Tin ruman ta usa teknologia pa keda den kontakto ku famia i tambe otro rumannan. Pero, un ruman spiritualmente maduro lo tene kuenta ku e konseho akí: “Un hende prudente ta mira maldat i ta skonde, ma e simpelnan ta sigui nan kaminda i ta wòrdu kastigá.”—Pro. 27:12.

Nos sa ku Yehova Dios ke protehá nos. Ta p’esei nos no tin amistat ku hende ku ta kousa divishon, ku ta ekspulsá ni ku ta bini ku siñansa robes. (Rom. 16:17; 1 Kor. 5:11; 2 Huan 10, 11) Anto, kisas tin algun hende ku ta bini Salòn pero no ta obedesé loke Beibel ta bisa. (2 Tim. 2:20, 21) Ora nos ta sera amistat, nos ta tene kuenta ku tur eseinan. Pero, kisas ta bira mas difísil pa skohe amistat si nos ta hasi esei via teknologia.

Si bo tin pensá di djòin un chat group grandi, ta bon pa bo para pensa ta ken ta esnan ku ta forma parti di e grupo ei. Algun ruman a drenta chat group grandi i a haña nan ku mal eksperensia. Kon bo por ta kouteloso si tin sientos di míles di hende den e grupo ei? Ta imposibel pa bo sa ken tur esnan den e grupo ta i kon nan ta pará den sentido spiritual. Salmo 26:4 ta bisa: “Mi no ta sinta huntu ku hòmbernan gañadó, tampoko lo mi no anda ku hipókritanan.” E teksto akí ta animá nos pa nos manda mensahe solamente na hende ku nos konosé personalmente.

Asta den chat group chikitu ta bon pa paga tinu kuantu tempu bo ta pasa ta manda mensahe i ki ta e kosnan ku nan ta papia di dje. Sin importá ki e tópiko ta òf kuantu tempu nan keda papia riba dje, no sinti ku bo tin ku kontestá tur mensahe. Pablo a bisa Timoteo pa tene kuidou ku hende ku ta “kana hasi redu i ta mete den asuntu di otro hende.” (1 Tim. 5:13) E mesun kos por sosodé awe elektrónikamente.

Un ruman spiritualmente maduro lo no djòin un kòmbersashon kaminda ta papia malu òf ta revelá kosnan privá di otro rumannan. (Sal. 15:3; Pro. 20:19) Un ruman spiritualmente maduro lo evitá di skucha i plama notisia eksagerá òf ku no ta konfirmá. (Efe. 4:25) Nos tin sufisiente informashon basá riba Beibel i notisia konfiabel riba nos website jw.org i tambe den nos programa mensual di JW Broadcasting^®.

Tin ruman ta usa teknologia pa hasi negoshi. Nan ta sea purba di bende, kumpra, promové produkto òf ofresé hende trabou. Pero kòrda, e kosnan ei tin di haber ku negoshi i no tin nada di haber ku kosnan spiritual. Pues, un ruman ku ke tin un bida “liber di amor pa plaka” lo no usa nos hermandat komo su medio pa gana plaka.—Heb. 13:5.

Pero awor, kiko di manda mensahe pa pidi sèn pa rumannan ku ta den nesesidat òf pa yudansa despues di desaster natural? Debí ku nos stima nos rumannan, ta normal ku nos ke yuda nan i animá nan. (Sant. 2:15, 16) Pero, si nos hasi esei usando chat group grandi, nos ta stroba e sukursal òf e ansianonan di kongregashon di yuda nos rumannan den nesesidat. (1 Tim. 5:3, 4, 9, 10, 16) Sigur niun di nos no ke duna e impreshon ku nos a haña e asignashon spesial pa kuida nos rumannan.

Nos ke hasi tur kos pa e gloria di Dios. (1 Kor. 10:31) Pues, ora bo ta usa teknologia pa manda mensahe, pensa bon riba e peligernan i sea kouteloso.