangi akayapo nayumo uyu abaghile ukubapangisya abandu ukwinong’ona ukuti tupeliwe ububombeli ubwapadela ubwakuketesya ing’osi sya Kyala.

Ubwighane bwitu bo bwakuti tumpe amapalo Kyala. (1 Kor. 10:31) Yonongwa yake linga mukutuma pamo mukwambilila amameseji, mwinong’oneleghe ububibi bwake kangi muyeghe maso.