Matemue a Yehowa ako ana gukalegela technologie ihe-ihe ha guta maga nu enya fami jiawo nga nu aphangi’awo a Aklisto. Uvi Muklisto wa gukula mu nyuma udi naye gutangiza longo edi: ‘Muthu watema wana mona gingonza adisuegi uvi muthu waheya wanaya tuwa-tuwa nu wana tagana nu malamba.’—Ish. 27:12.

Tudi diago mukotelesa egi Yehowa wana tshigina gutubamba. Hene, tushigo naye gukuata ufuta nu athu ana khala nu khadilo dia gukhaphumuna athu nga athu anyi ana khala ndo agujinginyina gudi Yehowa nu ba aposta. (Lomo 16:17; 1 Kol. 5:11; 2 Yone 10, 11) Gudi nu athu ako anaza mu hungu uvi ana nemesa ndo mikhuala ya Nzambi. (2 Tim. 2:20, 21) Tangua tudi mutomba mafut’etu, tushigo naye gujimbila ndaga eyi. Uvi yajiya gukhala lamba ha gutomba mafut’etu nu gutema tangua tudi mukalegela Internet.

Idi nu ndando yavula ha gutomba mafut’ etu nu gutema guagasue tangua tudi muta maga mu groupe ya athu avula mu Internet. Matemue a Yehowa ako adinginyishile mu groupe jia luholo elu, atagenele nu malamba. Luholo lutshi phangi wa yala nga wa makhetu ajiya gumonesa gutema tangua adi mutshigina gungina mu groupe idi nu athu avula? Mu groupe jia luholo elu yajiya gukhala lamba ha gujiya makalegelo a muthu muabonga nu gujiya gula muthu muene udi ya gujinginyina gudi Yehowa. Ngimbo 26:4 idi muzuela egi: ‘Ngana kuata ndo ufuta nu enya mambo ngana tuna athu ana suega makalegelo awo.’ Ndaga eyi idi mumonesa egi, mbatumonesa gutema gula tudi muta maga phamba nu athu anyi tudi mujiya ba?

Muklisto udi naye gujiya matangua guvula gutshi ana gubalegesa mu Internet nu athu a luholo lutshi ana guta nawo maga. Ishigo nu ndando egi tusendese guhana mvutu gu ba mesaje agasue athu adi gututumila Internet gula ndo yajiya gutuzula tangua diavula. Mupostolo Phaula watemesele Timote mukunda nu athu anyi ana ‘gufeta athu nu anyi ana gudinginyisa mu ndaga jiangane.’ (1 Tim. 5:13) Mangino idi yaleba ha gudinginyisa mu ndaga jia ngane nu gusendesa gufeta athu mu Internet.

Muklisto wa gukula mu nyuma ashigo naye gufeta nga guzuela ndaga jia gisuegi jia aphangi. (Ngi. 15:3; Ish. 20:19) Ashigo naye nji guwendesa mene jia mambo jidi musagesa aphangi. (Ef. 4:25) Tuana heta mene jiabonga jiakatuga mu Biblia nu rapore jiabonga tuajiya gushila mutshima mu jw.org nu mu JW Télédiffusion.

Aphangi ako ana kalegela Internet ha gusumba nu gusumbisa nu gukalagala publicité jia ima yawo ya mungenda nga ha guhana athu ako midimo. Ndaga eji jidi ndaga jia mungenda jishigo mutadila gikombelelo gia Yehowa. Muklisto munu ashigo mutshigina gubua mu muheto wa guzumba mbongo, ashigo naye gukalegela aphangi nga guahuiga ha guheta mbongo.—Heb. 13:5.

Tuajiya gukalegela Internet ha gutoga makuta mukunda nu gukuatesa aphangi adi mutagana nu malamba ba? Tuana monesa egi tuana zumba aphangi’etu tangua tuana guakuatesa nu tangua tuana guahana gikhesa. (Yak. 2:15, 16) Uvi guhaga ba groupe avula mu Internet ha gutoga makuta mukunda nu gukuatesa aphangi, yajiya gubinda aphangi a gu Betele nga aphangi a mu ma hungu ha guakuatesa. (1 Tim. 5:3, 4, 9, 10, 16) Gushigo nga muthu mumoshi mukatshi dietu, udi naye gutuma athu ha gutangiza egi muene udi nu ginemo gia gubamba akombeledi a Nzambi.

Tudi naye gutshita ndaga jidi mutumbuisa Nzambi. (1 Kol. 10:31) Hene, tangua tudi muzula desizio dia gukalegela Internet, nga maluholo ako a technologie, tudi naye gujiya ingonza nu guyilenga.