A rebebil Kristiano a ousbech a technology el mengedecheduch er a rechederir me a rekldemir er a klaumerang. Me nguaisei, engdi a Kristiano el mla mukeroul er a tekoi er a klereng a melatk er tia el omellach: “A medengei a tekoi el chad a mesa tellemall a le mei e oibngii er ngii, e ngdi diak lomdasu el chad a di mong, e a uriul e ng ouuchel er a rengul.”​—Osi. 27:12.

Kede oba omereng el saul le Jehovah a soal el omekerreu er kid. Sei a uchul me ngdiak deteloi er a rumtok, reseluld a ngklir, me a rediak lolab a melemalt el osisechakl. (Rom 16:17; 1 Ko. 5:11; 2 Jn. 10, 11) Me nguaisei, te ngar ngii a rebebil el ngar ongdibel el diak loltirakl a llach er a Biblia. (2 Ti. 2:20, 21) Me sel domak a klausechelei er kid e kede melatk er tiang. Engdi ngsebechel el mo meringel er kid el ungil melilt er a rungil sechelei a lsekum e kede mengedecheduch er tir lousbech aike el app el dousbech el kau message.

Ngileakl el klou a ultutelel el dungil melilt er a resechelid a lsekum kede teloi er a klou el group er a rechad el kau message. A rebebil el Kristiano a mlo teloi choua ikaikid el group e milsa telemellel. Ngmekera odam me a lechub a odos e sebechel el kerekikl a lsekum e ngteloi er a group el betok el dart me a lechub e ngbetok el telael a rechad er ngii? Ngkmal diak el sebechel mo ungil medengei el kmo a rederta er tir te uangera el chad e uangera klereng er tir. A Psalm 26:4 a melekoi el kmo: “Ng diak kdengchokl el teloi er a re mengesuul el ka kubengterir a re cheblad.” Tia ngdiak lochotii el kmo ngkired el di kau message kid me a rechad el dungil medengelterir?

Me alta Kristiano a teloi er a kekerei el group engdi ngdirk kirel mo kerekikl er a klungel a taem el longoit er ngii el kau message. Ngdiak el soad el mo omdasu el kmo ngkired el reply a bek el message me a lechub e bo dongoit er a klou el taem el di kau message. A Paulus a milengelechel er a Timothy el kirir a rechad el “melaes e mechesang el melekoi a tekingir a rechad el diak a kirir er ngii.” (1 Ti. 5:13) Chelecha el taem e ngsebeched el mo chelsechusem er a chouaika el tekoi loeak a electronics.

A Kristiano el mla mukeroul er a tekoi er a klereng a kmal diak lekengei el lorrenges me a lechub e lolekoi a mekngit me a lechub e ngberrotel el tekoi el kirir a rekldemel. (Psa. 15:3; Osi. 20:19) Ngdirrek el kmal diak lorrenges me a lechub e lomelekl a teloched el chais. (Efe. 4:25) Ngkmal betok a okelel a reng me a update el sebeched el loumerang el ngar er a jw.org me a JW Broadcasting^®.

A rebebil Sioning a ousbech aikakid el rolel a dekau message el lolterau, omechar, e promote a klalo me a lechub e te offer a ureor. Aika tekoi er a siobai el diak el rolel a tekoi er a klereng. A Rekristiano el sorir el mengeroid er tir er a “ngibes er a udoud” a kmal diak lousbech er a rekldemir el mengereker.​—Heb. 13:5.

E a lsekum e kede ousbech aike el app el dousbech el kau message el olengit a udoud el mo olengeseu er a rekldemed el lousbech a ngeso me a lechub e ngmiltemall a belurir? Ngbetik a rengud er tir me kede olengeseu e melisiich er tir. (Jak. 2:15, 16) Me nguaisei, engdi a lsekum kede mo olengeseu er tir loeak aikaikid el meklou el group el dousbech el kau message e kede rullii el mo meringel er a branch office me a ongdibel el mo olengeseu er tir. (1 Ti. 5:3, 4, 9, 10, 16) E kmal diak el soad el rulleterir a rechad el mo omdasu el kmo ngngar ngii a ileakl el ngerecheled el omekerreu er a sib er a Dios.

Ngsoad el meruul a tekoi el mo uchul a odanges el mora Dios. (1 Ko. 10:31) Me sel dolilt el mo ousbech aikakid el app el dousbech el kau message me a lechub e ngkuk bebil er a technology, e bo dekerekikl e dungil melatk aike el sebechel mo uchul a telemellel.