Eenje von ons brucken soon niemootschet Jereetschoft toom met äare Famielje ooda Gloowesbreeda räden. Secha wudd een stoakja Christ doabie uk aun disen Rot denkjen: “Een väasechtja Maun sitt daut Ojjlekj komen un brinjt sikj en Sechaheit, oba de onbedochte gonen doa derch, un lieden doafäa” (Spr. 27:12).

Wie weeten, daut Jehova ons beschitzen well, un doawäajen hool wie ons von soone wajch, waut utjeschloten sent, Spoolungen veuasoaken ooda faulsche Lieren brinjen (Reem. 16:17; 1. Kor. 5:11; 2. Joh. 10-11). Un uk eenje, waut no de Toopkomes wanken, stalen sikj nich soo opp, aus sikj daut fa Christen jehieet (2. Tim. 2:20-21). Secha hool wie daut em Denkj, wan wie ons Frind sieekjen, oba daut es nich soo eefach, wan daut bloos äwa Internet ooda Fon es.

Eenje Breeda wieren äwa Internet ooda Fon en sea groote Gruppen bennen un daut es sea schlajcht utjekomen. Doawäajen sell wie sea oppaussen, en waut fa Gruppen wie nengonen. Woo kaun eena oppaussen, wan daut Gruppen sent, wua hundade ooda dusende bennen sent? Daut es schia ommäajlich, jieda eenen to kjanen un to weeten, woo daut met dee em jeisteljen steit. Psalm 26:4 sajcht: “Ekj sett nich met daugeniksje Menschen toop un hab uk nich Jemeenschoft met Heichla.” Moakt ons daut nich dietlich, daut wie bloos met soone, waut wie werkjlich kjanen, äwa Internet ooda Fon nobren sellen?

Mau rajcht bie kjliene Gruppen well wie doano oppaussen, äwa waut jerät woat un woo väl Tiet wie doa nenspenden. Mott eena werkjlich emma to aules waut sajen un daut tiedenlank? Paulus woarnd sienen Frint Timotäus fa soone, waut “aus Schneppanäsen romgonen un pludren” wudden (1. Tim. 5:13). Vondoag dän Dach kaun eena leicht dautselwje doonen – bloos äwa Internet ooda Fon.

Een stoakja Christ woat doa secha nich metmoaken ooda toohorchen, wan se äwa Gloowesbreeda grunzen ooda waut wiedapludren (Psa. 15:3; Spr. 20:19). Un wie wellen secha nuscht met Jeschichten to doonen haben, waut äwadräwen sent ooda wua wie nich weeten, aus dee werkjlich soo sent (Efs. 4:25). Un kjrie wie nich opp onse Websied jw.org un en daut Moonatsprogram von JW Broadcasting^® jenuach jeisteljet Äten un Norechten, wua opp to veloten es?

Eenje von Jehova siene Zeijen doonen äwa Internet ooda Fon Sachen aunbeeden, kjeepen ooda vekjeepen ooda Oabeida sieekjen. Aul daut haft nuscht met onsen Gottesdeenst to doonen. Christen, waut “nich hungrich no Jelt” sent, wellen äare Breeda secha nich utnutzen toom Jelt moaken (Heb. 13:5).

Wiels wie onse Breeda leewen un om dee bekjemmat sent, well wie dee halpen un dee Moot toospräakjen (Jak. 2:15-16). Wudd wie dan sellen äwa Internet ooda Fon Gruppen oppstalen toom Jelt kollakjten fa onse Breeda, waut en Noot sent ooda waut een Owwada beläft haben? Soone groote Gruppen kjennen mau rajcht jäajen daut schaufen, waut daut Betel ooda onse Vesaumlunk oppjestalt haft toom deejanje halpen (1. Tim. 5:3-4, 9-10, 16). Un wie wellen ons uk nich soo hanstalen, aus wan wie eene besondre Oppgow jekjräajen haben toom ons om Gott siene Schop kjemren.

Wie wellen doonen, waut Gott ieet (1. Kor. 10:31). Doawäajen pauss wie sea opp un denkjen uk aun de Jefoaren, ea wie ons omzajcht Norechten schekjen.