Akhrisitu anango achaphatisa basa vipangizo vamanjeuno pakuyakhulana na wa m’banja yawo na Mboni zinzawo. Koma Mkhrisitu wokhuma achaganizira mpfundo yakuti: ‘Munthu wochenjera achawona tsoka nkubishala, koma opusa andoyendambouko ndipo agumana na mabvuto.’—Miy. 27:12.

Tichatembeja Yahova yemwe achada kutiteteza. Koma tichadekanalini kubverana na aliyese woyambisa magawano, wochosewa panango wavipfunziso vabodza. (Aro. 16:17; 1 Akor. 5:11; 2 Yoh. 10, 11) Anango angakhale mumpingu koma makhalidwe yawo yachalemekezalini Yahova. (2 Tim. 2:20, 21) Tikafuna kukhala na shamwali, tichadekana kukumbukira nkhani mweyi. Ni vabwinolini kumbondogumana azishamwali pavipangizo vamanjeuno.

Tichadekana kukhala wachikatikati pakusalula wanthu wocheza nawo maka-maka peno tinagulu ikulu ya azishamwali pafoni. Akhrisitu anango womwe adangena mu gulu ikulu pafoni, votsatira vake vidakhala voipa. Manje ko m’bale panango mulongo angakhale tani wosamala peno gulupo yake inkufika kuma 100 panango 1000? Vingakhale voshupa kudziwa uzimu wa aliyese. Salimo 26:4 ichati: ‘Nilibe kukhala pasi pabodzi na wanthu wabodza ndipo nibveranalini na wanthu wobisa umunthu wawo.’ Lemba mweyi inkuwonesa kuti vingakhale vanzeru kuti timbacheze na wa wanthu womwe tidawawonako maso na maso?

Podiya kuti gulu ikhale ing’ono, Mkhrisitu achadekana kudzibvunza kuti: Ko pagulu mweyi ankukambirana nkhani zanyi? Vinkunimalira nthawe itali tani? Pagulu mweyi wanthu angambakambirane nkhani zosiyana-siyana, koma imwepo ayi kuchichimizika kumbandodawira vilivose. Paulo adachenjeza Timoteyo za wanthu ‘wakhokolo na wongenera nkhani za anango.’ (1 Tim. 5:13) Vimwevi vingachitike soti ntsiku zino pakuphatisa basa vipangizo vamanjeuno.

Mkhrisitu chaiye angambakokolelini abale na alongo panango kumbaulula nkhani zachintsintsi. (Sal. 15:3; Miy. 20:19) Ndipo achasamala na nkhani iliyose yomwe ilibe umboni. (Aef. 4:25) Ise tichatambira chakudya chauzimu pophatisira basa webusaiti yathu ya jw.org, pologalama ya mwezi na mwezi ya JW Broadcasting^® na malipoti yosiyanasiyana. Mboni zinango ziphatisira basa vipangizo vachizungu pakugulisa, kugula na kutsatsa malonda. Imweyi ni khama yakuthupi osati pa vinthu vauzimu. Akhrisitu achadekana kukhala wosamala kuti ‘asambakonde maninge mali’ na kuthawa chiyeso chophatisira basa abale wathu wapadziko yose pakukonza bizi.—Aheb. 13:5.

Tani pankhani yophatisa basa vipangizo vamanjeuno pakukumbira mali kuti zithandize abale wathu osowa panango ndawa ya ngozi zachilengedwe? Tichatembeja ndawa ya mzimu wachikondi wakuda kuthandiza na kulimbikisa anango. (Yak. 2:15, 16) Koma tikafuna kuti anango athandiziwe, ofesi ya nthambi panango mpingu ungachite vimwevi. (1 Tim. 5:3, 4, 9, 10, 16) Kunena shuwa palibe aliyese wa ise yemwe achada kudziwika kuti ndiye anaudindo ukulu pakuthandiza nkhosa za Mulungu.

Cholinga chathu nchakuti ulemelero wose uyende kwa Mulungu. (1 Akor. 10:31) Ndipomwapa mukafuna kuti muphatisire basa mensaje panango vipangizo vamanjeuno, ganizirani kuipa kwake ndipo khalani wosamala.