Staka Christian iusim messaging app lo mobile for story witim olketa lo famili and kongregeson. So hem gud for iumi tingim disfala kaonsel from Bible: “Man garem save, hemi lukim trabol, hem go long sef ples. Man no garem save, hem gohed long trabol, an hemi safa.”​—Provebs 27:12.

Datfala kaonsel showimaot Jehovah laek protectim iumi. So iumi mas no story witim eniwan wea laek spoelem wan mind lo kongregeson, wea disfellowship, or wea laek storyim olketa laea teaching. (Rome 16:17; 1 Cor. 5:11; 2 John 10, 11) And tu, maet samfala lo kongregeson no strong lo spiritual wei. (2 Tim. 2:20, 21) So iumi mas careful lo hu nao iumi fren witim. Bat taem iumi iusim messaging app, datwan no isi.

Distaem samfala iusim messaging app for textim staka pipol wantaem. From staka pipol insaed kaen grup olsem maet hem hard for savve gud lo evriwan, and samfala brata and sista kasem nogud samting from datwan. Taem wanfala grup garem staka handred or staka thousand pipol insaed, bae hem hard for iumi savve sapos olketa garem gudfala wei and sapos olketa strong lo spiritual wei. Sams 26:4 sei: “Mi nating laek fo joenem olketa nogud pipol. An mi nating laek fo fren wetem olketa hu i save laea tumas.” So iumi laek iusim messaging app for story nomoa lo pipol wea iumi savve lo olketa.

Nomata iumi ting for joinim wanfala smol grup for textim each other, hem gud for tingim taem wea iumi bae spendem and wanem iumi bae storyim. Paul talem Timothy for no spendem taem witim olketa wea “gossip and poke nose long bisnis bilong narawan.” (1 Tim. 5:13) Distaem pipol savve iusim messaging app for duim datwan.

Iumi no laek iusim messaging app for storyim or herem eni private information or tok spoelem olketa brata and sista. (Sams 15:3; Provebs 20:19) And iumi no laek for herem eni kokonat nius wea gogo raon or olketa laea story. (Eph. 4:25) Lo jw.org website and JW Broadcasting^® program iumi savve kasem staka spiritual kaikai and herem olketa report wea iumi fit for trustim.

Samfala Witness iusim messaging app for salem, baem, or advertisem samting saed lo bisnis lo olketa brata and sista. Datwan no join witim olketa spiritual samting. From iumi olketa Christian “no laekem tumas selen” bae iumi no duim kaen samting olsem.​—Heb. 13:5.

Waswe, hem olraet for iusim messaging app for askem olketa brata and sista for selen for olketa wea garem need or wea kasem disaster? Iumi lovem olketa brata and sista, so taem olketa needim help iumi laek helpem olketa. (Jas. 2:15, 16) Bat sapos iumi iusim messaging app for duim datwan hem maet spoelem eni arrangement wea kongregeson or branch office garem finis. (1 Tim. 5:3, 4, 9, 10, 16) Nomata iumi tingse iumi duim gud samting, maet hem mekem narawan tingse olketa elder markem iumi for lukaftarem olketa brata and sista.

Iumi laek for duim olketa samting wea mekhae lo God. (1 Cor. 10:31) So taem iumi iusim messaging app or eni nara technology, hem important for luksavve lo nogud saed mekem iumi no kasem eni nogud samting.